觀眾緣
觀眾緣

唔係齋靠樣!嚴選香香等6大最有觀眾緣TVB藝人

影視娛樂

廣告

香港地做藝人甚艱難,所謂一樣米養百樣人,要做到個個觀眾鍾意你絕對困難,冇一班人特別憎你已經要偷笑!TVB一台獨大多年,近年不停被鬧一成不變、愈來愈低質,連帶TVB藝人好似都經常被網民攻擊咁!不過以下呢幾位TVB藝人都可算例外,多年來都甚有觀眾緣,負評極少,唔知有冇邊位係你偶像?

撰文:東方新地|圖片:新傳媒、Instagram、劇照|編輯:Cherry@Central(原文刊登於東方新地

嚴選6大最有觀眾緣大台藝人:

第6位:黃智雯

唔講大家都未必記得,黃智雯其實係參選2007年港姐出身,三甲不入後成為無綫旗下藝人,之後三年都只係喺唔同劇集演閒角。但自《巴不得爸爸…》的演出為人認知後,黃智雯繼續在多套劇集有亮眼表現,被觀眾激讚演技突飛猛進,今年更憑《三個女人一個「因」》成為視后大熱!另一方面,黃智雯入行多年都幾乎冇咩負面新聞,亦冇咩同邊個邊個男星傳緋聞,形象正面,觀眾都急不及待再睇佢演出!

眼鏡娘角色上位

關二嫂人氣急升

2012年時,黃智雯憑《缺宅男女》巴辣人妻關二嫂一角人氣急升,其鵲巢鳩佔的形象備受矚目,被網民盛讚大躍進,成功獲得12年台慶飛躍進步女藝員及入圍最佳女配角。

踏上女一之路

黃智雯入行至今有不少作品,而佢每每都能突破自己,演活每一個性格迥然不同的角色,其實力派演員功架盡見於此。去年智雯在《雜警奇兵》和《降魔的》擔正女一,以實力贏取觀眾掌聲!

《三個女人一個「因」》大爆發

今年《三個女人一個「因」》中,黃智雯分別演出三個分裂的人格,最重要的是三個人格形象鮮明,毫無違和感。演員亮眼、劇本出色,星期日播出的《三個女人》無論口碑、收視都絕不比其他黃金時段的劇集差,相信智雯都可以漸漸擺脫「星期日女王」之名!

第5名:岑麗香

「香香公主」岑麗香為2010年華姐冠軍出身,燦爛甜美的笑容已成個人標記,加入無綫後人氣有增無減。香香真摯不造作的個性,仲有半鹹淡廣東話時常鬧出笑話,人前人後都係咁nice,真係好難令人討厭佢!

公主成人妻

香香公主於2016年尾宣布結婚嫁人,與金融才俊Joshua(強強) 在溫哥華舉行婚禮,香香婚後多了戀愛滋潤,成為人妻後多了份嫵媚的女人味,一顰一笑都相當動人!

2個月前宣布離開TVB

不過33歲的岑麗香2個月前宣布唔續約TVB,隨即有報道指佢離巢係為咗返回加拿大生BB,香香亦在社交網站寫下長篇感言,答謝多位無綫的台前幕後人員,唔少觀眾都大呼可惜!

成王祖藍旗下藝人

香香離巢後首度出席公開活動,佢透露7月份簽約成為王祖藍公司旗下藝人。問到酬勞同合約年期,佢話唔講得!至於未來工作方向,會拍劇還是內地綜藝節目?香香說:「都鍾意拍劇 。同時都想試唔同 ,返內地要做好多功課,學7年廣東話,學少少普通話都唔怕 。」

第4名:麥美恩

麥美恩(Mayanne) 都可算係無綫最深入民心的傻大姐!奪得2011年港姐第四名後,Mayanne加入無綫並向主持工作發展,最出名當然係成為《學是學非》「是非精」之一,不時展露其麻甩又開朗的個性,開創了自己獨特的定位,深得觀眾喜愛!Mayanne曾在去年台慶頒獎禮連奪三獎,今年初更勇奪「飛躍進步女藝員」,現時被封「新一代綜藝女王」!

「傻大姐」形象深入民心

至2013年,麥美恩成為綜藝節目《學是學非》的主持之一,雖然知名度不及其他幾位,不過佢在節目中願意放下身段,經常有爆笑演出,真摯不造作的感覺相當親民,「傻大姐」形象深入民心!

台慶連奪三獎

麥美恩在《萬千星輝頒獎典禮2016》中連奪三獎,其有份參與的《我愛香港》、《學是學非》和《天與地》,分別獲得「最佳綜藝節目」、「最佳資訊節目」及「最佳特備節目」,厲害!

「飛躍進步女藝員」麥美恩

之後到《萬千星輝頒獎禮2017》,雖然唔少獎項賽果都被網民炮轟,唯獨有一位得獎者係公認的實至名歸,就係「飛躍進步女藝員」麥美恩 (Mayanne)!Mayanne在台下得知獲獎後喜極而泣,上到台都繼續喊,佢感慨表示:「我知我有好多缺點,但係上帝畀咗個好好嘅恩賜我,可以令觀眾笑!」

第3名:朱千雪

朱千雪為2012年香港小姐季軍,參選時深得網民支持,但當年因網上投票系統伺服器發生問題,三甲依舊按評判評分選出,千雪最終只獲得季軍!單是呢件事已經叫觀眾大感可惜。千雪BB由出道至今一直是觀眾寵兒,完全是美貌與智慧並重的表表者,在娛樂圈人氣高企之餘,現時更正修讀法律博士學位,小編女神呀~~

《EU超時任務》入屋

千雪選港姐後加入無綫,參演過不少劇集,但說到其代表作一定係2016年《EU超時任務》!千雪飾演的Madam Ling凌晨風令人留下深刻印象,與渠頭(王浩信飾) 的一段情更是讓觀眾心酸落淚!

