舊香港大排檔 貼地小菜夠鑊氣 ＠Dining娜

（presented by 天祥飯店）

位於深水埗石硤尾街醫局街上嘅天祥飯店，屬香港買少見少嘅鐵皮大牌檔，鐵皮檔口主要係廚房，是不時見到大廚開行個火，煎炒煮炸都好夠鑊氣。部份座位就係路邊，天氣開始涼，坐出室外都唔太熱，仲夠哂風味！天祥亦有舖位提供室內座位，實行落雨也不怕，天熱也不怕，可以全天候食好西！

不單係環境夠貼地、懷舊，仲有濃濃嘅人情味！老闆好鬼好傾，落手落腳招呼客人、落單，吹開水先知原來佢已經係天祥第三代傳人，開咗廿幾年嘅天祥由初只賣燒味嘅鐵皮大牌檔仔，到而家已經發展至有舖位，仲以晚市海鮮、小菜做主打！

話明懷舊鐵皮大牌檔，當然唔少得懷舊菜！出面已經好少地方有得食嘅家鄉焗魚腸 (＄95），大過我塊面嘅砵仔，即叫即焗，上菜時仲滋滋聲，齋聞已經好香，食落仲香！魚腸洗得好乾淨，不腥不苦，加埋叉燒、油炸鬼與蛋漿一齊焗，勁甘香！

天氣開始涼，又點少得熱辣辣煲仔菜！當晚我就試咗古法羊腩煲(大$308/ 小 $218) 同沙薑啫雞雜煲($98) 。前者用山東黑草羊，食落有羊肉嘅鮮騷味，腩肉燜得軟腍。羊肉燜前有用火槍燒過，所以聞得出淡淡嘅烤肉味，加上當歸、白鹵水料、自家製柱侯醬，香濃入味！

至於沙薑啫雞雜煲，係老闆研發嘅新菜式，大量切得非常幼細嘅薑絲、蔥段吸收哂沙薑、雞雜味道，咸香味濃，惹味十足，邊食邊飲啤酒一流。

鍾意食煎炸嘢，一定要叫酥炸墨魚餅 ($88)。有別於出面食到嘅墨魚餅，墨魚滑夾雜切碎的小棠菜，先包上一層腐皮，再沾漿油炸。脆漿調配得好，炸的熟度又剛好，換來金黃色賣相，外層酥脆，墨魚滑口感鬆軟又不會太硬。食時點上酸甜汁，去油解膩，多食幾件都無問題！

老闆另一創作嘅新菜式，欖角醬燒骨 ($98)！醬燒骨混合了欖角嘅咸香、蜜糖嘅清甜、香醋嘅微酸，味道層次豐富，最難得係豬扒入味得嚟，仲好juicy！

天祥飯店

地址：深水埗石硤尾街醫局街98號側
（港鐵深水埗站 A2 出口, 步行約8分鐘）(顯示地圖)
營業時間：傍晚6時至凌晨2時

電話：6176 9703