要出賣靈魂 梗係要靠西人@杜遊珍

博客

廣告

澳門兩大娛樂城「新濠影匯」及「澳門銀河Ⅱ期」終於宣布喺年中開張,到時合計多出近4,000間客房, 加上「亞洲最高摩天輪」、「綜藝劇場」同「加碼人造衝浪池」,話題聲勢多籮籮,似乎唔去會執輸!

由吹水到落實,始終要等到年中先有貨賣,率先登場,就係預告宣傳「口水戰」,上星期賭王之子何猷龍親自招呼港澳記者,首播新濠影匯揼本宣傳片《The Audition 》——牌頭認真唔嘢小,搵嚟馬田史高西斯( Martin Scorsese) 執導、里安納度( Leonardo DiCaprio)、羅拔迪尼路( Robert DeNiro)和畢彼特( Brad Pitt)三大巨星參演!據聞單係短片製作連演員薪酬,已經耗資美金七千萬。不過就有人表示唔抵得, 科技網站TheVerge 形容幾位荷里活大帝「Sell Their Souls for a$70M 」、畢明亦喺本地專欄慨歎創意欠奉有錢大晒……不過今次阿珍又唔係咁睇,反正都係用名人效應打開話題, 露出「國際勢力的端倪」又有乜問題?掉轉諗,若然今次千萬片酬係用嚟聘請葛優、姜文、黃曉明,咪盞令人投訴偏頗強國品味?至於為拍廣告出賣靈魂,外國人實在係見識少,上世紀不知幾多荷里活巨星放下身段、扮鬼扮馬演出日本騎呢廣告,比起今次可以做返賭城大亨老本行,都算髮型夾返個臉型,唔太失威啫!