你射我~我擲你!! 日韓台 ~ 4大盞鬼過癮潑水節+刺激水上活動

Jun 27 2016

想濕身迎夏，水上樂園以外，世界各地都有不少關於玩水及水上活動，亦不停推出全新的刺激玩意，所以今夏天玩水一定要夠潮，咁先可以Post 相呃Like！仲去曼谷玩潑水節？你唔覺悶，我都嫌Out吧！不如先去日韓台「潑水節」，人人扮鬼扮馬勁好笑！國外Hit爆的Blog Jump、Stand Up Paddle、水上飛碟亦已經被引進東南亞，近近地去轉日本、韓國或台灣已經玩到！

撰文：Alex | 圖片：網上圖片

日本：搞笑裝扮怒擲水彈

日本上年開始大搞WaterRun，今年7月尾Encore，分別於東京、大阪、名古屋及九州舉行，活動當日除了水槍戰，最誇張是萬人齊齊分成兩隊互擲水彈，場面勁震撼！而且近年興起的Zombie Run都有得玩，網民話喪屍被水槍射中後依然會追實你，務求推你落「水坑」令全部人由頭濕到落腳指尾先會罷休！記得咪咁老套著背心短褲去玩，學㗎仔㗎妹玩Dress Code先夠潮呀！

WaterRun 2016（東京場）
地址：千葉県千葉市美浜區ひび野2-116（顯示地圖）
日期：7月23至24日
時間：8am-5pm
入場費：¥6,600 / HK$483
交通：乘京葉線至海浜幕張站步行約10分鐘
網址：waterrun.jp

首爾：同韓星玩泡沫槍戰

去首爾玩水同時都可以追星，事關首爾其實都有「潑水節」，但以水槍戰為主，活動中更不時有泡沫四濺，場面似在「六月飛霜」盛夏落雪，而且更有消防車助陣以水炮助攻，亦不時會有歌舞表演，當然唔可以錯過水襲表演者的機會！最緊要是主辦單位會邀請人氣韓星同大家齊齊玩水，上年國民女神秀智就隆重登場，秒殺一眾韓男放下水槍狂影相！

首爾水槍節
地址： 서울특별시 서대문구 창천동 18-63（首爾市西大門區滄川洞18-63）（顯示地圖）
日期：7月9至10日
時間：10am-10pm
入場費：W30,000 / HK$198
交通：乘地鐵2號線至新村站1號出口步行約8分鐘
網址：facebook.com/watergunfesta

同埸加映！韓台水上活動

若果你去旅行的日子，正正與潑水節「有緣無份」的話，亦可以選擇玩水上活動，如，Disco Boat和Blob Jump等等，同樣刺激又好玩！

首爾：極速狂轉拋你落海

如果你熱愛「香蕉船」，推薦你一定要去江原道水上樂園River Palace挑戰升級版的Disco Boat水上旋轉飛碟，由快艇牽住陀螺形巨型水泡極速飄移甩尾，期間水泡會不斷旋轉，速度勁快而且離心力非常大，稍一不留神捉得唔實立即被拋入海中！難怪一登場就成為韓仔韓妹的玩水新寵！

一次可坐15人，快艇出發，水泡立即瘋狂自轉！記得同朋友仔打賭邊個可以堅持到最後！

River Palace 리버팰리스
地址： 강원도 춘천시 남산면 방하리 366-1（江原道春川市南山面芳荷里366-1）（顯示地圖）
電話：+82（0）70-4401-3188
營業時間：9am-9pm
收費：W30,000 / HK$199（乘Disco Boat及一項其他設施）前往方法：由加平地鐵站外巴士站，乘33-12號巴士於加平終點站「가평터미널」下車，再轉乘33-9「리버파크」方向巴士，於「빙하리종점」下車，全程約45分鐘
備註：自行前往須提前預約及人數留位
網址：rvpalace.co.kr

高雄：驚嚇彈跳直落插水

以前上網睇到Blob Jump已經好想試，現在終於有機會，因為台灣引進了充氣設備，首個水上彈跳床將會於6月底在高雄蓮池潭登場！跳台約5米，一躍而下跳落彈床再反彈落海，同玩跳樓機一樣咁驚嚇；而瞓喺彈床上的朋友仔則被瞬間送上10米高空，超級過癮！女仔怕高則可玩Stand Up Paddle，訓練平衡力！