北海道攻略 杜如風
北海道攻略 杜如風

【北海道攻略】杜如風再去日本喪買喪食 | 率先公開全輯1~5集、30個食買玩行程

日本

廣告

【北海道攻略】杜如風又帶大家去日本玩!由5月20日起一連5個禮拜,逢星期日晚8點,TVB將會播出《北海道攻略》!節目出街之前,不如率先睇下杜如風今次有咩好介紹!

撰文:主場・日本 | 圖片來源:TVB、杜如風IG、電視截圖、新傳媒資料室、相關單位的官方網站

《北海道攻略》第一集:札幌、帶廣、十勝食買玩

01 | 3萬円冠名贊助第一屆「如風盃」

在香港,要好有錢好有錢先可以拉頭馬!但在十勝,只需3萬円(約$2,130)就可以冠名贊助一場賽事!更可以安排賽前訪問及賽後頒獎!

ばんえい十勝
網址:www.banei-keiba.or.jp

02 | 帶廣名物「豚丼」

如果唔食豚丼的話,唔好話畀人知去過帶廣!唔使多講,當然係用當地生產的豬肉,逐片人手燒,間間都係!但呢間的特色係可以自選肥瘦,想食肥一點、多一點油香,可以揀豬腩肉,怕肥就可以揀瘦肉!

ぶた丼のとん田@帶廣
網址:obikan.jp/post_spot/1008

03 | 全店77円!夜冷店尋寶

香港的夜冷店幾乎絕跡,但估唔到北海道竟然有一間,而且仲係「均一價」,件件77円,平過DAISO!杜如風出盡手尋寶,唔知有無買到嘢呢?

留意,此店每星期只會於星期三、五10am-4pm營業。

お宝バザー4C倉庫@札幌
網址:www.4ct.co.jp

04 | 200蚊一隻毛蟹!

去到北海道,就梗係要食海鮮!呢間札幌的海鮮居酒屋非常抵食,毛蟹每隻2,900円,活毛蟹都只係4,200円,喺香港食咖喱蟹都唔得!

杜如風IG post咗呢張蟹相,即呃到1,800幾個like!

更抵!1,000円碗海膽飯

除咗蒸毛蟹,杜如風仲叫咗海膽飯、刺身、蟹鍋,全部都好抵食!

磯金@札幌
網址:www.isokin.jp

05 | 下一站… 幸福?

幸福駅是位於帶廣市的幸福町,本來是日本國有鐵道廣尾線的車站,但随著廣尾線於1987年停運,幸福駅亦成了廢置的車站,不過仍保存著舊有的候車室、月台、車卡及路軌,情侶們都會來這裡拍照,因為必定「幸福」啊!

候車室內貼滿了巨型粉紅色的「幸福車票」,近年成為最hit的打卡景點!

幸福駅@帶廣
網址:www.koufuku-eki.com

《北海道攻略》第二集:札幌買下食下…仲睇埋樓!

06 | 睇樓!薄野站行4分鐘,25萬咋!

香港人最鍾意「樓」,但喺香港只可以「睇」,要買的話… (傷心事唔好講!)

其實,可以考慮下去札幌買,杜如風就去睇咗呢個單位,300呎左右,距離薄野地鐵站只係4分鐘,價錢只係25萬咋!喺香港,買個車位都未夠呀!

07 | 狸小路買Chanel?!

就算無去過札幌,都應該聽過「狸小路」呢條有好多手信店的商店街吧!(雖然依家最多係藥房… well,都係手信!)估唔到杜如風可以shopping shop到喺狸小路都買到Chanel!呢間二手店,除咗名牌手袋,仲有名錶同珠寶賣。

質蔵屋@札幌
網址:shichikuraya.jp

08 | 和風fashion

呢個品牌的出品,我只能夠講,唔係個個都carry到!杜如風著可能好潮,你我她著呢,可能變成MK… 我好努力喺官網搵到呢件比較正常少少!(想挑戰自己對fashion的接受能力的話,我建議大家click去官網內「和の輪」的「札幌」同埋「大阪」睇下,睇下啲fans點carry!)

gouk@札幌
網址:www.gouk.jp

09 | MoMA初登陸北海道!

