28歲扮中學生「何廣沛」兩線劇狂洗腦！

Feb 22 2017

《親親我好媽》大講港媽話題熱爆全城，其中廿幾歲扮小情侶的何廣沛 (Matthew)和江嘉敏(Kaman)成功搶鏡之餘，仲引來不少爭議，當中梗係有讚有彈。不過入行5年的Matthew可塑性認真高， 2014年已經在《女人俱樂部》扮過吳啟華學生版，去年在《律政強人》就演方中信徒弟仔Nick彈出，仲攞到星和無綫電視大獎2016「TVB最佳新人獎」，今年更獲無綫力捧，一連在兩線劇《財神駕到》和《親親我好媽》都擔任重要角色，直頭係洗腦式入屋，真係唔怕你睇厭，最怕你唔知佢係邊個啫！

撰文：《東方新地》圖片：Matthew Ho 何廣沛 facebook/ Ig

28歲扮中學生何廣沛大起底

原來Matthew中學時曾就讀赤柱聖士提反書院，中三時隨家人移民到三藩市，曾經在美國加州州立大學讀會計系，但讀咗年半就回流香港，曾經做過model，之後在2012年加入了無綫第26期的藝員訓練班，做鄭丹瑞學生。據Matthew講，他早在入行前已經認識「天堂鳥」成員Lincoln，曾經有機會加入「天堂鳥」玩MK-Pop，不過無綫落order要Matthew專心拍劇，結果Matthew受到無綫力捧，捱咗唔使5年就捱出頭！