情侶遊澳門|慶生、周年紀念必睇!2日1夜食玩行程懶人包(附生日優惠)
情侶遊澳門|慶生、周年紀念必睇!2日1夜食玩行程懶人包(附生日優惠)

情侶遊澳門|慶生、周年紀念必睇!2日1夜食玩行程懶人包(附生日優惠)

周不時都有朋友問情侶去澳門有咩好玩好食,今次就實實在在嚟個情侶澳門2日1夜完整行程。冇花冇假,可以跟足成個行程嚟玩,剛剛好玩足2日1夜,就算要慶祝生日、紀念日,都絕對會令你BB豬高興!

文:Kassidy|圖:Eric |model:[email protected] Models

情侶 澳門 2 日 1 夜行程

今次行程有齊食、玩、影相,2日1夜可以跟著嚟玩。

Day 1 中午 - 酒店check-in!壽星仔女要留意

去到澳門,落船後第一時間當然係去酒店放低行李,大部分酒店 2-3 點先有得 check-in。如果旅程目的係為咗慶生,記住在 check-in 時出示身分證(或另一半早點通知酒店方面),證明自己是壽星仔女!有部分酒店會免費 upgrade 生日客人。

女朋友一入房間就收到蛋糕一定非常開心!

慶生貼士:打去酒店預約生日蛋糕!

要準備驚喜,當然事前要通知酒店。如果準備去澳門慶生,其實可以在預約酒店後發電郵/打電話到酒店,通知對方一同入住的客人將會在入住當天生日,不少酒店都會預先在房內免費預備生日蛋糕!Check-in 完上到房,就可以即刻畀到 surprise 另一半喇~

蛋糕就唔係老奉要準備,請有禮貌地先向酒店查詢。
去到澳門準備唔切蛋糕,不妨先問問酒店可否幫忙安排。

各酒店生日特別待遇

唔想預訂完先知冇得安排生日蛋糕?記者親自問過以下酒店,佢哋都話可以為生日客人特別安排禮遇,每間酒店的生日準備都有機會不同。生日特別待遇並非奉旨要做,不妨有禮貌地向酒店方面查詢,畀到驚喜之餘,都可以做個有禮貌旅客!

酒店名稱 生日待遇
Grand Hyatt Macau .入住客人可獲生日蛋糕
.Mezza9/滿堂彩客人可預早通知餐廳方面,可獲生日蛋糕、生日帽即影即有一張
永利皇宮/永利澳門 .入住客人可獲生日蛋糕

Day 1 午餐 - 氹仔小鮮肉正宗葡菜

去澳門第一餐,當然要食葡菜!在氹仔北帝廟旁嘅巷仔開業約2年的「Toca小窩」,由葡萄牙老闆打理,特地從家鄉聘請年輕的主廚過江掌廚,食材大部分由葡萄牙入口,保證是正宗葡式味道。餐廳走casual dining路線,食物味道一流,點埋Sangria果酒伴菜,情調更好。更重要的是小鮮肉大廚長駐舖頭,年僅25歲的他自小已開始入廚,因為家族在葡萄牙都是經營餐飲業,煮葡菜駕輕就熟!

年輕的Pedro由葡萄牙移居澳門,主理餐廳菜式。
烤馬介休魚柳 MOP210
用上7隻蛋伴馬介休烹調醬汁,嫩滑重蛋香,魚柳肉質緊致,薯仔加了麵糰帶點煙韌。
葡式烤乳豬 MOP185
自家烤焗的BB乳豬皮脆肉嫩,半肥瘦質地非常juicy,蘸上甜酸醬更加開胃惹味。
餐廳座位不多,如果想去吃午餐就要預早去!

Toca小窩
地址:澳門氹仔客商街31號
電話:+853-2857-6896
營業時間:12:00nn-2:30pm,5:30pm-11:00pm(星期二休息)
交通:從氹仔碼頭乘26號巴士,車程15分鐘
facebook:Toca小窩

Day 1 下午 - 情侶必到影相位!龍環葡韻住宅式博物館

龍環葡韻位於威尼斯人酒店附近,自從建了行人步道後,15分鐘就行到。該區有非常多葡式建築,當中也包含不少博物館/藝術展覽,影相之餘都可以認識澳門歷史,在這邊行1-2個鐘絕冇難度!

