【煮食神器】開箱試玩！日本 Récolte迷你雪糕機 零失敗DIY雪糕！

撰文：ning 攝影：Fion

的骰可愛 Récolte迷你雪糕機

這部 Récolte迷你雪糕機 ，功能和坊間雪糕機相若，也是插電攪拌式操作，只須將冰桶預先冷藏，倒入雪糕材料，開機就能攪拌成雪糕。除了攪拌用的主機，還有冰桶、外杯、攪拌槳及膠刮匙羹等配件。

雖然機身望落比較的骰，但啡色外杯、粉黃冰桶、粉紅、粉綠的Pastel顏色，望落就如一杯雪糕，即刻添了幾分可愛。

份量剛好 最啱一人獨食

容量方面， Récolte迷你雪糕機 每次可以做大約180毫升份量的雪糕（約一杯或三小球），適合一個人自私食；對於媽媽而言，這個份量對小孩亦剛剛好，唔怕食太多影響健康。

機身小巧，輕身、直筒的設計，變相容易收藏，放入冰箱亦夠慳位。冰桶窄長的內膽，可以減少空氣在攪拌過程中進入冰桶，有助雪糕凝固。操作簡易，連小朋友都做到，可以夏天親子整雪糕。

12款跟機食譜

這部 Récolte迷你雪糕機 會隨機附送一份食譜單張，內裡足足有12款雪糕食譜，包括原味及豆漿的雪糕基底、朱古力口味、水果口味、茶類雪糕及乳酪款式，夠晒多元化，照顧不同雪糕Fans。

落手實測 零失敗士多啤梨雪糕

拆件完畢，即刻試整雪糕！今次記者用士多啤梨雪糕作測試，先將黃色冰桶放於冰箱最少14-16小時。

準備雪糕漿，將士多啤梨、砂糖、牛奶及忌廉混合成濃稠狀，切記材料要夠凍，攪拌時就能加速凝固，亦可將材料拌勻後再稍為雪凍。另外，部分食譜建議使用生雞蛋作材料，目的是產生乳化凝固作用，若怕有細菌風險，省去亦無問題。

於主機裝上攪拌槳，再取出冰桶，放於啡色外杯內，最後倒入雪糕漿，開機攪拌約15-20分鐘。

一次成功！製成的雪糕質感濃稠結實，此時可以用跟機的膠刮匙羹，將雪糕刮下來即食；亦可將雪糕刮進碗或盒內，放冰箱雪至硬身，再舀成球狀。

記者點評：買得過！

試玩發現，這部 Récolte迷你雪糕機 成功率超高，即使是第一次用雪糕機的新手，都成功整到軟滑雪糕。雖然每次製作雪糕前也要將冰桶預先冷藏，而且只能倒入一次雪糕漿，但勝在操作簡易，份量剛好，配件易清洗，機身迷你亦方便貯藏，更可以製作自己喜歡的雪糕口味，絕對買得過。

Récolte Ice Cream Maker迷你雪糕機
售價：$288
銷售點：city’super、LOG-ON、誠品書店