獅虎自拍封殺令!@杜遊珍

博客

廣告

早前南非動物學家攝於非洲草原嘅「抱獅照」在網上瘋傳, 不少美國囝囝東施效顰,走去動物園內攬住老虎、獅子自拍,將照片放上交友平台,吸引女性。結果惹來愛護動物組織指行為跟虐畜無異,成功爭取於紐約州立法,禁止市民將抱獅selfie 上載互聯網,初犯罰款五百美元,再犯則雙倍。行家S聽到消息,拍手叫好,更細數帶團到泰國睇白老虎BB

的可怕情況──團友為求拍到絕美自拍,將老虎BB搓圓撳扁,更拉埋行家落水,一起負上虐畜的罪名。

曾到非洲草原睇動物大遷徙的行家L,則表示當地有規例禁止旅客模仿動物叫聲,但同行的強國人卻偏愛怪叫吸引動物,還一臉沾沾自喜,視團友生命安危如無物。L更遭當地導遊嚴厲警告,慘被視作同類,依家講返起都嬲到震!提起動物合照,一眾行家都擰晒頭,批評本港有商場將生勾勾嘅山羊放喺商場招呼顧客拍照,品味庸俗,跟強國睇齊。其實人類最好遠離動物,更應立例禁止出海觀賞海豚,不然再死10條「希望」,也無法拯救瀕危的中華白海豚。

 

世界已經無法阻止人類瘋狂自拍!

即使立例禁絕,亦難以禁止人類騷擾猛獸。不過天網恢恢,阿根廷有動物園以提供獅子合照聞名, 月前被踢爆使用鎮定劑後,生意大減,面臨倒閉,阿珍大叫一聲「抵死!」