呢一帶的葡式建築主要是湖水綠色,提醒女友穿粉紅色衣服,影相出嚟效果不錯!
由龍環葡韻影出去,還可以睇到大部分路氹的酒店。

Day 1 下午 - 玩到尖叫!免費高空滑草場

人造滑草場位於澳門機場附近,坐穿梭巴士到澳門機場再行15分鐘就到,行到上山可以俯瞰澳門機場附近一帶景色。最重要的是這邊有個免費滑草場,大人細路都玩得!每次最多只有五個滑草兜,人多時就需要排隊。

望落其實唔算高,但衝下去的一刻都會有少少離心力!
位於山上的滑草場景色也是一流!

滑草場長約50米,大人一般會比小朋友更難控制,攝影師甚至失去平衡衝去旁邊護欄。雖然草坡不高,但仍然非常刺激!記者與模特兒滑下去的時候也有不自覺尖叫。

這個滑草場用的是假草,所以大人小朋友都可以玩,而且會有工作人員定時澆水,令大家滑得更順暢!
認住呢個入口,行1分鐘左右就會見到滑草場!

大潭山滑草場
地址:氹仔天文台斜路(顯示地圖)
營業時間:平日2:00pm-5:00pm,周末及公眾假期9:00am-12:30pm,1:30pm-5:00pm(星期一休息)
交通:氹仔碼頭步行前往,約20分鐘/由澳門機場前往,穿過金皇冠中國大酒店,乘電梯往9樓,再往前走約10分鐘
注意事項:每個滑草兜最多坐一位成人

Day 1 晚餐 - 人均$300!二人浪漫晚餐

去得慶生/慶祝紀念日,仲食自助餐咁唔浪漫?當然要搵間安靜餐廳同另一半慶祝!情侶行程精選了兩間環境幽雅、不太大負擔的西式餐廳,另一半影相慶生看起來都不會太失禮!

01|正宗意大利菜 - Casa Don Alfonso

Casa Don Alfonso位於新葡京酒店3樓,賣點是食材跟廚師都是由意大利空運到澳門!主打即製 pizza,燴飯也是餐廳另一推介。餐廳原身是 fine dining 餐廳,11月份裝修,搖身一變,成為 casual dining 餐廳,唔使再摸黑食飯。餐廳午餐是採用半自助餐形式,晚餐則是 a la carte,人均$300就可以食得非常飽。記者推介必試 Tiramisu,比一般坊間的 Tiramisu 有更濃烈的酒香,不會太膩,女生們絕對會喜歡!

A la carte 形式可以根據自己的喜好選擇頭盤、主菜、甜品,也可以減少金錢上的負擔!
慢煮牛膝非常軟腍,搭配酸甜燴飯一流!(牛仔膝配紅花意大利飯 MOP280)
最後一定唔可以錯過 Tiramisu!(意大利芝士蛋糕 MOP80)

$120食到!意大利師傅即焗 pizza

要食意大利師傅焗的 pizza,唔使飛去意大利,去澳門就食到。由整粉糰、落材料、放入焗爐,全部都會在餐廳門口附近的 pizza 工作台進行。焗爐溫度高達400度,pizza 只要放入去30秒就可以焗熟,師傅會用轉盤慢慢翻動 pizza。焗完就會立刻上碟,送到客人枱上。謹記要把握時間即刻食,才能食出 pizza 的原汁原味。

Pizza 一焗完出嚟脆卜卜,芝士完全溶化!(番茄水牛芝士紫蘇薄餅 $120)
可以在一旁望住師傅即刻焗。

當奧豐素1890意式料理
地址:澳門新葡京酒店3樓
電話:+853-8803-7722
營業時間:12:00nn-2:30pm,6:30pm-10:30pm
網址:Casa Don Alfonso

