海鮮、甜品、中菜 3大Buffet! 澳門自助餐 哪間最好?!?!

終極一擊,一於玩大啲!今次帶8位食神(《新假期》讀者)過大海,一日之內勁食三個自助餐。澳門五星級酒店自助餐,出名款式多、夠奢華, 而且價錢又平,處處爆場,閒閒地都要早一個月book 枱。今次為大家精選三間口碑好、有特色的:有近七十款美食的午餐;有廿幾款打造甜品花園下午茶,以及任點任食五十款高級中菜!食神今次仲唔大飽口福?

撰文:Ruby | 攝影:Him

澳門自助餐

試食日期:2016年5月21日

$250 午市七十食 大鑊蠔餅+即燒Ribs+鐵板大元貝

午市自助餐,食物款少是常見的。銀河酒店最近卻加碼大玩席前表演,當中最搶眼的,便是即煎巨型蠔餅,以70cm(成張二人枱咁大)的平底鑊,淋上蛋漿、蠔仔、海鮮粒現場即煎而成。

長過手臂的豬肋骨也是現場即燒,師傅邊燒邊淋上燒烤汁,迅即搶火,惹味得很。鐵板燒即煎珍寶扇貝,手掌咁大,放在鐵板上發出「滋!滋!」響聲,隻隻鮮甜啖啖肉。話明七十款食物選擇,除了即淥車仔麵,印度專區也是亮點,有烤羊架、虎蝦、燒雞和咖喱等,款款味道都不俗:甜品供應近三十款,刺身和凍海鮮也分別各有三款。

F1

即煎蠔餅
師傅先倒入蛋漿煎, 灑上蠔仔、蝦仁、芫荽等炒勻,蛋香和海鮮香俱備,上桌熱辣新鮮。

add5

印度專區
印度烤羊架羶香帶微甜辣;燒雞有清新香草味,大虎蝦微鹹帶檸香,咖喱烤鱸魚蘸印度香草醬,清新解膩。

F2

印度咖喱
咖喱以洋葱、辣椒、咖喱粉等炒香,加上酸奶和酥油和炒香了的肉碎,配帶有豆蔻、山葵和薄荷葉等香味的印度香飯,層次豐富。

F3

午市每日提供兩款燒烤,今期是現場燒近40cm豬肋排,香噴噴、火光熊熊。

F4

即叫即燒豬肋骨
以百里香、紅椒粉等香料調製醬汁,食落甜酸中帶微辣,豬肋骨肉質鬆軟,同場還有春雞供應。

add1 copy

燒板燒扇貝
隻隻手心大啖啖肉,鮮甜帶牛油香。

add2

晚市即開黃鰭吞拿

Buffet 戶外區晚上會變身馬拉街頭夜市,除了當地名物排排燒雞翼,還有炭爐沙嗲串、原隻連殼帶子, 以及即開榴蓮和椰青等,加上木圓枱和膠凳,氣氛風味也十足。刺身區仲勁,每晚有原條五十斤黃鰭吞拿上場,師傅席前即開即派,似足日本黑朝市場。本月亦開始新的龍蝦主題,任取任食的龍蝦會以鐵板燒、沙律和豉汁烹調,供應期至七月尾,收費每位$438。

add6

F7 copy

食神報告

澳門自助餐
正呀!咁多海鮮!
澳門自助餐
唔使講!相機食先再打卡。

 

澳門自助餐
食唔晒唔好攞咁多呀!因為太多嘢食,食神眼闊肚窄,做大嘥鬼。

 

H1 copy copy copy

食神Richard:食物選擇多,但部分不夠熱。即叫即燒扇貝最啱心水,熱辣辣,好鮮!服務一流,侍應反應快,環境亦闊落舒適。

H2 copy

食神Ling:價錢不便宜,食物質素正常。叉燒半肥瘦燒得幾香。

群芳

F8
地址:澳門路氹城「澳門銀河」綜合度假城地下G007(顯示地圖
電話:+853 8883 2221
自助午餐供應時間: 首場11:30am-1:30pm;尾場1:45pm-4:30pm
收費: $250/位
備註: 建議提早一個月訂位。11歲以下小童及65歲以上長者半價。
設加一,收信用卡。

