螢幕情侶
螢幕情侶

回顧2018年 5對TVB最受歡迎螢幕情侶|總有一對你覺得好襯!

影視娛樂

廣告

TVB一如以往創造出一對又一對螢幕情侶,當中更有人成為真正嘅一對情侶!踏入2018年最後一個月,就同大家一齊回顧今年有邊5對令人難忘之餘,亦係受大家歡迎嘅螢幕情侶啦!

撰文:東方新地|圖片:新傳媒圖片庫、Instagram、電視截圖、劇照

回顧2018年5對最受歡迎螢幕情侶

01|林淑敏、許家傑 –《愛回家之開心速遞》

雖然唔知呢兩位係咪大家嘅心目中頭號最愛螢幕情侶,但要數最受歡迎螢幕情侶就一定會數到《愛回家》嘅大小姐同送水輝!

戲中,二人因背景懸殊,只可以偷偷摸摸來往,但仍無阻二人嘅甜蜜!之前,二人更喺劇中出現「愛的暱稱」,「小蓮」與「輝輝」!

由於劇情不時有唔同笑點,令大小姐同送水輝嘅一段感情充滿無限樂趣,同時亦令粉絲們睇得樂開懷又甜滋滋!

最近大小姐與送水輝喺戲中嘅感情未如之前一樣咁sweet,而編審亦曾提過唔會畀佢哋嘅感情線咁順利!小編私心,希望編審可以放過呢對戀人啦!

02|馬德鐘、張曦雯–《跳躍生命線》

《跳躍生命線》播出後,劇集叫好叫座,同時亦令劇中演員人氣急升!不過,劇中最搶眼嘅一對戀人,仲唔係由馬神飾演嘅麥在田同張曦雯飾演嘅文暉!

呢對情侶檔喺劇中嘅感情線睇到唔少觀眾相當投入,大結局嗰集仲有好多人擔心文暉真係會死!

講番呢對螢幕情侶,男嘅就高大有型,而女嘅就更加係又靚又索,認真好登對!

雖然二人喺現實中嘅年紀相差成22年,但外形望落毫無違和感,出奇咁襯!

03|黎諾懿、李佳芯 -《BB來了》

今年播出嘅《BB來了》雖然係輕鬆小品劇,但就因劇情貼地而意外大獲好評!其中,黎諾懿同李佳芯飾演嘅一對夫婦同時亦都被指二人又幾襯喎!

雖然二人喺劇入面甜蜜畫面唔算多,甚至爭吵場面可能仲會比較多,但正因為咁先令大家睇得更有共鳴!

黎諾懿同李佳芯喺劇中演繹出日常生活中,夫妻及新手爸媽嘅日常,成功虜獲一班觀眾喜愛!

 

呢對「夫妻檔」最近更喺第11屆最強人氣品牌大獎中,獲得最強人氣飛躍廣告男星及女星,黎諾懿更留言:「終於可以同老婆一齊攞獎!」認真投入角色!

04|袁偉豪、黃智雯 -《三個女人一個「因」》

其實袁偉豪同黃智雯已合作過多次,今年再次合作拍劇當然就駕輕就熟,完全冇難度!

如果大家仲記得,劇中黃智雯患多種人格症,而身為徒弟嘅袁偉豪唔單止幫對方保守秘密,更照顧變成唔同人格嘅方以因,甚至協助她治療多重人格,呢啲男仔去邊搵?

另外,二人無論戲裡戲外都非常老友,難怪拍起劇上嚟都默契十足啦!

早前,二人更獲得新加坡及馬來西亞最喜愛TVB男女主角獎項,可惜在剛過去的頒獎禮中未能奪得獎項。

05|馬國明、黃心穎 -《宮心計2深宮計》

講到今年嘅螢幕情侶就真係唔可以少咗馬明同心穎BB呢對,皆因二人唔單止係螢幕上嘅情侶,仲係現實嘅一情侶!

馬明同心穎BB早因拍劇結緣,今次更以情侶檔姿態喺《宮心計2深宮計》合演情侶,實屬難得!

 

可惜二人喺劇中上演一場令人心痛嘅苦戀,若芊最後因皇后用石頭重擊後腦而死去,只剩下癡情一片嘅任三恕孤身一人,諗起都覺得好慘…

好在,喺現實中嘅馬明同心穎就非常甜蜜,不時孖公仔出席活動,唔知幾時可以聽到佢哋拉埋天窗呢?

將來還有什麼演唱會值得留意?

有不少歌手宣布舉辦演唱會,小編為你整合了香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

香港18區都非常值得花時間好好探索,一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..