皮薄多汁!! 每日鮮製 小籠包 大角咀手造上海點心 |撐小店！|
撰文：Vivian Lai 攝影：宙
做回爸爸的味道 朝九晚九冇停手
店內餐牌選擇不算多，只有店主Noby 拿手的麵食和上海點心。「小籠包一日賣六、七十籠，生煎包四、五十客，仲有菜肉雲吞、鍋貼，又要開皮、打餡，我一對手，朝九晚九冇停手，有日真係包到唔想包，入行十三年嚟第一次！」開店做老闆比打工更辛苦，但Noby卻堅持：「當初入行學做上海點心，就係為咗開呢間舖，想做返爸爸以前煮畀我食的味道。」
「中學畢業後就無讀書，凍肉、印刷、機場保安咩都做吓，根本就冇目標。」幸好Noby醒覺得快。「我想創業，希望將來生活好啲。煮嘢食一直係自己興趣，就想將興趣變成事業。」
小籠包皮薄餡靚
開舖前去學煮麵，碰巧當時上海拉麵小籠包受歡迎，結果就入行了。十多年來學了一身武藝，上海點心麵吃，已手到拿來。小籠包，幾秒就包一隻，造型工整，七成脢頭三成肥，混入大量皮凍，皮薄多湯。
生煎胡椒包$24/2件（期間限定）
小籠包餡，加以黑白胡椒粒、京葱及洋葱等， 胡椒味很香但不太嗆，皮煎得香脆，很好吃。
中日混血 豬骨湯撞大地魚
Noby的爸爸是個雲吞麵師傅，廚藝出色，「佢整嘅吉列豬扒好好食，喺屋企開兩個油鑊炸呀，好堅！我整極都整唔到佢咁好食。」自從爸爸過身後，他開始煮飯給家人吃，眾多食物中，他獨愛麵食。店內的招牌「慶麵」，配搭似上海拉麵，其實是日式拉麵做麵底，配以日式豬骨湯混入大地魚、冬菇等熬製成的雲吞麵湯頭。「爸爸的全名叫顧松慶，我就將呢款麵和店名， 命名為慶麵。」
配料偏上海式，有豆卜、肉臊、菜肉雲吞，湯底混合豬骨湯及大地魚湯香，日式麵條夠爽。
醬料有麻醬、麻辣油、鎮江醋及甜豉油， 肉臊混入蝦米和薑米等，味道豐富。
日式拉麵以冰水過冷河，更爽口，拌以麻醬、甜豉油及青瓜絲，感覺清爽。
店舖變親友聚腳地
開店為了爸爸，舖頭亦成為家人朋友的聚腳地。「親戚朋友想見面，都會嚟舖頭搵我。」開業一年多，生意開始上軌道，他也終於請到人幫手。「希望可以延長營業時間，然後再開分店，不過我知道唔容易。」有了目標，人生就會更有意思，相信爸爸會撐你的！
訪問當日剛巧是Noby生日：「拍檔叫我快啲搵個女朋友，有女朋友脾氣會好啲。」
裝潢簡潔舒服，開放式廚房見到Noby包點心及煮麵，完全沒有油煙味。
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
