大阪燒肉
大阪燒肉

【大阪燒肉】隱藏高CP值小店|$45歎超稀有上等牛肩肉、黑毛和牛只需$85!

日本

廣告

【大阪燒肉】去到日本,就梗係要食燒肉同Shabu Shabu啦!食放題又怕回唔到本,單品叫又貴?咁就可以去試試大阪呢間隱藏燒肉店!由牛肉店營運,質素有保證之餘,仲非常抵食!

撰文:Carmen|圖片來源:TBS NEWS

大阪燒肉店

呢間燒肉店位於大阪東成區鶴橋嘅市場內,名為「勝手に焼肉」(意:隨便食燒肉)。

燒肉店嘅落單方法,係喺店外嘅肉櫃裡選擇自己想食嘅款式部位,畀完錢就可以入店內隨意燒嚟食喇!

店舖位於市場內,設置咗好幾張放有燒肉爐嘅枱,畀顧客隨意使用,享受食燒肉!

肉店嘅好處就係保證品質新鮮!仲可以以一個平價錢就食到黑毛和牛!呢盤黑毛和牛原價都只係約HK$85!

而且由肉店營運,就更加大機會食到「希少部位」!

肩胛板腱係一隻牛身上只有2kg嘅稀少部位,半價後只售約HK$90!!

由於係喺市場內經營,所以下午4點左右,喺人流減退時,就會開始減價!

半價後,呢款從一隻牛身上只有3kg嘅稀少部位,上等肩肉只售約HK$45!(原價約HK$90)

半價後牛舌售約HK$55(原價約HK$110)。

半價後牛菲力售約HK$52(原價約HK$104)。

根據唔同部位,有時更可以原價1/3價錢就食得到!

本來燒肉爐係需要畀800円先用得嘅,但如果每人購入1,000円嘅肉,就可以免費使用燒肉爐!

店內亦可order白飯同飲品。

想燒海鮮都得!

剩係食肉都「好寡」㗎嘛!咁就可以出去市場搜購喇!市場嘅海鮮檔中,一隻蠑螺只售230~250円,約HK$16~18有交易!

喺市場內購買嘅魚類、海鮮都係可以帶入店內燒嚟食。既可以享受喺日本市場買高質食品嘅樂趣,又可以喺最新鮮嘅狀態下立即燒嚟食!真係平靚正之選!

怕被煙燻眼嘅話,更可用50円(約HK$4)租用安全眼鏡保護雙眼。