飄來榴蓮之香@Ellenpedia

博客

廣告

我愛榴蓮。

很多愛吃榴蓮的人都是由恨生愛的。那天不知道那個誰買了一個金枕頭回家,你滿心歡喜開雪櫃想拿片西瓜出來消下暑先,嘩嘩嘩嘩嘩嘩嘩嘩嘩嘩嘩嘩嘩嘩!!!邊個冇陰公擺舊屎係雪櫃呀XYZ?(以上為家母慘痛的經歷)

而我,對榴蓮是一見鍾情,沒有一秒鐘覺得它臭,沒有恨過它。點解上帝可以創造個咁好食咁香既生果出黎?造物主真係好偉大。冇錯,真係好香,點解啲人會覺得呢種係臭味。有人覺得似臭狐味,大佬,邊度有啲臭狐味咁架,如果有人會釋放呢種臭狐味,你應該恭喜佢,天生就有隻咁fruity既香水,俾錢都溝唔到呢隻味。所以,我重覆,係香味。

去到BKK,唔係唔食榴蓮呀。

只不過,對榴蓮的熱愛者來說,係度食係度痾是絕對不夠的,不打包半邊返去,都好難過到自己嗰關。於是,那次,我把榴蓮放進寄倉的大行李箱帶回去了。
你會問,為甚麼不將它放進帶上機艙的那個小行李箱內,你不怕它爛嗎?

怕,但我更怕它被人當場沒收,又或者那個同事頂唔順陣味繼續幫我扔左佢。你唔係以為嗰個行李箱包得住啲味呀嘛?

唔好天真唔好傻啦,真係包唔到架。話說個大行李箱返到沙漠,海關要scan多次。等緊個行李箱係個scanner再走番出黎嗰陣,我前面個captain竟然話︰

「嘩,獲打忽,咩味黎架?成陣漏油味既???」

當然我繼續扮冷靜,之後嗰秒仲好似好熱心咁周圍望,幫佢睇下邊度漏油。不過後面嗰個韓國女人竟然好唔識趣咁話︰

「係佢呀!佢帶左榴蓮返黎呀!!!!!哈哈哈哈哈哈哈哈!」

[黑面]如果咁有幸下次再同你飛架話,唔好俾我聞到你個喼入面罐泡菜爆左出黎嗰啲味呀。[/黑面]

之後嗰半秒我禽禽青咁走左。

故事講完,唔知有邊個空姐空少又係好鍾意食榴蓮既呢?不過,個人意見,泰國既榴蓮同馬來西亞既榴蓮爭3X3=9條街。何況,要食金枕頭根本唔去泰國食,香港都買到啦,但係馬來西亞既就唔同講法。如果下次飛KUL,可以去呢度榴蓮buffet喎!(狂推push推push推push推push)

官方地址︰1, Jalan SS 2/75, 47300 Petaling Jaya (位置唔太方便,要楂車)
網址︰http://www.durianss2.com/flash/main.htm

老細是Durian Wai。無錯,佢英文名叫Durian。我收到佢張卡片嗰陣真係呆左,係咪鍾意食榴蓮到咁呀……不過我都唔差,我地食到佢認得我地,仲同我地班粉絲一齊影左張紀念性既世紀合照!!!!!

港紙五十蚊有找,食到你流鼻血!正如官方口號︰Enjoy until you get full!任你吃到飽飽!你唔使問我有咩品種既榴蓮揀,咩D24,D25定係D26,我唔知呀(我淨係記得有次好似XO味,又有隻好似牛奶味),係我既世界只係有好食,好好食,好好好食,如此類推。

有一次我真係食到天昏地暗,我直情覺得Durian Wai蝕左錢俾我,佢嗰日既balance應該係負數。你都唔知,嗰晚做機返沙漠嗰陣幾驚派派下餐流鼻血呀,真係一tray一驚心……