石垣無人島 Model貝兒試穿美人魚尾非常興奮,另外亦遇上3、4個日本靚女試玩。
石垣無人島 Model貝兒試穿美人魚尾非常興奮,另外亦遇上3、4個日本靚女試玩。

9月即飛!沖繩 石垣無人島 激玩攻略

旅遊

廣告

日本最南端之沖繩再南面的石垣島,直至9月仍是炎炎夏天(最高溫度30.7℃;最低25.8℃),加上HK Express於6月新增直航,最宜實地一看有關夏天之一切美事。位置來說,小島屬於沖繩縣但不是那霸本島,為八重山群島之一。石垣一向給人平靜之感,除了潛水,彷彿「無嘢做」慢活人生。石垣無人島 ,你定要知道~八重山海域有不少海中沙洲,平時藏匿大海,只在退潮時出現,好夢幻!多得Google、打卡功能,絕景才得以曝光,Thanks!我就實測了2個Local Tour,分別去闖「幻之島」、「バラス島」2大人氣沙洲,究竟可唔可靠?抵唔抵玩?

撰文:Venus@

| 圖片:Kwanyiu | 鳴謝:HK Express

 

(島一)一天團闖「バラス島」

Q1.バラス島喺邊?

バラス島(Barasu島)是人氣愈來愈強之海中沙洲,位於西表島與鳩間島之間。バラス島的美,全因為由白色珊瑚石沖積成洲,令淺灘水波晃晃,簡直如天然打燈師。

 

Q2.點去?

我們就實測了旅行社的Local Tour全日團,幫你安排好交通接駁、膳食及水上活動,最重要是由具豐富出海經驗的船長帶路!一大清早就8:15am搖船,先由石垣碼頭乘約45分鐘船至西表島。集齊參加者後整理一下裝備,轉艇仔出發。只消15分鐘,我便眺望到海中鋪著薄薄一層白沙!艇仔「咔嚓」一聲就靠岸了。What?全程身都不用濕、妝都不用補。

Q3.島上有咩玩?

拍照、浮潛是一定啦!一到達時,資深船家卻說水漲太厲害,暗藏危險,大家只可逗留拍照15分鐘。之後我們去了其他地方浮潛,午後重登沙洲約1小時,水退了不少。
團友們一試「超貼地」浮潛,大家都極Hyper!我們就繼續狂影,由沙洲一直向外澗水20米都仍未浸過心口,可以由遠處影晒全個無人島。好在我自備防滑膠鞋,攝影師只穿了涼鞋踩中石仔爆血,但眼見有如馬爾代夫閃令令的玻璃水,忍痛都要影!

記者點評!!

好影度:★★★★★
水好淺,沙洲一直向外延伸,可以行出啲影晒全個無人島,加無敵玻璃水。
好玩度:★★★☆☆
浮潛都好好Feel嘅。
易搶灘度:★★★★★
由於バラス島沙堆集中,就算是水退時,船隻亦較易靠岸,唔使濕身搶灘。
方便度:★★★☆☆
バラス島與西表島(八重山海域另一大島嶼)較近,絕少Local Tour直接由石垣島飛艇前往,所以要預早乘船至西表島集合再出發。因而多數是一天團,半天不夠玩。

 

(島二)半天團闖「幻之島」

Q1.幻之島喺邊?

幻之島與石垣較近,由碼頭出發只要約25分鐘。

Q2.點去?

今次非參加旅行社,而是實測「地頭蟲」船家營運模式之半天團。船家晨早流流來到碼頭附近的酒店接我們,十分貼心,再到避風港上艇仔出發。坐坐下,船家遙指:「到喇到喇」到咗?我咩都見唔到。原來因為幻之島沙堆較散渙扁平,幾乎與水平線重疊,即使小船都不能駛近,一定要澗水而行。成功靠苦幹,唯有少女下海啦。我腳短,一落水浸到心口,風又大石又尖,步步為艱5分鐘,終於含淚搶灘!

 

 

 

Q3.島上有咩玩?

一登上幻之島,立即見到條美人魚生勾勾橫攤沙上。對,這才是我的真正目標!近來沖繩興起扮美人魚熱潮,見到女神魚、猛男魚、BB魚瘋狂打卡。石垣愈來愈多Local Tour一雞兩味,帶遊人去探無人島,順勢扮美人魚,感受賣萌之樂,Why not?船家還會一腳踢做攝影師,見手勢都算過骨,不用怕男友影極都唔靚啦。由於報了半天團,於島上只可逗留約1小時,攝影師影到最後一分鐘,夏日寫真放送,真係人一世物一世~

記者點評!!

好影度:★★★☆☆
幻之島比バラス島起碼大一倍,更隱藏於水平線,有點難影晒全個孤島Feel。
好玩度:★★★★☆
有得扮下美人魚,浮潛以外叫多個玩法,面積大啲又可以跑跑跳跳Hea下。
易搶灘度:★★★☆☆
點都要澗水行3-4分鐘左右。珊瑚石好尖,登島時最好穿水上運動鞋。
方便度:★★★★☆
比較近石垣島,可慳至少1小時乘船時間,非超級浮潛發燒友就最啱。

一天團闖「バラス島」

價錢:大人¥16,500/HK$1,278;小童¥12,900/HK$1,006
行程: 石垣島→西表島(轉船)→バラス島(拍照)→附近水域浮潛→鳩間島(午餐及觀光)→バラス島(浮潛)

電話:+81-(0)980-82-6711
備註:須於出發前3天報名
網址:www.hirata-group.co.jp(平田觀光)

半天團「幻之島」扮美人魚

價錢:¥8,000/HK$624
行程: 石垣島→幻之島(扮美人魚、拍照)→附近水域浮潛
電話:+81-(0)80-3133-8159
備註:須於出發前3天報名
網址: sevenseas74-isigakizima.com
(Seven Seas)

 

HK Express直飛石垣

記者之前試過Click 中$78單程,瞬間無晒,大家睇實喇!
HK Express
出發(UO 3812):星期二1:05pm;星期四、日12:40pm

回程(UO 3813):星期二、四、日4:50pm

 

其他採訪內容: