唐人街血淚史 @陳細

話說你唔識法文是幾乎不可能搵到工的, 於是住在巴黎美麗城 (belle ville, 是小唐人街, 雖然有個美麗的名字, 但街上企滿專程來賣肉的操普通話的暴露的中年女人) 的女孩的第一份工作是到屋企附近由中國人所開的超市當收銀, 客人大部分都是唐人, 所以溝通沒有很大的問題, 但人工呢? 度縮到無朋友。老闆開出 5euros 一個鐘的待遇, 包一餐午飯。同學問: 唔係路喎, 最低工資應該是現在差不多一倍 (比如我之前的工作連同 food ticket 完稅後是有 差不多15 歐的, 都已經叫做好奀)。老闆的理由是要幫她交稅, 那個「一倍」是稅前的數字。

呃鬼食豆腐咩。

我的第一個反應是:「come on (james)! 呢 D 劣質中國人, 可唔可以唔好去到邊都要呃人搵著數 ?」當然, 人在異鄉, 女孩子在無選擇下還是去當收銀員, 而且做了一段不短的時間…… 難怪全世界人都覺得中國人不可信, 覺得跟中國人做生意, 他就一定會找方法 cheat 你, 先唔講人在外地可以有多慘, 仲比本應同聲同氣的「同鄉」”禁” 住黎蝦, 果種比人蝦到上心口兼硬食既悲慘程度同今時今日經過廣東道既徬徨氣憤不相伯仲。就如身在澳洲 working holiday 的朋友說, 佢地只會蝦返自己人, 因為明知鬼佬係管唔住, 教唔聽, 而且一個崩都唔會計少, 所以有咩屎都係比返中國人食。

救命。

故事仲未完, 話說上海女孩既法文隨住時間講得愈來愈好, 於是佢由收銀員轉去做餐廳侍應, 同樣係中國人做老闆, 但待遇根本係蚊同牛比。原來老闆當年都係赤條條黎到法國留學, 錢用到咁上下就找了一間中國餐館打工, 當年既後生仔自願不收分文地工作, 只求有午晚餐落肚, 如果一個月後僱主覺得佢 ok 就煩請收留佢, 如果唔 ok 佢就執包伏自動離場。結果呢? 呢位後生仔在被駛盡一個月兼食唔飽後比人趕走左, 個賤老細仲要在最後一日先同佢講, 其實我地唔需要人, 你又唔係做得特別好, 但你係自願架嘛而且我都比左飯你食! 仆佢個街, 原來呢個世界有比食屎更慘的事: 食足一個月屎。於是年輕人發毒誓他朝做左人地老闆一定唔可以待薄員工, 員工再差, 都有阿媽生。而佢今天成為了同學仔口中的好老闆, 最少, 唔會扮幫你交稅呃你細路仔唔識世界。( 所以鄰近國家你就別再說全靠你照顧我地了, 我想嘔, ok? )

講到呢度, 大家係咪已經打消哂所有去法國 WH 既念頭呢? 定係搵唔到工就算乞食都唔會去唐人街? 都係果句, 兩睇啦。人生是驚喜驚嚇處處的, 如果唔係遇過陰質老闆, 當年既後生仔今日都未必可以同員工 friend 過打 band。(所以必須繼續支持台灣朋友!!!!!!!!!)