國泰自嘲因航|facebook高汁post+會籍積分加碼 形象救亡大行動
國泰自嘲因航|facebook高汁post+會籍積分加碼 形象救亡大行動

國泰自嘲因航|facebook高汁post+會籍積分加碼 形象救亡大行動

經常被抨擊「管理不善」的國泰航空,最近在AirlineRatings.com網站發表的最新排名由2017年的第4跌至第9位。雖然國泰服務有時真係幫唔落,但係,你真係會因為呢個榜被影響?有直航會唔搭咩?

撰文:杜遊珍

國泰連環排名下跌 係不爭事實

今次呢個來自AirlineRatings.com的排行榜,以安全紀錄、乘客評價、航隊機齡等因素評定,結果國泰由第4跌落第9位。睇埋年中Skytrax發表的最佳航空公司排名,國泰亦由第4跌落第5位。因航連環下跌,阿珍覺得fair㗎!講真,乘客近年嘅投訴不無道理,個飛機餐真係使唔使咁慳皮呀?相比其他航空公司不斷改進,國泰又真係有好大改善空間嘅。

Google trend搜尋「因管理不善」,epic!

去布吉要轉機 真係會考慮?

但再睇番個榜,第一、二位分別係連續5年排第一嘅新西蘭航空同澳洲航空(Qantas),基本上如果唔去澳紐嘅係唔關事!查實AirlineRatings.com呢個網站,公司係base喺澳洲柏斯嘅,所以你明咩叫排名未?個榜唔係一定畀香港人睇㗎!至於第三位新加坡航空,的確係好好坐,不過,如果去布吉、沙巴、越南,你都唔會考慮轉機啦!去澳洲、馬代或者歐洲先會考慮!

新航最新公布嘅double suite可以將兩個頭等床位變成雙人床,闊落過日本啲商務酒店,真係冇得輸嘅。(圖片來源:新加坡航空)

排名大跌 優質航空失蹤咁點計?

講番個排名,比國泰排名高嘅仲包括維珍澳洲、維珍、阿提哈德、全日空同大韓,都實至名歸嘅,機隊同服務都保持到水準。相反在其他排行榜有不錯評價嘅阿聯酋、卡塔爾竟然消失,阿珍都就有點搲頭。

新西蘭航空推出的經濟艙Skycouch,可以加錢買多個位打平瞓,連經濟艙都有創新服務,抵讚。(圖片來源:新西蘭航空)
2018最新排行榜剛剛出爐

關公改善形象工程展開

雖然面對內外多番抨擊,國泰近日在facebook上打緊一仗,似乎想在網上洗底,改善因航形象。第一波是國慶假期時趁快運冧檔立即行動,幫助乘客改航班以免打亂假期,又冇托價賣貴飛,有人臨時改搭國泰去大阪只係收$2,000,呢一仗入位快而準,阿珍都想問下國泰公關係咪內部有新血加入咗!

快運冧檔,國泰成功入一球。

以上一條帖文,引來不少網民回應,真心粉絲撲出嚟讚返CX,好多年未見過了!節錄如下:

仲引長期客戶發聲支持。
網民懷疑換咗fb admin。
但始終仲有不少haters。

因航雞卷玩自嘲

快運冧檔一役之後,CX facebook都有啲耳目一新嘅感覺,例如會識得自嘲,唔再離地高高在上,就好似早前搵晒記者試飛機餐宣傳台北航線有番熱餐派,在面書上特登無hard sell「我有得派番熱餐喇~」,反而兜個圈講,成功避開一觸即發嘅公關災難!

唔硬sell台北航線派番熱餐,呢個feed仲落埋 #因航雞卷 hashtag,我唔信以前嘅管理層會批囉!

中秋同大家玩燈謎雖然冇乜engagement,但唔再玩離地brand identity,講番facebook用家的相同語言,係一大進步呀!

Marco Polo得失短途客 改制救亡

除咗改變facebook策略,CX仲知錯能改箍客!好多人分析過國泰死因:管理不善、賭油輸錢、更新機隊大落後等等,其實計錯數,仲有去年改制嘅Marco Polo。Brand loyalty好緊要,去年國泰大刀闊斧將Marco Polo計分方法大改,結果玩死自己,以前一年飛兩次來回短途都仲保得住張綠卡,去年新制要飛足10次,結果將呢班客近乎踢走!

綠卡會員都只不過可以優先登機咁大把,你都唔願留呢班客,個個咪去晒坐廚叉同廉航囉!

唔止綠卡會員無得留低,尊貴的DM客在去年新制都表示極難保留會籍,一年內要坐商務來回東京24次喎!新制日前剛剛公布,綠卡會員終於回復來回兩次台北都keep得到張卡,雖然要升上去DM一樣咁難,但唔知挽唔挽回到乘客嘅loyalty呢?

Marco Polo新制最大改變是綠卡會員門檻,一年兩程短途就keep到。

下一頁:國泰飛台北新飛機餐 4款熱餐任君選擇

最新吃喝玩樂資訊