唔使多介紹MoMA吧?簡單講,就係賣有型有品味的家品雜貨。原來去年正式登陸北海道,喺札幌站旁的Loft(即係Bic Camera樓上)入面開咗個專櫃!選擇唔算多,但想買一啲小型擺設、文具離價,不妨去睇下!

MoMA Design Store@札幌
網址:www.momastore.jp

10 | 500円地道飯堂

在札幌唔一定要餐餐食貴嘢,「札幌市役所地下食堂」的午餐,只係500~560円,平過香港麥記,抵到你唔信!而且仲日日唔同款,每日有6款選擇,睇見啲相,隔住個mon都流口水呀!

札幌市役所地下食堂@札幌
網址:www.facebook.com/sapporoshokudou

11 | 無添加生海膽專門店

好有趣!這間餐廳係由海膽加工公司經營,但賣點係供應「無添加海膽」!Anyway,可以全年食到美味海膽就得啦!除咗最人氣的生海膽丼,仲有燒海膽、白汁焗海膽及其他海鮮料理,應該好啱香港人!

杜如風喺IG post咗呢碗海膽飯(4,000円),寫住「幸福」!應該真係好好食!

函館うに むらかみ@札幌
網址:www.uni-murakami.com

《北海道攻略》第三集:札幌再買再食!去埋近郊榨牛奶!

12 | 型男古著店

男生們到札幌想shopping的話,極建議大家到這間古著店逛逛,店內有大量潮牌的二手衫及波鞋,如Visim、Supreme、Garcons等等。

OM@札幌
網址:www.onemindtrading.com

13 | Outdoor系型男小心破產

唔喜歡二手衫的話,不如轉戰這一間,全部都係日本outdoor型男最愛的品牌,包括and wander、Descendant、Mountain Research,唔只賣衫褲鞋襪袋,仲有outdoor用品,一定破材!

Accoustic Rock
網址:www.acousticrock.jp

14 | 有得揀薯仔的炸薯條

北海道薯仔出名係人都知,所以「澱粉怪」一定要盡量食多啲!這間位於Parco地庫的薯條專門店最大的賣點是:用不同品種的薯仔,炸成薯條、薯片或薯粒,更可以自選醬汁。

大地のフリット
網址:daichinofriet.com

15 | 著名烤羊肉老舖

「成吉思汗烤羊肉」是北海道其中一樣地道美食,這間店創業超過60年,是不少日本人往札幌最想幫襯的食店之一,喜歡食羊的朋友絕對要試試!

だるま
網址:best.miru-kuru.com

16 | 親子自駕遊最啱玩

這個牧場位於新千歲機場與札幌市之間,好啱開車去玩!牧場提供多項體驗活動,包括榨牛奶、餵牛BB飲奶、整牛油、整雪糕等等,最適合暑假帶小朋友去體驗一下!

酪農体験むらかみ牧場@札幌
網址:murakami-farm.com

《北海道攻略》第四集:札幌繼續買繼續食!二条市場食海鮮!

17 | 名牌Select Shop

店內放了日本及歐洲名牌如Dries Van Noten、Maison Margiela及UNDERCOVERISM等的精選服飾,唔好講淨係去東京先可以買到衫!

GARAGE69@札幌
網址:www.garage69.jp

18 | 北日本最大室內市集

喜歡尋寶的人一定愛逛市集,北海道的市集不多,「Golden Market」是最大型的一個,每年只舉辦2次,每次有超過1,800個攤位參與,出售古著、飾物、玩具、手作等東西。下次舉行日期是2018年10月13、14日,有興趣不妨就時間逛逛。

Golden Market@札幌
網址:www.tv-hokkaido.co.jp/golma

19 | 海鮮、漢堡扒湯咖喱

湯咖喱「Soup Curry」是另一款札幌地道美食,特色是咖喱湯底是稀的,一般都會配雞肶、茄子、南瓜,但這裡卻可以揀海鮮或漢堡扒,比較有新鮮感!