02|靚景、食土生葡菜 - Tromba Rija 皇家葡萄餚

旅遊塔是不少旅客去到澳門會忽略的景點,嫌貴又冇乜嘢好睇。但其實旅遊塔塔底有間非常抵食的土生葡菜餐廳,仿農村菜館設計,冇大媽之餘,仲可以望住澳門半島的夜景食飯!平日採用 a la carte 形式都只是 MOP300 – MOP400 一個人,周末會有自助餐,但想食一個慢慢食、唔使走嚟走去的二人晚餐,還是逐碟點比較好。

想要靚景,可以打電話預約時跟餐廳備註,餐廳會盡量安排。
海鮮燴飯非常足料,餐牌上寫2人份,但其實4個人才可以吃完。(燴海鮮飯 MOP560)
非洲雞分量不算少,配搭薯條、沙律。(非洲雞 MOP135)

睇埋日落冇難度!

除了食土生葡菜,呢間餐廳另一個重點是可以望到西灣大橋的日落。餐廳外的位置空曠,所以可以在餐前走出外面影張相。而想望住夜景食飯都可以,只要提早跟餐廳預約,表明想坐靠窗位置,餐廳都會盡量安排!

撞啱日落時間,可以影到成個鹹蛋黃徐徐落下的景色。
叫女友倚著欄杆就可以影到靚景+女友!

Tromba Rija 皇家葡萄餚
地址:澳門旅遊塔會展娛樂中心地下大堂 (顯示地圖)
電話:+853-2896-2878
營業時間:12:00nn-2:30pm,3:00pm-5:30pm,6:30pm-10:30pm
交通:外港碼頭坐「32」號巴士於「澳門旅遊塔」站下車

Day 1 晚上 - 影鐵塔、睇噴泉!

澳門夜景真是寥寥可數,最多夜景睇一定是路氹一帶的酒店。倫敦人就未開冇大笨鐘影,咁就影番巴黎人的鐵塔跟永利皇宮的噴泉,冇錢去歐洲就喺澳門影住先!

冇錢去巴黎影,去住巴黎人影先⋯⋯
永利皇宮噴泉也是不少人會特地去看的景點!

男友必須知!影鐵塔最佳位置

買金光飛航的船飛可以憑船飛免費上鐵塔7樓,但唔係坐金光飛航咪冇得影?男友們可以先記低以下位置,最佳拍攝方式是取個廣角鏡,就可以在平台影全個鐵塔。如果只單憑手機影相,不妨走到對面的金沙城喜來登酒店的行人路,用手機都可以拍到全座鐵塔+女朋友。而鐵塔對面會有個大草地準備開放,到時絕對跟法國巴黎的鐵塔非常相似!

由呢個平台影上去尚算不錯,但一定要有廣角鏡。
以下位置都可以影到巴黎人的鐵塔!

Day 2 早上 - 食完早餐開始影相!teamLab

一般酒店都會包自助早餐,所以就不作介紹。食完早餐就去澳門美高梅影 teamLab,幫女朋友繼續影相!朝早時段的 teamLab 人比較少,影相都唔使迫餐懵。記住著淺色衫去影相,咁就可以影到 teamLab 最靚的一面!

去 teamLab 影相最緊要著件淺色衫。
記住著平底鞋入 teamLab,否則不能進入呢個位置影光球!

澳門 teamLab 詳細介紹:開幕直擊!澳門teamLab展覽 5大打卡熱點+購票攻略

澳門teamLab未來遊樂園
日期:2017年12月1日至2018年2月28日
地點:澳門美高梅展藝空間
時間:1:00pm-10:00pm(一至五),10:30am-10:00pm(周末及公眾假期)
門票價錢: 普通票價MOP150,澳門居民票價MOP120

Day 2 午餐 - 歡迎拍照!路邊茶檔小食店

路邊茶檔是澳門三盞燈附近的食店,主打小食鹹蛋黃雞蛋仔,粒粒都非常飽滿,而且全部都食到鹹蛋黃,真材實料!奶茶非常幼滑,凍檸茶偏甜。雞蛋仔賣MOP20一件,對比香港的名牌雞蛋仔價錢尚算合理。店舖非常細,只有兩個靠窗座位,但食店未算非常多人,平日中午前往都可以坐在店內慢慢食。

