Catch Me If You Can@Ellenpedia

博客

廣告

雖然空姐人工唔高,但係個人認為真係唔使淪落到偷野咁折墮咁有辱家門呀嘛。大佬最少你偷都移個玉步呀,使唔使係酒店偷先?(偷情例外)話晒你都著住件uniform,你咁樣偷左野之後一走了之(老老豆豆其實IP都唔使check就知你係邊位),後面仲要住既crew真係不勝銘感,感激流涕,激動之情溢於言表……多得你唔少。

英國某間酒店對我地恨之入骨。仲記得有個同事check in嗰陣問個reception姐姐借個轉插啦,點知佢講起就扯火啦,即刻黑面話:

「轉插???我地冇晒啦喎!!!!俾你地啲crew偷晒啦!!!你要問問你啲同事啦!!!

嘩,使唔使呀。先唔好judge啲crew係咪好衰,我真係好想同呢位無辜同事講句加油。

我地唔好以君子之心度小人之腹,轉插,我相信係唔記得還居多。我曾經聽過偷浴室鎊,well,都明點解有人會偷既。不過你話電視機啦喎,真係……開頭聽啲同事傳有人偷電視,以為班友吹水唔抹咀睇下伏到邊個真心膠咁弱智信啦,但其實諗諗下有幾間酒店既電視好似普遍啲desktop mon咁大,亦都唔係間間酒店部電視都46吋,所以叫屋企人黎瞓一晚然後擺落個行李箱度順手牽羊根本無難度,帶個大啲既紅白藍啫,小明上廣州都係咁啦。

你以為偷電視好底線啦,證明你入世未深唔知啲人傻的嗎黎可以去到咩地步。不過其實……唔知係正常既,等我話俾你知啦。

據說呢單係Paris Hilton既地頭(實際唔知邊間)發生既,呢個crew可能好欣賞Paris Hilton買地墊既taste啦,竟然推開張床偷走一塊地墊!!!!!嘩,使唔使呀!先唔好judge呢個crew係咪痴線,推郁張床再攞齊生財工具(唔知使唔使用劍呢???)有組織計劃咁去偷一塊仔地墊,跟住推番張床返去扮乜事都冇發生過,我真係好想同佢講句加油!

至於啲人點樣發現跟手篤爆佢呢,我唔知,我諗唔係有第二條友推郁張床打算偷地墊,呢件事都唔會見到光。又,點解佢要偷地墊呢?不過我肯定佢成日request/swap呢班機黎做,地墊唔儲齊一套點用???