鞋痴注意 | 日系人氣鞋店、校服單品登陸香港＠Miss Sunny

Oct 4 2017

（Presented by SHIBUYA109）

Photo：Yee

10月天氣開始涼，又有藉口為衣櫃換季喇！自從2015年 SHIBUYA109 登陸香港後，已經可以滿足到一班經常專程飛東京掃貨嘅朋友，雲集12個日系品牌包括多個女裝服飾、女裝鞋、手袋、飾物、內衣等，通通都係女生們嘅血拼目標。

最近，更有兩大初次抵港嘅日牌進駐 SHIBUYA109 ，分別係女鞋品牌RANDA同日系校服CONOMi，喺東京同澀谷都屬於人氣之選，嚟到香港已經俘虜唔少鞋痴同鍾意日系校服主題設計嘅女生！

人氣鞋店、日系校服進駐

RANDA 喺日本好受 OL 同年輕女生歡迎，除咗有多元化嘅高踭鞋、短boot 同平底款之外，設計舒適亦係品牌其中一大賣點，多個款式都特設鞋內軟墊，幫助卸走腿部壓力，即使企足全日或者長時間走路都一樣舒服。有部分設計亦加闊咗腳掌位，絕對係前腳掌較闊女生嘅恩物。

大部分日本女裝鞋只得大、中、小碼，但係 RANDA 另有 LL 加大碼，即係相等於 41 號，連大腳板女生都照顧到。佢哋嘅價錢更係緊貼日本售價，一般都係$400-$600，鞋痴想買鞋實在唔需要出走東京！

旗艦店位於原宿嘅 CONOMi，以日系校服為服飾主題，半截裙、恤衫、手提包同襟章、煲呔等配飾設計有型又易襯，質地亦好厚實，全部都可以作為獨立或mix & match嘅fashion items。

雲集 12個日系品牌

SHIBUYA109 內嘅12個日本品牌，例如SLY、NICE CLAUP、WEGO TOKYO，甚至內衣品牌une nana cool，都係熟悉嘅牌子，另外仲有Ank Rouge、Secret Honey等香港其他地方搵唔到嘅日牌，最欣賞佢哋無論係種類、款式設計，抑或路線定位都非常多元化，我Miss Sunny就算相約唔同口味嘅閨密一齊shopping，大家都一樣啱睇，SHIBUYA109可以話係女生嘅一站式購物熱點！

WEGO TOKYO喺東京已經被喻為budget buy嘅天堂，價錢大眾化，數十至$100、$200都有交易。風格走原宿系路線，款式比較fancy，顏色亦相當colorful，除咗fashion items之外，仲有accessories，好似頭飾、趣怪眼鏡，仲有雪糕、水果等造型嘅手機套、散銀包等，款式好吸睛！而且大部分都係幾十蚊為主，可以毫不猶疑地買買買！

手袋及配飾品牌Samantha Vega嘅設計以適合OL的斯文款式為主，每款手袋都有多色選擇，除咗黑、白色之外，亦不乏粉色系手袋。另外，品牌亦有充滿玩味、形象鮮明嘅設計，平時去街或襯party look一流！