嗜辣迷注意│火爆辣 川菜干鍋 極級挑戰 ＠Dining娜
四川錦陽嘅名菜干鍋，以麻、辣、鮮、香俱備見稱，一食令人難以抗拒。嫲嫲辣辣店主Ben係嗜辣一族，又鍾意食 川菜 ，於是特意將香港少見嘅正宗 川菜干鍋 引入。呢度嘅干鍋有7款選擇，以海鮮為主，活海鮮全部即日到貨，非常新鮮，係必食之選！如果你都經常OT，咁就啱喇，因為佢哋每晚9:30後全部干鍋特價，最平都只是$78起，一個字，抵！
嗜辣必食 川菜干鍋
剛於今年5月先喺尖沙咀厚福街進駐嘅嫲嫲辣辣，其實早喺深水埗福榮街已經設店，而且佢哋嘅干鍋早已迷倒一眾嗜辣捧場客。
嫲嫲辣辣嘅干鍋用辣椒、花椒、乾椒，以及桂皮、八角、丁香等多達12種材料炒香海鮮或其他食材，香辣風味特別豐富有層次，而且炒得非常乾身，唔會有過油感覺。呢度嘅人氣招牌干鍋必食首選，一定非雜錦海鮮干鍋莫屬！只係$288，就可以食勻5款靚海鮮：鮑魚、蟹、蝦、花甲、東風螺。另外，波士頓龍蝦干鍋同樣屬人氣熱賣，原隻龍蝦大大隻奉上，啖啖肉。
以辣椒、花椒、乾椒等炒香海鮮，香辣味道具豐富層次，一次過食到蟹、鮑魚、蝦、花蛤、東風螺，非常抵食！
7款干鍋之中，有6款係海鮮：雜錦海鮮、波士頓龍蝦、鮑魚、蟹、麻蝦、花蛤，啱晒海鮮辣迷口味！另一款就係肥腸干鍋，一樣咁受歡迎。每晚9:30後嘅宵夜時段，全部干鍋特價供應，雜錦海鮮干鍋只係$198，波士頓龍蝦干鍋更只係$128，最平$78都可以食到花蛤干鍋、東風螺干鍋或者肥腸干鍋，超值！
干鍋炒香後嘅辣椒，絕對係成個鍋嘅靈魂。如果覺得只係食干鍋材料唔夠喉，可以再揀配菜一齊炒，嫲嫲辣辣嘅配菜有60款以上選擇，任你揀到夠為止！
14両嘅波士頓龍蝦分量剛剛好，用辣椒、花椒等乾炒龍蝦，麻辣嘅惹味盡滲蝦肉之中。
干鍋自選辣度 海鮮即叫即劏
由於呢度嘅干鍋即叫即炒，食客可自選5種辣度：微辣、小辣、中辣、大辣、火爆辣，唔食辣的話亦可選紅燒干鍋。至於鍋底，則可以3選1：香辣、麻辣或孜然口味，辣度、口味揀到啱為止。
店主咁鍾意食辣，你估佢食咩辣？原來都「只係」中辣或大辣，嗜辣一族有邊個想挑戰極級火爆辣？
嫲嫲辣辣嘅干鍋全用活海鮮炮製，而且每日新鮮運到，即叫即劏，食到嘅都係最鮮滋味，炒香後尤其鮮甜彈牙。而水煮桂花魚、酸菜桂花魚，都係選用大條新鮮桂花魚，特別鮮甜嫩滑，同雪藏貨無得比。
用新鮮大條桂花魚，肉質鮮嫩厚實；水煮做法刻意減油，但保留多種四川香料，辣度同香麻風味各不相讓。
地道四川風味秘訣
除咗招牌干鍋之外，嫲嫲辣辣亦有多款做得出色嘅地道 川菜 ，包括水煮系列、酸菜桂花魚、孜然羊肉等。味道咁正宗，源於總廚蕭師傅有位四川太太，傳統川菜做法全由太太傳授，難怪菜式極富四川風味，嗜辣達人一定要試試。
羊肉片以四川孜然同辣椒粉醃後再炸，然後加入辣椒乾炒至乾身，孜然香味撲鼻而來。
將三黃雞切成一口大細，將爆香嘅麻香材料醃雞後再炸，咬落去充滿麻香，非常香口。
將茄子切成一條蟠龍鱔，再油炸至外皮香脆，內裡爽嫩，炒香後加肉碎、辣椒，味道樸實而帶點微辣，幾開胃！
嫲嫲辣辣
尖沙咀店：厚福街9號地下J1號舖（2394 0211）（顯示地圖）
深水埗店：福榮街105號地下（2394 4332）（顯示地圖）
備註：設加一，收現金及信用卡。
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
