朋友
朋友

搵個可以分享「成功」嘅 朋友 ,仲難過「共患難」@藍橘子

生活

廣告

如果各位每個月都定期約到 朋友 出嚟食飯,真係要好好珍惜呢班朋友。互聯網以及社交媒體,係現今殺死不少友情嘅兇手。

以前,同朋友有一段時間冇見,就想互相update各自嘅生活近況。唯一嘅方法就係約出嚟食飯,就算唔得閒食飯,都會傾個電話,然後……越傾就越想出嚟食餐飯。

但今時唔同往日,生活近況可以直接上臉書睇,想傾兩句可以用WhatsApp,傾電話已經好嚴重先會用到,仲出嚟食飯?咪玩啦,邊得閒啊……

當你遇到困難或者唔開心時,有個朋友會即刻仆出嚟同你傾心事,當然非常難得。

但係,其實搵到1個能夠分享成功嘅朋友,係難上加難。

因為人嘅心態係好自私,當見到其他人成功,就算嗰個係朋友,見到你賺大錢或者升職,佢個心都有少少唔舒服。

人嘅心態就係咁奇怪,望見1個人賺咗,你會覺得自己蝕咗。
更犯賤嘅係,你睇到其他人蝕,仲開心過自己成功。你努力嘅動力,就係想睇人哋蝕……

正因為呢種心態,要搵1個朋友去分享成功,其實好難。當你興高采烈地向朋友宣告你嘅成功,佢表面上當然替你高興,但可能佢心入面覺得你係晒命,或者係你搶咗佢個成功機會咁。

有個朋友嘅親身經歷,C小姐最近轉新工跳槽加薪又識到男朋友,事業愛情兩得意。而C小姐嘅女性朋友知道呢件事而非常唔抵得,更加同C小姐絕交,非常有趣……

當你唔想因為成功而失去1個朋友,
你只好唔將呢件事分享,或選擇喺網絡上分享喜悅,接收啲臉書上虛假嘅「恭喜晒」。

如果有日,你成功升職加薪,而朋友主動約你食飯,同你慶祝,真心替你高興。
呢個朋友,值得交一世!

延伸閱讀: