耐過行出禁區 拖累乘客罰錢! 香港機場等行李 愈來愈慢之謎 @杜遊珍
耐過行出禁區 拖累乘客罰錢! 香港機場等行李 愈來愈慢之謎 @杜遊珍

耐過行出禁區 拖累乘客罰錢! 香港機場等行李 愈來愈慢之謎 @杜遊珍

你有無試過,開開心心去完一趟旅行,返到香港衰收尾所有好心情都被破壞晒,原因竟然係因為等行李等勁耐?我諗,唔止阿珍一個人試過囉!

文:杜遊珍

香港機場 行李運送排名急跌

香港機場負評多已經唔係新鮮事,都唔好提竟然將禁區變做IFC咁得番貴價名牌店嘞,最正中港人要害,係要香港人久等吖嘛!香港人出名無耐性,要開開心心去完旅行嘅港客圍著行李轉盤呆企撳手機等行李,實在是大罪!Skytrax每年調查嘅「全球最佳機場」排行榜,在運送行李方面的評分,香港機場由2015年排名全球第2急跌至2016年排第8,等行李等到火滾,絕對唔係老屈!

香港機場 行李
阿珍聽過最合理嘅「等行李愈來愈耐」原因,係因為海關太快、e道太方便!

小齊鬧爆 等行李等到發火

嬲嬲嘅唔止普羅大眾乘客,連任賢齊早前都在微博發火,暗串喺香港機場等咗一粒鐘行李,而且不是第一次,籲機場「要加油」或者增加人手!發文翌日,小齊仲收到機管局親自電話問候,最終小齊都打圓場話自己唔應該未了解就發火,不過佢就無刪到post囉!

「等了一個多小時,起飛不準時就算了,天氣、流量管制等原因可能可以解釋!但行李⋯⋯香港機場要加油了!請多點人手,多創造就業機會!不然挺失禮的!」

小齊9月由昆明返香港時,等行李等到在個人微博發火,呢單料都上晒娛樂版㗎!

除損失時間 最嬲係要蝕錢

除咗小齊忍唔住投訴,阿珍身邊有不下一個朋友試過,因為等行李等得太久,錯失尾班車要改坐兜更遠路的機場巴士甚或局搭的士,亦曾聽聞有個客因為等極都等唔到行李,遲過12點先出到禁區,還遲咗Wi-Fi蛋被罰多一日租金!無情情唔係自己嘅錯但要罰錢,唔嬲就假!

我估無人會諗到行李延誤,間接得益者唔止的士佬,仲有Wi-Fi蛋公司!

網民埋怨 等到天荒地老

好多網上討論區都討論過點解行李會愈等愈耐,有人歸咎機場愈來愈多廉航阻礙了行李運送效率,但亦有心水清機場職工爆料,勁遲出行李終極原因,係因為唔夠人手做「地牢」(即係行李落機後運回大樓的處理部門),人手不足加上新增了中場客運廊,盡做都做唔切。

不少網民都覺得等行李問題愈來愈嚴重。(來源:LIHKG)
有自稱在機場工作的網民解釋「地牢」工作及延誤原因。(來源:LIHKG)
另一原因是若果飛機不用空橋或北衛星,行李要由車運送到大樓。(來源:地勤仔fb

機管局新出 不用呆等行李牌

回應久等行李的指控,香港機場最近推出全新服務「行李通」,將RFID技術結合要畀錢買的行李牌,售價分為普通版$30及皮革版$90,各大新聞網都直抄press release話只要將行李牌跟手機App連接,行李到埗收到通知,就可以「不用呆等行李」!阿珍睇完新聞搲爆頭,點解加個行李牌可以唔使呆等?行李會出快咗咩?

機場的「行李通」廣告,哈!
新App可告知行李在哪條輸送帶吐出及提供到埗提示,可以放心去開大唔使呆等行李lu~

南華早報:呆等要持續 最少18個月

阿珍日前更在SCMP睇到一篇報道,行李延誤情況最嚴重嘅,主要係用緊中場客運廊嘅航班(包括香港航空同HK Express),原來機場剛在暑假才開始興建長達2公里的行李輸送帶連接主大樓及中場客運廊,預計要起一年半,即係要18個月後先有機會改善?OMG!

中場客運廊新增的登機位,全部都要靠車將行李送回主樓再處理。
行李部工作辛苦,所以離職率高。(來源:Gettyimages)

機管局:96.6%行李 40分鐘內送達

報道中仲提及,機場的處理行李能力,原來分最快送達及最遲全部送達:2016/17年度,首件行李在20分鐘內送出轉盤,平均達成有96.8%;至於在40分鐘內完全送達行李的比率,原來都有96.6%,照咁講,小齊等足一小時,即係嗰不幸嘅3.4%囉。

想件行李出快啲,以前還有last in-first out呢支歌仔唱,即係拖到最遲先check-in,但風險好大,咪亂試!

等行李 4件不應做的事

除非你無寄艙行李,在轉盤等行李是無可避免的事,以下4個Don’ts,各位千祈唔好做,見到別人咁做最好避之則吉,不然令人燥底之餘亦眼火爆!

機場行李大堂,阿珍遇過不少奇異見聞!例如呢一則廣告,比起之前「空姐ASS」更震撼!

01|行李車超越黃線😡

久等行李已經夠燥,見到港人大陸客將架行李車片埋嚟再隊入黃線,立即無名火起!最憎有人愈行愈前,遮擋其他人睇行李轉到未,好心,拜託,文明啲好唔好!

請勿超越黃線呀唔該!

02|逼晒喺轉盤出口位😡

其實阿珍真係唔明,行李轉盤咁多位可以攞行李,偏偏大家都好鍾意逼在行李由地牢升上嚟嘅出口位,講真,等咗咁耐,都唔爭在呢個身位啦!

呢個出口位,最好留番畀轉盤職員企,因為機場有職員避免篋疊篋,免生意外。

03|即搣行李Barcode😡

即使已經攞番行李,行李篋上的Barcode都唔應該立即搣,雖然香港好少幫乘客核對行李,但外地有機場要對清楚先畀你帶走個篋,最起碼過咗海關先搣都唔遲。

篋有相似,萬一發現攞錯篋,個貼紙仲可以幫你trace番物主!

04|勿在路中心分贓😡

阿珍都知大家去旅行好開心買好多嘢,返到香港立即分贓拎返屋企最直接方便,但可唔可以唔阻住行人通道呢?其實行李大堂都有好多位置可以唔阻別人㗎喎!

畀條生路行下好嘛!

下一頁:6大常問行李物品Q&A | 腳架 長傘 BB車 寄艙 抑或手提上機!

最新吃喝玩樂資訊