30年前嘅今日 @ 梁栢堅

Aug 19 2016

八月，打工仔最漫長嘅月份，冇紅假嘅31日，惟有等打風放半日（有力場係唔會放足一日嘅OK?）。你一定懷念當年將時間亂咁揮霍嘅暑假⋯⋯

回帶30年嘅今日，你一定喺電視睇過呢個廣告：維他汽水。
－梁栢堅

1986年維他汽水廣告：扯乜？

當年一到暑假，所有汽水牌子都會瘋狂出廣告，因為冷氣並非通處有，所以唯一低成本降溫方法——汽
水——銷量一定爆，咁一個好嘅汽水廣告你話幾咁重要？
你只要搵下YOUTUBE「維他汽水1986年」，就會有段廣告睇，首歌其實幾好聽，詞仲要唔差……

「烈日在掃射 I’ m on fire 齊用力拉扯 I’ m on fire！口渴口渴將我封鎖，PS375，快啲去扯扯~扯出解渴新情趣PS375~ 」，唱歌條友把聲係幾咁淒厲，啲畫面係幾咁配合。條片入面出現過兩秒嘅維他汽水機，當年喺大X 樂快餐長期供應。

維他汽水有四款：可樂、白檸（即係七喜）、忌廉同橙汁，記憶中白檸同忌廉最好飲，上網睇Forum 好多巴打都係相同口味。呢隻汽水係八十年代產物，出現咗十年就消失。

再掃上1984年維他汽水短片，竟然係陳庭威（未聽過就算把啦）擔正，首廣告歌認真九唔搭八咁rap：

「日日都想日日都咁好天，仲想成日同住佢去射箭，PS 瞄準PS 目標PS 維他汽水ILove You，射多幾箭，唔~ 口渴㖭~ 好在有我，搵你幫手先，PS 維他汽水PS 維他汽水PS 維他汽水I Love You，PS！」

唱歌條友把聲係姣姣地，仲要甩甩地BEAT 呢下攞命，當然你要睇埋畫面至會起雞皮。

其實仲有一條1983年嘅廣告，唱歌似係林子祥，畫面中段仲有十七歲嘅張曼玉閃過，係呀佢選港姐前，都係𡃁模。