【日本住宿】日本7-11設民宿自助check-in機!24小時都可拎鎖匙

日本

廣告

【日本住宿】去日本玩,又想同時體驗一下「住喺日本」嘅感覺,又或者想減輕旅費嘅時候,好多人會選擇住民宿。雖然想試,但好多日本民宿經營者都係唔太識英文嘅日本人,對於唔識日文嘅人嚟講,book房真係一大難關。隨住日本即將立法批准民宿經營,終於出現解救外國遊客book民宿嘅服務啦!

撰文:Carmen | 圖片來源:相關機構、網絡

日本7-11即將提供24小時民宿check-in服務

日本7-11與日本國內最大規模嘅旅遊公司JTB合作,於2018年6月15日起,喺東京都內部分7-11店舖內設置自助check-in機,名為「Convenience Front Desk 24」,令唔識日文,或者有「尷尬症」嘅遊客可以自行check-in民宿拎鑰匙。

自助Check-in流程

根據日本新民宿法,喺業主不同住嘅情況下,於旅客正式入住前需要進行「登記入住名冊」同本人確認。因此,自助check-in時於輸入民宿預約號碼後,仲需要輸入旅客嘅個人資料、拍攝passport身份圖片等等登記程序。謹記所有同行者都需要進行登記!

流程:1) 輸入民宿預約號碼>2) 登記入住名冊>3) 拍攝passport照片>4) 現場拍攝個人照>5) 確認長相一致
※同行者由step2開始進行登記!

登記完後就完成check-in啦!完成後畫面會出現一組密碼,住客可於相應位置拎取民宿鑰匙,全程唔使同業主面對面講嘢交收鑰匙!連還鑰匙都可以用呢部機搞掂!

服務細節

「Convenience Front Desk 24」現時提供繁體中文、簡體中文、英文、韓文、日文5種語言選擇,更設置咗24小時多種語言對應嘅call center畀check-in時遇到疑難嘅旅客進行支援,咁就真係安心又放心啦。

7-11自助check-in機將於2018年6月15日至10月期間於50間7-11店舖進行服務試行,以面向2020年東京奧運為目標希望擴展至1,000店舖。