星級獲獎火鍋！北海道直送海鮮配骨膠原湯底＠Dining娜

一年四季都鍾意打邊爐嘅火鍋控，對火鍋食材都有高要求，而且愈食愈嘴刁，識食梗係食攞獎嘅星級火鍋店啦！火鍋界星級代表不倒翁一直被譽為係靚牛同矜貴海鮮嘅專門店，最近就啱啱得到中國手機App《大眾點評》獲選為《黑珍珠餐廳指南2018》，好有認受性㗎！今季推介大家，尤其是貪靚嘅女生，食兩款 骨膠原湯底 ，配埋北海道直送靚海鮮，滋潤養顏！

火鍋必食！罕有矜貴靚海鮮

點解不倒翁係火鍋界嘅星級代表？皆因店主謝生同多間活海鮮、優質肉食供應商好熟，佢哋提供嘅活海鮮都係時令肥美嘅貨色，巴閉程度甚至喺休漁期依然有好多靚海鮮供應。春夏季節，謝生大力推介來自日本北海道嘅金目鯛、舫鮄、赤鰷，除咗金目鯛，其餘兩款都屬於罕有海鮮配料，喺一般火鍋店或者日本料理店都唔易食到㗎！

話明海鮮係呢度嘅主打，多款當造活海鮮、矜貴罕有嘅魚類、海產每日直送，人氣之選有海杉斑、法國生蠔、加拿大象拔蚌、南非鮑魚、澳洲龍蝦等，既新鮮而且份量十足，活海鮮鮮甜度絕對同雪藏貨無得比，海鮮迷必食！

店主推介春季時令 骨膠原湯底

冬天宜進補，不過到咗春天，店主建議打邊爐口味應該轉為清潤，所以推介時令嘅雪梨海底椰豬骨鍋，因為今期嘅水果、瓜菜當造又清甜。

如果想成班女仔一齊打邊爐，我Dining娜就推介揀兩款 骨膠原湯底 ：涼瓜大魚頭鍋或者涼瓜龍躉頭腩鍋，涼瓜清熱，大魚頭、龍躉有魚香味之餘，最緊要有豐富蛋白質、膠原蛋白，養顏必點，女生一定大愛！

嚴選刁鑽靚牛、火鍋配料

嚟到不倒翁，一定要食勻兩大必食孖寶：海鮮＋靚牛。講到牛，店主一定會介紹大家食手切脊位肥牛，因為比起其他部位，呢個位特別嫩滑而不失咬口。

如果你係嗜牛族的話，六月後除咗點招牌手切脊位肥牛之外，仲可以揀選英國皇室御用肉食品牌Donald Russell嘅草飼牛、野生山雞、鹿肉作為火鍋配料，連皇室都食，質素肯定有保證啦，期待喎！

勇奪《黑珍珠餐廳指南2018》殊榮

今年，不倒翁勇奪由中國極具認受性嘅手機App《大眾點評》頒發嘅《黑珍珠餐廳指南2018》。《黑珍珠》係由內地業內美食專家由700萬間餐廳中點評、篩選，最後挑選330間餐廳上榜，好有代表性！

不倒翁中日火鍋料理

尖沙咀店：彌敦道63號iSquare國際廣場23樓（2152 1166）（顯示地圖）
佐敦店：佐敦道23-29號新寶廣場2樓（3526 0918）（顯示地圖）
銅鑼灣店：勿地臣街1號時代廣場食通天11樓1101號舖（3102 9363）（顯示地圖）
Facebook：不倒翁中日火鍋料理 Budaoweng Hotpot Cuisine