【自助餐我要！】五星酒店周末米芝蓮點心放題！2小時任食廿款點心！回本鮑魚燒賣任叫｜金鐘飲茶中菜｜
撰文：Moyin 攝影：林志華、Woody
晨早限定！五星酒店周末點心放題
這間曾拿過米芝蓮一星、長駐米芝蓮推介的五星級酒店中菜廳，每逢假日早上9時至11時就會推出點心早餐放題，但其實這點心放題足足推出了5年之久，起初只為酒店住客而設，不為宣傳，所以不為外人所知。
而且作為五星級酒店，這裡裝潢堂皇華麗，座位不多只有88個，因為客量不多，師傅更能做好品質管理。
回本＋精選點心逐樣睇！
雖然這裡的點心放題選擇不算多，只有約22款點心、麵飯及糖水，但不以量取勝，靠靚料精緻點心擄獲熟客的心。例如蝦餃、燒賣、春卷，一律用上新鮮海蝦，鮮蝦味濃。
回本必食鮑魚燒賣皇，用上新鮮蝦，蝦與豬肉比例1:1，蝦肉鮮美，份量慷慨，能保持傳統結實的口感之餘，也充滿鮑魚鮮香！
燒賣控更可以食埋臘味魚蓉燒賣，結實富魚味，絕無魚腥，配上油潤臘腸更惹味。
特製的叉燒包， 是餐廳的得意之作，叉燒包外皮加入豆漿，帶陣陣清香豆香，，有新意之外更軟腍香甜；叉燒餡內加了梅菜更添口感和鹹香。
彩虹蝦春卷即叫即炸，外皮不但薄脆，連內裡的鮮蝦也爽口富鮮味，配上特製的柑桔汁，酸甜開胃！
也有坊間酒樓近年少見的荔蓉芋角，炸得鬆化乾爽，芋泥香滑，入面還有豐富海鮮如帶子粒、鮮蝦、豬肉，為
軟腍的芋泥添豐富口感。
想飽肚一點，招牌菜金葉庭炒飯也是回本菜，平日單點也要$220，蝦肉、鮮蟹肉、龍脷柳、炸瑤柱，點睛處在於加入甘香的鹹蛋黃及香噴噴的薑米，叫人吃到停不了口。
甜品方面，必食這個芒果布甸，芒果味超香濃！師傅說，秘訣在於加入芒果雪糕，吃起來香甜濃郁，不用加花奶也超 Creamy！加上懷舊的心心造型，童年回憶返晒嚟！
廿多款點心意猶未盡的話，也可另外加錢柯打點金箔蝦餃、瑤柱海皇灌湯餃等矜貴點心。
價錢方面，雖然這頓點心早餐放題索價$288/位，看似不便宜，但平日在這裡飲茶，單點一籠點心也要$78-110，加上酒店級招待，老實說，吃幾款點心都已回本。而且點心菜單會定期更新，可能每次來都會有驚喜。
金葉庭
地址：金鐘道88號太古廣場香港港麗酒店大堂低座（顯示地圖）
電話：2822 8870
點心早餐放題供應時間：星期六、日及公眾假期 9am-11am
價錢：$288/位 （茶芥$28起/位）
備註：設加一，收信用卡
延伸閱讀：
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
