姊妹
姊妹

見姊妹其實比見家長更重要@小盛女

博客

廣告

「下星期BBQ我諗住帶埋阿Mike出嚟呀,話晒都拍咗拖咁耐。」我說。

「你終於肯帶佢出嚟嗱?係咪諗住結婚喇?」好姊妹Crystal笑說。
「黐線,未咁快啦,係都你同Ricky先!」我說。
「哼!未過我哋姊妹呢關佢唔好諗住娶到你呀!」另一個好姊妹阿花裝腔作勢地說。
「知你哋錫我喇,嘻嘻。」我說。

情侶拍拖一段時間後,通常都會帶另一半和自己的好姊妹/好兄弟出去玩,女人去見男友的兄弟們通常也不會有甚麼問題,只要保持笑容,不要黑面港女格,通常都過關,但男人去見女友的好姊妹卻不同,因為每個姊妹心裡都會有把尺,她們會像考官一樣,暗暗評核這個男人究竟有沒有資格當閨密的男友/老公,分分鐘比未來外父外母更嚴格。

「袋炭同啲飲品咁重,等我嚟拎啦。」樂於助人加一分。
「我燒咗雞翼畀你食呀,燶嗰啲已經批走咗。」細心喎加一分。
「飲唔凍可樂好無呀?你M到唔好飲咁多凍嘢。」體貼呀加一分。
「大家夠唔夠嘢飲?我出去買吖!」任勞任怨又加一分。
「從前有三隻蝦,蝦蝦蝦。」幽默搞爛gag再加一分。

其實姊妹們都是幫幫眼,看看這個男人對你好不好,大部分也不會為難他,而與姊妹相處的秘訣是要主動幫忙,不要大少爺般齋坐等食;對姊妹好之餘對女友要更好;不能太靜完全不說話當宅男,也不能說太多話當鋒頭躉;即使有人笑/串女友也要維護她,簡單來說就是要畀面女友,以上幾點好姊妹們都會一一看在眼內。

為何留好印象給姊妹們這麼重要?因為萬一將來你們吵架,女友一定會向姊妹們呻,那時她們便可以幫忙說幾句好話,例如:「可能大家有啲誤會啫,冷靜啲了解清楚先。」而不是踩多幾腳說:「咁衰,飛咗佢啦!」 還有,將來玩新郎也可能會手下留情。

「今日見到佢對你咁好,我都覺得好安慰,你終於搵到你嘅Mr. right喇。」Crystal突然感觸地說,畢竟從小到大都是她陪我度過情傷,最頹廢的我她都看過。
「如果第時佢對你唔好一定要同我講,我唔會放過佢㗎!」阿花說。
「我已經想像到你結婚嗰日我一定會喊死。」Crystal說。

「到時一定要唱番首催淚嘅姊妹。」我笑說。

「總有天親耳聽到 我愛侶對天宣布
生與死都愛惜我 我要講
我願意誰在乎過 你知道那答案快提示我
總有天找到一個 真的值得我」

《姊妹》楊千嬅

https://www.youtube.com/watch?v=HeqYTlJWr2s