Soup Curry Treasure@札幌
網址:s-treasure.jp

20 | 狸小路買海參做手信

應該是為了應付愈來愈多的中港台遊客而開,睇個樣都估唔會平!

海越@札幌
網址:umikoshi.jp

21 | 二条市場

札幌市內最方便的魚市場,買走又得,即場食又得,雖然選擇唔夠中央市場多,但勝在由電視塔過兩條馬路就到,最啱last一日買完pack好坐車去機場!

二条市場@札幌
網址:nijomarket.com

《北海道攻略》第五集:札幌last call!新千歲機場掃貨!

22 | 繼續掃名牌

另一間札幌市內的select shop,牌子包括sacai man、N.HOOLYWOOD、UNUSED等等。

MaW@札幌
網址:maw-sapporo.com

23 | 大堆頭魚生船

這間海鮮居酒屋賣點是這隻「大堆頭魚生船」,每人1,680円,每位入店的客人都要叫,即是你有5人同行,但只得一人食魚生,佢都會提供一隻5人分量的魚生船,埋單都要畀8,400円!而且每人必須點半隻毛蟹,價值880円,即係就算你唔叫共他菜都位位2,560円!

大漁舟盛り居酒屋 大海物語
網址:www.facebook.com/hunamori.ooumimonogatari

24 | 龍蝦味噌拉麵

Last一集,無理由仲未食札幌最出名的味噌拉麵,不過要食,都要揀碗「有睇頭」的,這碗「極拉麵」,除了叉燒,更有生春卷、及大大隻龍蝦… 頭!(係,只係得個頭,唔好發夢會有肉!)每碗1,280円,但每日設有2個優惠時段,分別係上午11點及黃昏6點,只需880円就食到,不過每個時段只限20碗,真正手快有手慢無。

海老秀 狸小路二丁目店@札幌
網址:www.vegasvegas.co.jp/works/food.php#ebihide

25 | 百幾蚊試做賽車手

就算無駕駛執照,冬天在北海道可以玩雪上電單車,夏天則可以玩小型賽車,最平收費每人2,100円,即150蚊左右,就可以玩5個圈,12個圈都只係3,300円,而假日就會貴少少。

新千歳MOTORLAND@新千歲
網址:ncml.jp/rental_kart

新千歲機場買到最後一刻!

26 |北海道本舖・粟米、蜜瓜… 幾重都要搬返香港!

呢間舖係咩都有,除咗一般一盒盒的餅乾朱古力之外,仲有清酒、拉麵、粟米、蜜瓜等,特別多農作物!

27 | LeTAO・平香港成半!

最人氣的芝士蛋糕,比在香港買平成半,所以個個香港人都趨碼買兩三個返香港!另外,早兩年剛開了另一間朱古力專門店,想試新東西,可以試這一間!

28 |佐藤水產・海產即買即pack上機!

作為香港人最開心的其中一件事,就係香港可以隨便帶海鮮入境,生熟都ok!所以,如果唔想由札幌搬去機場,又或者尾站不是札幌的話,可以在這一間買!(我都係常客,帆立貝、鹽水海膽、三文魚籽都好正!)

29 | Calbee+・食新鮮即炸卡樂B

雖然日本好多地方都有Calbee+,但fans點都會想一食再食,就算唔食都可以買各種限定手信,全部都輕飄飄,唔怕overload呀!

30 |Craft Studio・北海道工藝品專門店

有無試過朋友叫你去北海道買馬油,但你玩到完全唔記得買呢?去到機場仲有得救!呢間除咗馬油,仲有好多北海道的特產,如薰衣草的製品、木工藝品等等,畀小朋友玩的積木好得意㗎!