蛋黃哥 Hea到香港 攤喺度的Pop-up Store【旺角有乜玩】

香港好去處

廣告

正所謂「可以Hea的話,不會郁~~」,等咗咁耐,人稱 蛋黃哥 嘅人氣王Gudetama梳乎蛋終於都懶懶閒咁嚟到香港喇! 蛋黃哥 聽日(7月7日)開始就會現身於「梳乎町」,喺朗豪坊Hea足兩個月,等一眾大小朋友嚟同佢Hea住影相。

「梳乎町」入面有3間食堂,分別係梳乎壽司店、蛋香樓以及Gudetama Bakery, 蛋黃哥 將會化身玉子燒、鐵板炒飯、雞蛋布甸等等,進駐不同食堂,畀香港嘅粉絲們朝一朝聖。

梳乎壽司店嘅廚司推介包括玉子燒三兄弟、玉子壽司孖寶以及三文魚籽壽司,見到 蛋黃哥 呢個咁Hea嘅表情,真係令人好想咬佢一啖呀可惡!

蛋香樓入面有梳乎蛋鐵板炒飯同埋梳乎蛋中華拉麵大盛,點解喺鐵板上面都可以咁Hea咁有霸氣,點解?!

對 蛋黃哥 而言,香港實在係太熱喇,所以Hea得太耐嘅佢都會有變壞嘅時候,但係即使畀人棄於後巷, 蛋黃哥 都一於少理,照Hea!

雖然記者都好想可以好似 蛋黃哥 咁,每日都攤喺度Hea住過,不過 蛋黃哥 就話,佢就算點受歡迎都好,最後咪又係畀人食,有咩好羨慕喎。但係見到佢瞓喺呢個蛋漿Jacuzzi度嘆世界嘅樣,又點會唔羨慕呀!

為咗慶祝朗豪坊10周年,Gudatama Bakery入面特登整咗個10歲生日蛋糕,不過 蛋黃哥 表示,生日咋嘛,咁又點喎。

除咗食堂,「梳乎町」入面亦有由 蛋黃哥 同埋頭號粉絲Nisetama擔任車長嘅梳乎列車,不過連郁都懶得郁嘅 蛋黃哥 又點會肯揸車呢?所以其實負責揸車嘅只有Nisetama,而 蛋黃哥 只係負責瞓喺車廂,懶懶閒咁等人同佢影相。

不過,懶惰成性嘅 蛋黃哥 表示,香港實在太多佢嘅粉絲,懶得同人影相嘅佢決定只係同有車飛嘅粉絲見面,其他人就唔好煩住佢咁話喎。如果想登上列車同 蛋黃哥 合照,粉絲們就要用QR Code參加梳乎駅嘅手機遊戲,換取一親 蛋黃哥 香澤嘅車飛,仲可以測試你骨子裡到底有幾Hea!

除咗「梳乎町」,商場7樓亦有 蛋黃哥 嘅Pop-up Store,部分產品從日本空運到港搶先發售,粉絲們可以帶埋 蛋黃哥 返屋企一齊Hea!

另外, 蛋黃哥 亦首次變身「梳乎紅雞蛋」,成為成雙成對嘅賀壽特別版,為朗豪坊慶祝生日,包括咕o臣、瓷碗、瓷碟套裝,顧客只需於朗豪坊消費滿$800(最多2張即日機印單據)另加指定金額,即可換領。

 

梳乎蛋食堂

地址:旺角朗豪坊4樓通天廣場(顯示地圖
展期:2015年7月7日 – 9月6日
時間:11:00 – 23:00
電話:35202800

 

延伸閱讀

梳乎蛋 旺角Hit爆Pop-up Store【旺角】

梳乎蛋 又黎喇!日本3大野生捕獲 梳乎蛋 攻略