沖廁滑梯
沖廁滑梯

尖叫實錄| 2秒直插 沖廁滑梯 !!!! 芭堤雅必玩最新水上活動

旅遊

廣告

泰國最大水上樂園RamaYana 已於5月開幕,面積約700個網球場咁大,光是場地已經贏對手Cantoon Network Amazone 9條街!園區一共設有21條滑水梯,刺激、頹浮要乜有乜,講到全場最矚目的,一定是 沖廁滑梯 ,玩家步入玻璃箱後,腳底活門便會打開,並由16米高的入口一躍而下,心血少啲都唔掂!

撰文:阿妹 | 圖片:Hong

上樓梯之際,震耳欲聾的慘叫聲此起彼落,嚇到Model Kate一度要玩拖字訣!她終於扚起心肝步入玻璃箱,救生員二話不說便將門關上,勁爽手!啟動裝置後,電腦女聲隨即倒數,Model一聽到two便嚇到喪叫,然後,下一秒經已「砰」一聲消失,由於是正宗Free fall,玩時更會與靠背完全分離,全程快過2秒,著地一刻的摩擦力超強,除了眼耳口鼻勁入水,就連泳褲都不慎走位!排隊期間,有少女在玻璃箱嚇到喊,真正喊住玩,好壯觀!

沖廁滑梯 直落free fall 驚嚇度爆登!

沖廁滑梯 共有2條,分別是2秒直插的橙色滑水道及5秒360度旋轉的藍色滑水道,橙色一定最刺激!

芭堤雅 沖廁滑梯 01
橙色直落滑水道高16米

亡命直擊!

玩時必須雙手雙腳呈交叉狀,上背緊靠水道。 沖廁滑梯 Free fall過程不足2秒,快到攝影師都捕捉唔到Model英姿。

芭堤雅 沖廁滑梯 04
可唔可以唔玩呀?!
芭堤雅 沖廁滑梯 26
媽咪~救命啊!

 

芭堤雅 沖廁滑梯 24
Model 玩完幾乎飛甩bikini,慘慘豬!

玩後感:兩種驚恐嚇破膽!
驚嚇度:★★★★★
入玻璃箱跟正式玩其實係兩種驚嚇,前者係等死;後者係凌空極速撻落滑水道,好似跳樓咁!玩完 沖廁滑梯 再玩其他slide,立即覺得好濕碎!

芭堤雅 沖廁滑梯 27
Jae-won及家人@韓國遊客:園區的滑水梯冇韓國咁刺激,不過呢度勝在有 沖廁滑梯 ,好正!

TIPS:閒日慢慢玩!

當地人多數在周末入場玩水,想有充足時間玩slide,閒日去最穩陣!

特大水管滑水梯 激彈3米

講離心力,除了沖廁滑梯 ,Aquaconda一樣冇得輸,看似平平無奇的蛇形滑水梯,特別加設兩個特大水管於出入口附近,刺激度大增!Model Kate坐上水泡艇後出發,滑過兩個270度大彎後,便會先經過一個中型水管,隨即45度俯衝到大水管滑梯,強勁衝擊力令成隻艇幾乎跣到大水管頂部,失驚無神的離力心令Model尖叫到失聲!不過,一波未平一波又起,緊接下來的回彈力,令水泡艇跣到大水管的另一端,期間更激起大量水花,Model更加瘋狂飲水!正當Model喘幾口氣,又即將進入另一大水管,她再次被拋到6米高管頂,全程拋來拋去,尖叫聲由頭帶到落尾!

芭堤雅 沖廁滑梯 22
45度向下俯衝3米大水管!
芭堤雅 沖廁滑梯 16
Alicia & friends@當地學生:滑水梯都幾好玩,不過水泡艇淨係坐到兩個人,搞到我要陪朋友玩多次!
芭堤雅 沖廁滑梯 21
Model 玩前仍然笑笑口唔識驚……

咆哮錄播!

芭堤雅 沖廁滑梯 20
面帶笑容的Kate 全程緊握扶手。
芭堤雅 沖廁滑梯 19
失驚無神跣落大水管,成隻艇飛到上大水管頂部,水花入晒艇,尖叫中的Model更加食到正一正!
芭堤雅 沖廁滑梯 17
出口位的大水管一樣唔簡單,遠處都聽到Model凄厲叫聲。


玩後感:超強離心力!
驚嚇度:★★★☆
玩畢全程約30秒,冇諗過咁勁離心力,尤其係經過大水管,真係跣到頭都暈!