老闆表示歡迎拍照,但有時候店內有不少客人,謹記不要騷擾他人!
雞蛋仔粒粒都真材實料,全部都食到鹹蛋黃!(鹹蛋黃雞蛋仔 MOP20|樽裝奶茶 MOP20)
兩個人一齊影可能比較難,男友可以試著叫女朋友坐在店內,由呢個角度影入去!
凍檸茶未算很澀。(凍檸茶 MOP15)

路邊茶檔
地址:賈伯樂提督街勝樂大廈地下84A-84B (顯示地圖)
電話:+853-2852-3036
營業時間:12:00nn-8:30pm

Day 2 下午 - 再幫女友影靚相:戀愛巷、葡國街

由路邊茶檔行去戀愛巷大約15分鐘路程。成條街都是粉紅色葡式建築,一早是不少人 Ig 必打卡的澳門景點!裡頭還有一間戀愛電影館,全部都是七彩的電影椅,影完相睇場戲都不錯!而在戀愛巷附近的大關斜巷有不少塗鴉,影完戀愛巷可以行埋過去影相!

戀愛電影館門外也是影相好地方,不妨攞 wide 少少影多啲背景。
在戀愛巷影相,set 腳架都冇問題,但遊人非常多,快快手影完不要阻到其他人啊~
大關斜巷內的葡國街商店,門外有非常具特色的塗鴉。
再行落少少都有其他塗鴉。

戀愛電影館
地址:澳門戀愛巷13號 (顯示地圖)
電話:+853-2852-2585
營業時間: 售票處10:00am-11:30pm,電影資料室 10:00am-8:00pm,周一休館
facebook:戀愛.電影館Cinematheque.Passion
交通方法:從港澳碼頭乘3/3A巴士,於「議事亭前地」下車,步行約10分鐘

Day 2 下午茶 - 食埋豬扒包回港!

影完相有少少肚餓,去埋大三巴下面的世紀咖啡食個厚蛋豬扒包就剛剛好。屬於官也街世紀咖啡的分店,餐廳座位只有6-7個,但下午茶時段去的話,人未算多,除了豬扒包外,咖啡、鹹牛肉厚多士也同樣出色,食埋呢餐就可以準備回程。

蜜糖芥末豬扒厚多士 MOP32
澳門 情侶 行程 2日1夜
炭燒咖啡MOP20 ,奶茶MOP18

世記咖啡外賣店
地址:新馬路賣草地里7-15號長信大廈地下 (顯示地圖)
電話:+853-6377-9664
營業時間:11:00am-7:00pm(星期二休息)

生日優惠:船飛$259來回!

一般生日優惠都只會提供予本地人,而這個船飛優惠就是香港人都可以用到!坐金光飛航來回只需要$259,但要注意船票只限一日前或即日購買,怕冇飛都係畀多少少錢預早 book 定船飛/套票。

船飛 $259,生日人士最多可以買2張!

金光飛航生日優惠
網址:金光飛航
優惠期:2018年1月1日至2018年6月30日
(2018年2月16日至2018年2月19日 和 2018年3月30日至2018年4月2日除外)

情人節澳門套票

今年情人節踩正平日跟新年前夕,要請假去兩日一夜其實唔容易。有酒店都會提供一啲情人節套票,情人節前夕就可以去住,唔使特登請假去澳門,但價錢當然不是一般去澳門的平價。

澳門瑞吉酒店情人節套票

呢個套票會包香檳及覆盆子松露巧克力蛋糕迎賓禮品,如果在情人節當日入住,仲可以在「雅舍」食情人節晚餐,又會延遲checkout,瞓到晏一晏都得!不過呢個套票有效期就只由2018年2月9日去到15日,仲要最少一天前預訂。

平時住 St. Regis 已經唔平,今次呢個套票會包兩張單程豪華位船飛,又包埋晚餐,想畀個驚喜情人節另一半算是不錯選擇。

澳門瑞吉酒店情人節套票
價錢:酒店套票每晚由HK$2,988起,以二人入住計算(未包含15%稅項)
預訂網址:瑞吉浪漫之旅

最新吃喝玩樂資訊