美貌與智慧並重

美貌與智慧並重的千雪BB人紅唔囂又夠貼地,發展演藝事業之餘亦是好學不倦!千雪早年畢業於西門菲莎大學商業和傳理系,後來於香港中文大學攻讀企業傳播社會科學系碩士都仲未夠,佢選擇停工一年,再修讀香港城市大學法律博士學位!

第2名:馬國明

今年44歲的馬國明於1999年加入無綫藝訓班,不經不覺在大台19年,馬明喺呢接近20年的時間幾乎冇任何負面新聞,緋聞亦是少之又少,又係著名孝順仔,好聽就係「無綫超級筍盤」,唔好聽都有人叫「TVB毒男」,不過都無阻觀眾的喜愛!馬明多年來有唔少代表作,可惜一直未能封視帝,上年《降魔的》亦只係得到「最受歡迎電視男角色」,一點點遺憾亦令馬明再加分?

未能憑《降魔的》封視帝

上年《降魔的》成功爆出,馬明演出「馬季」一角非常出色,外界都以為佢可以一嘗視帝滋味,點知最後只係得到「最受歡迎電視男角色」。

筍盤都有封盤時

馬明被視為無綫筍盤多年,不過筍盤都有封盤的一日,去年被爆與熱情如火的年輕小花黃心穎撻著,二人正打得火熱,雖然從未正式公開戀情,不過大家都明白㗎啦!

圈中出名孝順仔

馬明同時亦係圈中出名的孝順仔,多年來堅持與父母同住,雖然劇接劇忙個不停,但難得忙完,呢個乖仔有時間經常陪伴媽媽。早年馬明曾經講過:「我喜歡繑住阿媽行街,十二、三歲時有幾年無繑,怕人家以為自己不成熟。其實會怕,反而才不成熟。」

不煙不酒不夜蒲

馬國明不煙不酒不夜蒲,佢認為自己不是純情,只是口味問題,因為他不愛烈酒的味道,夜蒲場合覺得好嘈而已!而平日馬明不用開工的娛樂,除了踢波和陪家人,就是去做義工。咁好仔真係難得!

第1名:李佳芯

35歲李佳芯(Ali)樣貌娟秀、笑容甜美,仲散發出一種獨特氣質⋯⋯無錯,就係仙氣!早年大家睇《學是學非》時,可以見到Ali具備一種少女(同佢年紀不成正比)的傻氣;但其後在劇集中又可以展露成熟女性的嫵媚,令觀眾喜愛有加。靚女又形象正面,演技愈見精湛,都好少聽人話好討厭Ali?

《BB來了》演技爆發

最近《BB來了》廣受好評,除咗劇情夠貼地外,飾演唐恬兒的女主角Ali,演活女強人、準媽媽及新手媽媽的角色,雖然表情誇張搞到女神形象崩壞(連Ali都形容為自毁形象),但就獲網友讚佢演技大躍進!Ali完美演繹出女強人忽然做媽媽忐忑不安心情~

李佳芯出身有線

Ali自2008年起在有線電視擔任節目主持,當時仲係用自己本名李嘉馨,不過默默耕耘多年,發展依然平平。雖然未有代表作、名氣未算大,不過Ali都憑住標致面孔成功吸納唔少支持者!

去到2012年,Ali由有線轉投無綫旗下,13年時與黃心穎、梁嘉琪等人主持《學是學非》,隨住節目大受歡迎,幾位「是非精」成功入屋,Ali亦從此廣為觀眾認識。

《名門暗戰》做情婦彈起

不過講到Ali最引人注目的演出,就一定係2014年嘅《名門暗戰》! Ali在《名門暗戰》中飾演岳華情婦Ivy,姣到出汁又風騷,仲同黃浩然有場激烈床戲!Ali在劇中大部分時間都係短裙晒長腿,加上一雙勾魂電眼,勾走晒一班男觀眾的魂魄!

憑《踩過界》衝擊視后

在大馬舉行的《TVB 馬來西亞星光薈萃頒獎典禮2017》上,Ali憑《踩過界》「我最愛TVB女主角」,之後又在《Yahoo人氣搜尋2017頒獎典禮》及《星和無綫電視大獎2017》,攞咗「人氣最愛女主角」及「我最愛TVB女主角」,難怪被譽為下一個衝擊視后的大熱人選。

「美女與野獸」又如何

Ali與ViuTV藝人男友陳炳銓拍拖近四年,一向愛得低調,雖然女方貴為當家女神,而男方則其貌不揚,不過Ali從沒有介意女尊男卑,據知近月兩人已四圍睇樓想置業築愛巢,好事近啦!

將來還有什麼演唱會值得留意?

有不少歌手宣布舉辦演唱會,小編為你整合了香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

香港18區都非常值得花時間好好探索,一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..