【日本怪談】真人真事！搭電梯通往異世界 如月車站或非傳說？！沖繩恐怖「白色大叔」、二宮和也被靈體跟
撰文：Ka｜圖片來源：《ニノさん》
最新日本怪談 真人真事經歷
1｜唔止鐵路，電梯都有通往異世界嘅方法⋯⋯
日本網絡現時流行一個講法，話可以透過搭𨋢通往異世界。條件係首先要一個人搭，然後架𨋢必須能達至10層或以上，時間點則冇講究，但據說夕陽時分最容易同異世界接洽。
入𨋢後，需按「4樓」、「2樓」、「6樓」、「2樓」、「10樓」咁搭，搭至10樓前唔可以遇見任何人。到達10樓後，就需按到「5樓」，然後當𨋢門喺5樓打開，就會有個女人入𨋢。期間唔可以同呢個女人有任何交流，然後架𨋢就會返上10樓，當步出10樓，就會到達異世界。
據聞有個喺新宿某幢大廈工作嘅上班族，喺星期日故意返公司試玩呢個遊戲。因為正常唔會有人星期日返公司，於是呢個上班族就輕輕鬆鬆一個人搭到10樓。
但當按到「5樓」時，真係有個女人入𨋢！仔細一睇，發現原來係唔同樓層工作嘅同事。於是就放下咗戒心，開始閒談起嚟。上班族覺得始終都只係個傳聞，就打算落番1樓返屋企。點知下一秒，個女人就話有事要上10樓，按完樓層就靜默咗。
上班族突然一驚，就本能地按到9樓離開架𨋢。當𨋢門正閂上時，上班族聽到身後傳來一聲「嘖！」。到星期一返工，上班族喺公司偶遇到噚日同𨋢嘅同事，傾咗兩句之後，發現對方對噚日嘅事全不知情，直到現時，都唔知當日遇到嘅，係真實嘅人，定係嚟自異世界嘅人⋯⋯
2｜沖繩祭典恐怖「白色大叔」
沖繩有個地方祭典，會招募當地3個跑得快嘅男仔，穿上「生剝鬼」（NAMAHAGE）裝扮，追趕前來參加祭典嘅人，追到後就會喺人身上蓋上「除厄印」，寓意一整年都能健康渡度過。
但某年，音樂人上里出席呢個祭典，見到有個全身塗抹白色嘅大叔走過，心諗又唔係被選上嘅3個人，唔通係扮演其他神明嚟參加活動？於是就不以為然。
之後一班男仔搞手聚起嚟，一個前輩提到「有冇人見過一個全身塗白嘅人？」上里舉手話見過後，前輩就話「嗰個其實係一個唔可以見到嘅人」。
到祭典當日，上里已一早被蓋上「除厄印」，所有已經有呢個印嘅人都唔會畀「生剝鬼」追趕。上里有感無聊，就一個人四處走走。行行下又再見到「白色大叔」！上里嚇得唔敢郁，但「白色大叔」似乎並未注意到佢。
當「白色大叔」走過上里身邊，只聽到佢細細聲咁講「マズムヌ！マズムヌ！」（Mazumunu、Mazumunu）上里唔知咩事，但既然又再見到，就覺得理應同前輩講。
前輩知道後，就自己過去睇睇咩事。但最後，前輩並無回來。事後3日一直派人四圍搵都搵唔到，行蹤不明。最後，卻喺一個意想唔到嘅地方搵番前輩。
喺一個被當地人認為係建立沖繩嘅，古代人埋葬地嘅遺跡之中，發現咗呆立其中嘅前輩。雖然依然活著，但已經神志不清，甚至唔知自己係邊個。
後來，上里喺街上偶遇到呢位前輩，當2人對上眼時，前輩雙眼突然睜大，對住佢大叫「マズムヌ！」（Mazumunu）而呢句「マズムヌ」喺沖繩方言嚟講，帶有「怪物」嘅意思。上里就認為，莫非係喺古代人眼中，現代人嘅佢就形同怪物。
上里心想，明明自己同前輩都見過呢個「白色大叔」，點解前輩會變成咁，而自己就冇事呢？上里問識得通靈嘅祖母意見，祖母就話「應該係因為祭典開始前你就被蓋上除厄印，所以被保護住」。
3｜二宮和也親身經歷 出完外景惹來⋯⋯
節目主持二宮和也嘅親身經歷，係有日去咗一個「有前科」嘅地方出外景，之後連續2日發生怪事。每日結束工作回家，都有用杯飲酒嘅習慣，而飲完後覺得攰，酒杯就會放到第二朝先洗。
第二朝一起身，打算洗杯時，一拎起，杯緣完美地分裂開！而且並無任何一條裂痕，就咁分開咗兩截。二宮當時只心諗，分裂得真係靚呀！就唔多在意件事。
然後結束一日工作，繼續如常地飲酒、放低、睡覺、第二朝起身洗杯，點知，發生咗同噚日一模一樣嘅事！個杯緣同樣完美地、同之前一樣份量咁分開咗！
二宮心一驚，覺得唔多妥，就打電話搵以前曾一齊做靈異節目嘅相識問問發生咩事，畢竟早兩日曾去過啲「有前科」嘅地方。
相識就直截了當咁同二宮講，有「嘢」跟住佢，而且係自殺時頭部甩脫咗嘅靈體。
二宮望番個裂開咗嘅杯，發現按比例嚟講，的確係只有頭部部分嘅地方甩脫咗！工作就冇得避啦，但各位真係唔好隨意前往「發生過唔好嘅事」嘅地方啦，因為真係唔知會有咩後果㗎⋯⋯
