無諗過去旺角買電器會買到無晒自尊
無諗過去旺角買電器會買到無晒自尊

無諗過去旺角買電器會買到無晒自尊 @藍橘子

生活

廣告

最近部相機壞咗,打算買部新相機。本來我諗住旺角有咁多間連鎖大型電器舖,一定可以買到啱心水嘅相機。

點知我真係大錯特錯。
行咗半日,相機買唔到,又搞到一肚氣,我發誓以後都唔會再去旺角買電器。

無諗過去旺角買電器會買到無晒自尊

我係一個對相機完全唔認識嘅人,勉強知道咩叫光圈、像素、iso呢類名詞…我要求好簡單,唔想要咁重,方便去旅行用,可以畀我換鏡頭就最好。

 

當我行入第一間電器舖,真實對話如下:

「先生想要咩牌子、咩型號?」店員。
「我對型號唔太熟,可唔可以介紹下唔同牌子有咩分別?」我。
「睇你想玩咩囉?」店員。
「我唔識相機,去旅行影相拍片,夠輕手,可以換鏡頭就OK!」
「咁都要睇你budget幾多喎。」
「我都想睇吓價錢唔同,會有咩分別?」

「你連budget都無好難介紹到畀你喎。」
「五千蚊呢。」
「都要睇你想玩咩囉~」
「……」

我覺得自己一直輪迴緊,於是我決定離開,去下一間舖頭。終於今次有少少進度,店員介紹咗幾款相機畀我,亦拎上手玩咗幾下…

 

「我想知呢兩部iso 同像素好似差唔多,咁兩者有咩分別?」我。
「影相唔係睇像素嘅,你仲要配合好多嘢嘛~」
「例如呢?」
「光圈啊~快門啊~影唔同嘢又有唔同玩法!我好難教到你㗎,你要識得個概念我先講得明你聽嘛。」

「但我唔熟相機…」
「咁你買返普通數碼相機啦!咪搞咁多嘢。」

「……」

根據當時店員嘅語氣,我感覺到被店員嘲笑緊我唔識影相。本來我以為店員可以協助或提供意見畀我,如果我仲熟過佢,我好似去超級市場咁自己拎部相機去收銀機畀錢咪得囉,使鬼請咁多店員咩。

結果都係要靠自己,食Lunch時上網睇咗幾個型號,評價唔錯價錢亦合理,諗住今次有晒目標,店員只需要介紹到部機嘅功能畀我就可以。

「唔該我想試吓XXX型號。」
「好啊!」

店員畀咗部機我,我想試吓開機,點知開極都無反應。我問店員係咪我唔識用,點知佢話:

「無晒電,試唔到…」
「但係我唔試過點買?」
「真係無電啊,唔係唔想畀你試啊先生。」

呢間係旺角最多分店嘅電器舖,估唔到咁大間舖頭連後備電都無粒。

就係呢個時候,我見到隔籬有幾對強國家庭,佢哋買到成枱都係嘢,一邊望住wechat睇吓購物清單,一邊向店員窮追猛打索取更多贈品,佢哋根本無諗過要試吓啲電器。

呢一刻,我終於知道原因點解我全日都買唔到部相機。
我並唔係被店員冷淡對待…
只係旺角電器舖根本唔係做香港人生意。

我又要試又要介紹,最後可能先買得一部機。隔籬強國旅遊一買就幾萬蚊,連試都唔使試。店員梗係唔理我啦。

其實香港好多強國重災區好似尖沙咀名牌街或者銅鑼灣Sogo,呢啲店舖根本唔係為香港人服務,行入Sogo想買支唇膏,店員根本懶得服侍你,旁邊強國客好似執藥咁起勢拎,一買就買十幾支…

我都理解,Sales好需要跑數。但唔需要用一種「唔買快啲走啦」嘅態度去工作。
更加唔好忘記,大家都係香港人…

 

專頁:http://www.facebook.com/BlueGodZi
ig:BlueGodzi