天文臺道8號│ 尖沙咀 新蒲點搵食提案 ＠Dining娜
Photo：Fion
又到Happy Friday！飯敘、gathering約喺 尖沙咀 就最就腳！但係周圍都爆滿，想搵食，梗係要發掘新蒲點，新食廈天文臺道8號有超過10間食店，中、西、日、法、西班牙菜、火鍋、酒吧樣樣有齊，個個禮拜可以揀唔同菜，已經成為我Dining娜最近嘅新據點。嚟緊5月14號就係母親節，無論母親大人係潮媽定傳統媽，都有啱食推介，係時候book定枱喇！
潮食邊爐、蒸氣鍋
香港人真係好鍾意打邊爐，鍾意程度簡直不分季節。天文臺道8號竟然有3間選擇，有潮食邊爐、蒸氣鍋，又有滋潤之選，型人、女生都大愛！
囍鍋蒸氣火鍋專門店
囍鍋嘅獨特之處就係用蒸氣石鍋即叫即蒸點心，熱辣辣之餘，仲保留咗肉汁同鮮味。除咗主打海鮮，呢度仲可以食蒸和牛片，比起一般用火鍋焯更加原汁原味。今期我最想推介$48嘅金箔松露蒸南非龍蝦，不計成本，非常抵食！
酒鍋
呢間以「酒」＋「鍋」為主題，招牌酒鍋就係佢哋嘅主打，夠晒特別！母親節會推出「母親節別注窩心饗宴」，套餐包羅萬有，主角有藥膳美肌鍋（4格湯底包括：藥膳花膠雞、杏汁白肺鍋、四川麻辣鍋、胡椒豬肚鍋），滋補養顏，為靚媽補充骨膠原，凍齡美肌。另外仲有海膽迷你鍋以及招牌安格斯牛頸脊、日本黑毛豬腩肉等；甜品就有黑白朱古力鍋，點棉花糖、士多啤梨食，媽咪肯定sweet到漏。
椰林春天
椰子雞煲係椰林春天嘅必食首選，湯底以泰國新鮮椰子水熬製，香甜清潤，四季啱飲，用嚟打邊爐完全唔覺燥熱。椰子雞煲有原味、竹笙、野生水魚同雲南野生菌4款口味，最欣賞佢嚴選2斤半以下、自家農場飼養嘅文昌雞，皮薄肉嫩，湯底大人細路都絕對啱飲。最近呢度加入唔少泰國菜式，邊打邊爐，邊食泰菜，坊間少見。
味遊日、法、西
日菜、法國菜、西班牙菜，都係港人鍾意嘅菜式，天文臺道8號呢3間食店都不約而同供應多款地道小食，最啱我Dining娜約班閨密嚟歎美食、飲下酒！
八居酒屋
主打爐端燒同下酒小食，不少海產、肉類由北海道、鹿兒島、名古屋、仙台等地直送。大廚不時推出時令燒物，例如鹿兒島鹽燒日本和牛、仙台牛舌厚燒、浜燒日本花蛤等等。最近仲推出半價優惠，每星期嚴選1款菜式半價，每日限定30份（只限晚市），每枱不限碟數，超抵食！
Playa de Papagayo
食西班牙菜，一定唔會錯過地道嘅tapas，呢度提供多達39款，價錢又親民，大部分都係$100以下。食物除咗有地道、fusion菜系之外，仲有分子料理，賣相同味道都相當驚喜！最鍾意佢設有戶外露天座，歎番個休閒嘅weekend brunch（星期六、日及公眾假期12:00nn-5:00pm）夠晒寫意，呢個時段所有食物仲有7折添！
Maison Eight
結合fine dining同酒吧，Esmé餐廳食高級法國菜；Salvatore品嘗美酒，有埋夜晚嘅live music襯托，最寫意不過。外面仲有不少戶外位，可以邊睇維港海景邊歎美食、美酒。
精緻中菜
有時食得多西菜，都想食番comfort food：傳統粵菜。呢度2間中菜分別走新派同經典路線，後者不乏滋補養顏菜式，同愛吃粵菜嘅媽媽嚟食最啱。
景逸軒
除有傳統粵菜、廣東小炒、點心之外，菜式亦不乏有創意嘅fusion意念，食材配料新派，例如法式牛肋骨就係中西合璧之作。
金裝尚品
早前攞咗「最佳婚宴場地品牌」，除咗環境寬敞舒適，食物質素亦一向有保證。佢哋嘅招牌菜脆皮燒鵝、零味精燉湯、生猛海鮮，深受食客歡迎。最近仲推出咗平食晚市三寶，分量會因應人數而作出調整，兩個人食都冇問題。
飯前飯後chill一chill
約人未夠鐘，或者飯敘完唔夠喉仲想繼續吹水，轉場去酒吧或者靜靜哋嘅coffee shop，傾下偈就最好。
Carnival（快將開業）
以嘉年華為主題，唔單止環境設計好靚好夢幻，連飲品、小食都好有歡樂氣氛，尤其是「旋轉木馬」同「摩天輪」兩款cocktails賣相吸引。依家更有happy hour（每日6:00pm – 9:00pm）優惠，雞尾酒、啤酒都係買一送一，帶媽咪嚟飲杯嘢，兒時去遊樂場嘅回憶即刻返晒嚟。
GEDA Bar & Restaurant（快將開業）
GEDA除咗有多部高清大電視，仲可以篤波同埋有近年好興嘅Beer Pong玩，絕對適合成班朋友輕鬆聚會。場內仲有多款小食任君選擇，味道同賣相都好有高級餐廳水準。
Starbucks
想靜靜哋同三五知己傾下偈，Starbucks就當然係不二之選，呢間分店仲特設戶外位，相當開揚寫意。最近新推嘅椰子草莓星冰樂，係將忌廉星冰樂配上椰子同士多啤梨味，甜甜哋好有夏日涼快感覺。
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
