旺角發現 港版Isaac Toast !記者試食: 50%似!止癮食住先!|旺角食乜好|
旺角發現 港版Isaac Toast !記者試食: 50%似!止癮食住先!|旺角食乜好|

旺角發現 港版Isaac Toast !記者試食: 50%似!止癮食住先!|旺角食乜好|

幾個月前韓國名物Isaac Toast來港開Pop-up,引起排隊人潮。對於Isaac Toast快閃來港,一眾fans都話未夠喉,最近行過旺角,竟然發現這間小食店,用牛油、鐵板煎麵包,再夾煎蛋、椰菜做多士,似足韓國Isaac Toast喎!究竟這件 港版Isaac Toast 同韓國有無關係?有幾似?好唔好食?記者即刻踩場試食點評一下。

韓國、台灣啟發 自創 港版Isaac Toast

一場來到,當然要先問老闆,究竟同韓國Isaac Toast有無關係?答案是沒有的。老闆何先生指,因為他和女朋友特別喜歡這種台灣、韓國早餐店流行的半煎烘三文治,又覺得香港大部分小食店只賣魚蛋、燒賣不夠個性,所以就受到啟發,決定參考當地做法,再自創這款 港版Isaac Toast ,作為店子的主打小食。

醬汁豬扒吐司 $33

逐樣數!港版Isaac Toast有幾似?

問完這件 港版Isaac Toast 的身世,一於跟老闆去廚房睇製作過程,數下同韓國Isaac Toast有幾似。

1.鐵板牛油煎

Isaac Toast的最大特色是用牛油在鐵板上煎香麵包,這方面店子可以說是跟到足。大大磚牛油在鐵板上輕壓再打圈,放上麵包煎香兩面,而且每轉一邊都會再補牛油,比韓國Isaac Toast來港Pop-up時只輕印牛油,明顯慷慨得多。

大大嚿牛油在鐵板上打圈。

 

無論煎麵包、雞蛋和豬柳都是用牛油煎。

 

2.方形粟米煎蛋

輪到Isaac Toast第二特點,方形粟米煎蛋,這件 港版Isaac Toast 都有。正方形煎蛋模具放於鐵板上,倒入蛋漿再加粟米煎,煎蛋的Size適中,惟略嫌粟米唔夠多。

粟米粒比較細碎伶仃

3.麵包塗蜜糖醬汁

韓國Isaac Toast除了用牛油煎麵包,更會在麵包塗上秘製的蜜糖醬汁,這個步驟, 港版Isaac Toast 也有做。不過韓版的味道有點像沙律醬的酸甜,這件港版就比較似BBQ時麵包搽蜜糖的味道。

4.醬燒豬扒做餡

有食過韓國Isaac Toast的,都知道當地的招牌配料是MVP醬汁豬柳,早前香港Pop-up店竟然無!Fans大嗌失望之餘,仲話食腿蛋治唔值!

這間小店的 港版Isaac Toast ,就將這款人氣配料複雜出來,大大片自家製的豬柳,同樣在鐵版上煎香,豬肉餡還夾雜少許葱花,味道似韓式烤肉,鹹中帶甜,算幾惹味。

豬柳有大半塊麵包般大,變相幾乎啖啖都食到豬柳餡。

 

豬柳內有葱花,味道更豐富

 

5.無酸瓜、椰菜絲偏少、醬汁不同

輪到其他配料,這件 港版Isaac Toast 和韓國的一樣,有椰菜絲和芝士,不過目測所見,椰菜絲份量未及韓國多,放入後三文治亦未見有當地的澎湃效果;而韓版有的酸瓜片,這裡也欠奉。

襯煎蛋還熱時放上芝士,吃的時候剛好半溶。

 

椰菜絲不夠韓版般澎湃

 

而在醬汁方面,這件 港版Isaac Toast 和韓國有少許分別,不用韓式醬汁,改用芥末黃色、酸酸甜甜的醬汁代替,令整體味道較為輕怡,酸甜的味道亦可中和牛油麵包、豬柳的油膩。

醬汁自家調配,酸味味幾醒胃。

 

記者試食:50%似!可以暫時止癮

即刻試食!記者本身食過韓國Isaac Toast,亦係狂粉之一,試食完這件港版,有以下結論:賣相和配料跟得頗足,尚算合格。豬柳最值得讚,口感和味道都做得似當地;麵包頗大件,食落和當地一樣飽肚,也有牛油鹹香。

頗大件,女生食一件已經飽晒。

不過都有自家特色,欣賞店子自家調配的酸甜醬,食晒全件都唔覺膩滯;至於可改善的地方,麵包煎得未夠徹底,邊緣位置吸收不到牛油,還有些少白麵包狀態,未夠焦香;椰菜份量可以多點,增加口感,有埋酸瓜就更完美。

麵包的邊位煎得未夠香

價錢方面雖然還是比韓國貴(當地賣港幣約$22),但對比鄰近的澳門店、和上次香港Pop-uo店都稍平,所以都算合理,食得過。一句到尾,合格有餘,飛唔到去韓國都可以食住先,暫時止下癮。不過最好就梗係齊齊集氣,希望韓國Isaac Toast來港開分店長駐啦!

Isaac Toast 2.0 厚切炸魚柳多士

除了醬汁豬扒多士,店內還有火腿扒及煙肉多士,最震撼的要數這件巨型魚柳多士。厚切的魚柳即叫即蘸麵包糠炸,再同樣用Isaac Toast的造法,製成多士。夾入魚柳之後,多士變到極厚,女生一啖未必咬得晒。魚柳Juicy熱辣辣,配牛油多士、煎蛋,好香口。

魚柳扒多士 $30

 

魚柳扒即叫即蘸麵包糠再炸,保證熱辣辣。

 

厚切兼炸到金黃色的魚柳,食落外脆內軟。

同場加映 炸物拼盤+解渴特飲

店子除了 港版Isaac Toast ,也兼賣即叫即做的炸物小食,包括用雞髀肉做的炸雞球、魚手指、雞軟骨和天婦羅炸蝦等,想一次過試齊,可以來個炸物大拼盤,有齊7款炸物,樣樣都香脆滋味。

炸物大拼盤 $48

食飽想解渴,店子就有幾款自家調配的飲品,例如近年人氣的藍色、紫色的天然蝶豆花漸變飲品,有檸檬味和蜂蜜味,飲前搖勻就會變色;也有百香果綠茶、水蜜桃紅茶等。

水蜜桃紅茶、蝶豆花茶(蜂蜜味)、百香果綠茶 各$15

 

飲用前將蝶豆花茶搖勻,睇住佢變色幾夢幻。

 

蜂蜜味會完全變為藍色,飲落有天然的蜜糖清甜。

1366

地址:旺角弼街 60A 舖(顯示地圖
電話:9500 0690
營業時間:12nn – 11pm

延伸閱讀:

最新吃喝玩樂資訊