$128 廿款甜品花園 即製窩夫+任唧軟雪糕+絲襪奶茶

對女士而言,甜品有絕對的魔力,從來食極唔知飽, 難怪剛食完午市自助餐, 在廿幾款甜品面前,各女食神仍露出心心眼。晚餐要預早兩個月訂位的澳門名廚都會, 上月新推下午茶自助餐,$128可試盡五星級酒店in-house 廿款甜品,草莓樹、泡芙山、棉花糖花等打造出顏色繽紛的花園,成眾人的呃like 焦點。

部分甜品與A La Cartemenu 一樣,keep 到質素,創意口味有黑椒朱古力蛋糕,甜到漏的芒果凍湯以香檳打成,還有甜酸清新的青蘋果慕絲,賣相亮麗特別。現場即製窩夫可自選m&m、彩針、朱古力豆等,還可自唧軟雪糕,想點食就點食。餐後來杯咖啡或港式絲襪奶茶,由專人即叫即沖,香滑濃郁,圓滿。

U1 copy

軟雪糕好多人話好難唧得靚,但小編試玩,無咩難度啫!

U21

港式絲襪奶茶茶香濃,夠甘醇,奶厚夠滑,連個杯都是HK Style。

U22

葡撻
酥皮底酥脆, 富油香,配焦香蛋漿,食得出是新鮮出爐。

U2

即製窩夫
廚師即製,蛋香味濃,外脆內韌,還可配朱古力、蜂蜜、楓糖、煉奶等味道。

U3

木糠布甸
人氣之選,口感綿滑,有濃郁奶香,微甜,加上面頭的餅碎, 香滑脆口。

U5

芒果慕絲蛋糕
Mousse有芒果香, 蛋糕有蛋香,可中和甜味。

 

U7

黑椒朱古力蛋糕
朱古力Mousse加入小量黑椒,甜中帶微辣,配朱古力海綿蛋糕,香甜回甘,推!

 

U8

綠茶紅豆蛋糕
慕絲以宇治抹茶打成, 加上天津紅豆,抹茶甘醇,紅豆大粒。

U11

芒果布甸
奶香濃,但芒果味較淡,布甸夠凍,口感彈牙。

U12

草莓泡芙
泡芙軟腍,內裡充滿吉士醬,淋上草莓味朱古力,有微草莓香。

 

U13 U14

 

杯子蛋糕
每星期有不同的味道, 特別推介原味,奶油味濃,牛油味香, 甜度適中。

U15

青蘋果慕絲
有青蘋果味,但甜度高有少許膩。顏色翡翠夠亮麗,賣相吸引。

U16

水果撻
士多啤梨為主角,加上香甜吉士和富牛油香餅撻,穩陣之選。

U17

芒果湯
芒果加香檳打成微稠果湯,有果肉和香濃果香,但太甜。

U18

草莓慕絲
草莓加奶油打成,creamy而不甜膩。

 

 

U19

食神報告

澳門自助餐
喂!士多啤梨樹好難攞呀!一大力佢就爆喎!
澳門自助餐
手拉港式奶茶 有水準!好有HK Style!
澳門自助餐
食過無數甜品的讀者Sarah,認真試味。

 

食神Shirley
食神Shirley

一入餐廳就聞到好香窩夫味。最開心是可以自己唧軟雪糕。Barista好靚仔,飲咖啡望住佢好開心。

食神Natalie
食神Natalie

甜品擺到好似花園,好靚。最鍾意芒果奶凍,芒果味香,而且有甜甜奶味,一食就知用料靚又足。

食神Sarah
食神Sarah

甜品精緻,特別是草莓樹和泡芙樹,高過我,忍唔住狂影相。

名廚都匯

名廚都匯

地址:澳門路氹城「澳門銀河」綜合度假城JW萬豪酒店一樓(顯示地圖
電話:+853 8886 6888
下午茶供應時間:星期六及日 3pm-5pm
收費:成人$128/位,12歲以下小童或65歲以上長者$98/位
備註:建議預訂,設加一,收信用卡

$298 五十道中菜放題 豪食黑毛豬叉燒+波士頓龍蝦

日式放題、任食點心坊間多的是,中菜放題則很少見。萬豪酒店中菜廳最近推介50道中菜放題,總廚吳師傅有四十多年經驗,曾於米芝蓮二星中菜廳任職,這放題也是由他主理!

