一日限定 星街化身歐洲巿集@新活時報Miss Sunny
週末假日，沿住聖佛蘭士街經進教圍，由灣仔鬧巿行入星街小區，係一種享受。可以放慢腳步，同朋友閒逛每一間潮流小店，行到攰又可以飲杯咖啡，輕輕鬆鬆渡過一個下午。而嚟緊10月星街小區將會變得更加熱鬧有氣氛，因為星街最特別嘅節日Gourmet & Wine Walk又返嚟啦！10月22號星期六，星街嘅特色餐廳、型格潮流小店將會聯同一眾本地工作室同樂隊，合作帶嚟一個集美酒佳餚、潮流、藝術於一身嘅繽紛週末！
必食！各國美酒+小吃
十幾種唔同風味嘅異國美食將會輪流上場，包括：純正意大利風味的CIACOE、CASTELLO del VINO和Slim’s、由美女廚神Esther Sham（沈依紅）主理，滿載法式浪漫情懷的maison es、日式燒烤居酒屋葫同日式燒肉以及Yo Mama甜品屋等等，只要預先係events.scmp.com/starstreet購買入場券，就可以一次過品嘗星街小區16間餐廳預備好嘅各式美酒同特色小食！
必玩！本地手工達人工作坊
當日仲有幾間本地工作室進駐，可以試玩釀製手工啤、手沖濾滴式咖啡、親手製作個人化紅酒杯、學整酒杯盆景等等，區內仲會有唔同音樂風格嘅本地樂隊喺星街輪流演奏，加上各種有趣、熱鬧嘅街頭表演同攤位，感覺就好似置身歐洲巿集一樣咁好玩！
必買！星街潮牌Special Offer
對於我MISS SUNNY最重要嘅當然係星街多間潮流精品店同型格藝廊都會有special offer！由力推日本職人手工染製的45R、全手作意大利皮革品牌Henry Cuir、非主流格調的北歐小店Vein、到主打生活小物嘅Kapok等等，都有特別折扣同優惠。特別係10月份各大品牌都未開始做sale，彈藥我已經準備好啦，隨時可以血拼！
溫馨提示：
點解MISS SUNNY咁清楚？因為上年我都有份玩Gourmet & Wine Walk。上次網上好快就賣晒飛啦，今次都要預早買定！入場費每位$360，不過29/9前買飛有early bird價惠，每位只係$280咋！30/9之後，買4張或以上門票都係$280，可以叫埋班friend一齊去玩喎！記得上events.scmp.com/starstreet訂飛啦！
