倫敦金Wechat美人計騙局大整合!大批苦主為戇直中佬 兩星期痛失幾百萬當買教訓!
原文刊登於 環球膠報|圖片來源:「香港倫敦金騙案」Facebook、LIHKG | 編輯:150cm女孩@Central
呢班「偽高層」,實為「下線sales」,佢哋經常喺FB貼出大量名牌手袋、珠寶名錶晒命,向目標「獵物」展示「實力」,等佢哋容易啲落搭!實情係,呢啲貴重物品,只係呢班「下線sales」向公司借返嚟嘅道具,用嚟騙取受害人嘅信任,真正能牟取暴利嘅,就只有公司嘅「真.高層」,班「下線sales」都係公司嘅搵錢工具嚟㗎咋!
「倫敦金Sales」最常用嘅「釣魚」方法,就係利用WeChat嘅「附近的人」交友功能去結識男性,佢哋嘅相片通常都係年輕貌美、身光頸靚。但係,操作呢啲帳戶嘅並唔一定係女人!有啲男Sales會用靚女同事嘅相嚟搵獵物㗎…hehe…
當受害人同騙子「相處」一段時間後,如果受害人想約「倫敦金Sales」見面,呢班「囡」通常都會諸多藉口去推搪,皆因呢個WeChat帳戶嘅操作者可能另有其人,並由呢個人實際執行騙局,就如「Angel案」咁,受害人連個女仔隻手指尾都未掂過,就傻下傻下畀人呃咗二百萬了!
倫敦金騙案手段層出不窮
話說有位巴打喺TG Group畀一個叫Emily做金融嘅女仔加做Friend,話說入得呢個TG Group嘅巴打都一定係見識無數女仔,無啦啦有女仔加自己,巴打肯定打醒十二分精神啦!
「見佢幾靚女,同埋大家幾好傾,佢話冇男朋友,我心諗大家有冇發展機會呢?」呢位港男Kent已經40幾歲,係一名專業人士,今年四月喺微信「附近的人」交友,咁就畀「Angel」嘅靚女icon吸引住,加埋做好友,愈睇就覺得佢唔錯,以為今次終於搵到值得交往嘅對象,仲展開追求。(所以話:睇人唔好睇外表~)
而「美人」Angel自稱單身,話係港大畢業,做金融分析師。Kent就覺得大家都係專業人士,感覺上同佢好襯,最重要係佢先28歲,真係後生又靚女!兩人認識後就時不時用WeChat溝通,加上佢哋喺投資方面又好鬼投契,好快就熟咗,仲通宵講電話。Kent仲話當時火速墮入情網,畀對方孝順,又經常做義工,有愛心所吸引,認為佢係難得的「好女仔」。(戀愛中的人智商真是⋯⋯)
之後Kent知道Angel做金融投資,而且壓力都幾大,於是喺佢哋相識第7日(連約會都未開始),Angel就提議佢先投資100萬元炒賣黃金,仲話保證風險最多蝕20萬元,又撩下佢咁話:「其他人都係靠收手續食飯,但我唔會收你手續費,我等你畀家用。」(高招,高招!)
Kent見Angel似乎都對自己一往情深,加上想幫佢喺工作上「達標」,就應承佢去佢嘅投資公司開戶,嗰日兩個先首次見面,先知佢係助理副總裁(巿場部),就應承存入100萬,仲簽埋授權書畀佢操盤。(係愛呀,哈利!)
Angel梗係唔知咩叫見好就收,第二日Angel又叫佢加碼到600萬,聲稱「回報最少2百萬,風險先78萬。」她仲應承拍拖,Kent一下子就畀愛情沖昏頭腦,加上對方保證止蝕80萬元,故再投資500萬元。「點知第二日起身,睇下個帳戶一共有300手買賣,一晚帳面就蝕咗200幾萬,我即時全部斬倉,如果再遲啲可能連渣都冇剩。」埋單結算後,Kent共蝕咗180萬元,之後佢都有攞埋剩低嘅420萬元,Angel就不斷埋怨佢斬倉,如果唔係好可能賺回數百萬元。
人嘅慾望係無止境嘅,Angel再出招:「如果相信我,400萬交畀我操作。」但當Kent拒絕後,Angel就發火:「咁唔信我,大家分手!」好彩Kent事後都揭發原來一切都是大話!「佢講嘅嘢全部係假,包括唔係港大畢業、無金融分析師資格、有男朋友,連報的住址都係假。」同佢只係「拍拖」兩星期,就冇咗「兩球」,「我哋見面得四、五次,拖手都只係兩次,佢根本係感情騙子。」(兩百萬買個教訓~)