任點任食選擇有涼菜、湯品、主菜、麵飯和甜品,必試招牌蜜汁叉燒,用上半肥半瘦黑毛豬腩,燒出來蜜味香甜,肉質鬆軟,即使瘦叉都一樣腍滑,平時例牌已經要$168!蝦多士、炖雞湯、葱油雞、蜜瓜炸脆奶、酸甜草莓骨等也是任點任食,在fb 專頁分享優惠推廣,更可獲贈半隻蒜蓉芝士焗波士頓龍蝦。平時在這五星酒店中菜開餐,炒粉麵百四元起跳,主菜起碼二百,放題收$298實在性價比高,重點是款款好味,全部即叫即做,熱辣新鮮。

J1

涼菜

蜜汁叉燒
用上黑毛豬腩,肥瘦均勻,富肉香,多肉汁,口感腍滑,蜜糖香甜帶微焦香。

 

J2

佛山燻蹄
豬蹄燒毛煲腍後,用滷水浸至起骨。 入口腍滑入味,蘸蒜蓉醋,清新解膩。

J3

五香牛𦟌
牛𦟌滷足3小時,煮至起膠切片,再淋上原味牛𦟌汁和少許辣油,鹹香少辣。

J4

葱油雞
雞身腍滑,生熟適中,雞皮爽脆,配葱油,微辛惹味。

J5

主菜

脆炸蝦多士
多士炸得金黃香脆,不油膩,蝦鹹鮮,口感彈牙,整體香口。

 

J9

紫羅炒雞球
雞球炸香配紫薑加甜酸汁,炒香上汁,酸甜醒胃。

J10

泰皇自製豆腐
手製豆腐質地嫩滑、豆味濃,配上紫菜碎、豬肉、蝦、甜椒粒和泰式辣汁,整體酸甜香辣。

J12

鹹魚蓉蒸蛋白
蛋白嫩滑,有粒粒鹹魚蓉,清新又鹹香,送飯一流。

J13

飯麵

海皇炒蛋飯
飯粒金黃,餸料有彈牙蝦粒和鮮甜帶子,食落鮮味,蛋味濃。

J7

水餃湯麵
幼麵有少許鹼水味和蛋香,口感爽彈。水餃皮透薄,包著豬肉、蝦和木耳,餡料味濃。

J8

甜品

麥片椰汁糕
彩色造型吸引,麥片微甜富麥香,襯椰汁糕,椰香味搶,必點!

J14

冬瓜薏米炖雞湯
湯頭清甜,湯面泛起雞油,薏米軟糯,雞肉腍滑,湯渣好味。

J6

蒜蓉芝士焗波士頓龍蝦半隻
龍蝦肉彈牙,蝦膏豐富,蒜蓉甘香,加鹹香芝士,惹味。

 

J15

食神報告

澳門自助餐
於fb分享萬豪優惠即送半隻龍蝦,個個勁like!~嘩!啖啖肉波士頓龍蝦,正!
澳門自助餐
食完之後,大家都好認真寫意見,品評是否性價比高。
澳門自助餐
我們的記者見大家食得津津有味,當然來個即時訪問。

H6

食神Rita:叉燒入口鬆化,有焦香,怪不得是招牌菜。蜜瓜脆奶有童年回憶,味道似維他蜜瓜豆奶,香甜。最正是茶,普洱甘醇,菊花清香。

H7

食神Gerry:菜式多樣,五十幾款選擇多,選困難者要注意。招呼熱誠,環境清靜,整體very nice。

H8

食神MoMo:食物質素好,贈送龍蝦有質素,啖啖肉,芝香重,夠邪惡,不用三百元有如此質素,認真抵!

萬豪中菜廳

J16
地址:澳門路氹城「澳門銀河」綜合度假城JW萬豪酒店一樓(顯示地圖
電話:+853 8886 6228
供應時間:星期一至日 6pm-10pm
收費:成人$298/位,12歲以下小童$158/位
備註:3歲以下小童免費,須預早至少一日訂位。設加一,收信用卡

最新吃喝玩樂資訊