BB級 溫和洗衫板

據救生員所講,出名平和溫順的泰國人,對驚險刺激的滑水梯並不熱衷,因此園內不少滑梯都會貼近當地人口味,其中經典玩意洗衫板Boomerango便是代表作!目測所見,板的高度不過10米,垂直角度約80度,與正宗90度角Boomerango有出入,不過玩家一樣玩到依嘩鬼叫!坐上兩人一艘的水泡艇,沿途盡是密不透光的水管,大約8秒後重見天日,隨即而來的是45度俯衝而下,強勁衝擊力令水泡艇衝上洗衫板,然後再直插落水!雖然角度、速度及高度都打了折扣,算得上是BB級洗衫板,但不少local玩家仍然大呼刺激,仲話離心力強勁,膽小玩家不妨一試!

芭堤雅 沖廁滑梯 03
目測不過10米的Boomerango,可能係全世界最貼地的洗衫板!
芭堤雅 沖廁滑梯 15
衝上洗衫板後直插落水,嚇到少女玩家瘋狂傻笑。

俄羅斯Sally及妹妹玩後感:直上直落好驚喜!
驚嚇度:★★★☆
水管開頭黑麻麻,感覺好刺激,點知一見光就跣到最低處,然後再垂直衝上板端,感覺好似飛天咁!

泰味濃郁Waterpark!

佔地超過18萬平方米的園區,加加埋埋共50個checkpoint,滑水梯以外,大家最關心當然係餐廳及園內設施,勢估唔到園內由食物到休閒設施都極具泰國風情,當中嬉水區Aqua Play的泰式圖騰裝置就最重手,相信小朋友係唔會介意嘅!

芭堤雅 沖廁滑梯 11
園區佔地超過18萬平方米,一日肯定玩唔晒!
芭堤雅 沖廁滑梯 14
場內最得泰國人歡心的必數全長140米的Double Wave Pool,不過,所謂的雙重浪最高都唔過1.5 米,安全到呢!
芭堤雅 沖廁滑梯 23
記者排隊期間,更意外望到旁邊農田的野生牛牛,勁搞笑。
芭堤雅 沖廁滑梯 07
不少青春少艾都會在池邊影相打卡。

勁食泰菜

園區共有4間餐廳,最有睇頭都係LakeRestaurant,餐廳有小量中餐及西餐供應,不過最多人柯打必定是泰菜,辣到嘴巴麻痺的冬蔭功及酸酸甜甜的泰式炒河都令人愈食愈開胃,好醒神!

蝦肉泰式炒河 THB175 / HK$38

芭堤雅 沖廁滑梯 08
甫上枱便香氣撲鼻,蝦肉爽口彈牙,配搭煙韌河粉,好味!

冬蔭功THB195 / HK$43

芭堤雅 沖廁滑梯 09
餐廳供應多款泰式美食,冬蔭功味道偏濃,辣度十足,食完有噴火感覺!

小學雞天堂

園區小量超激玩意如沖廁滑梯,會將身高不達1.2米的小朋友拒諸門外,因此小朋友可以轉戰到水上樂園Aqua Play,裡頭有多條小型滑梯及水槍,離地4米的大水筒每隔5分鐘便會倒水,水力猛到連model都跪低,小朋友梗係嚇到爆喊!

芭堤雅 沖廁滑梯 10

歎住回氣

食完午餐難免飯氣攻心, 必須要唞,講到歎呢方面,場內更設泰國按腳及全身按摩,師傅不論手勢、力度都出奇地好!前提係你唔怕人來人往會尷尬的話,值得一試。

芭堤雅 沖廁滑梯 12
泰式足底按摩1小時約THB450 / HK$99,按完幾乎唔想起身!

RamaYana Water Park
地址: 9 Moo 7, Sub District of Na Jomtien Sattahip,ChonburiPattaya(顯示地圖
電話:+66( 0) 3300 5929
營業時間:10am-6pm
入場費:THB990 / HK$217(成人)、THB790 / HK$174(小童)
交通: 設穿梭巴士往返酒店及園區,一人每程約THB120 / HK$26。(必須於入場前一日,晚上7時前預訂)
備註: 坊間有旅行團於7月出發前往RamaYanaWater Park玩水,價錢3千蚊起跳,詳情可

查詢星晨旅遊(2519 8088)。
網址: www.ramayanawaterpark.com