【自助餐放蛇起底組】手指咁長~海蝦任食!! $138 街坊酒樓 任食火鍋

撰文、攝影: 自助餐放蛇起底組

任食火鍋 ：配料調味選擇足~ 生蛋任拎

最平的時段成人全包價只係$138，可以任飲任食兩個半小時。湯底不用另外加錢，而且不用加一。而火鍋配料、調味料等選擇都算多，還有雞蛋任拎。

鮮橙汁、清熱飲品 罐裝飲品多選擇

罐裝飲品除了汽水外，酒精飲品仲有jolly shandy，啤酒都有三個牌子揀，選擇算幾多。酒樓還有自家製的竹蔗茅根水和夏枯草，另外亦有鮮橙汁任斟；不過橙汁就點酸。

湯底加水越滾越淡 食物質素一般

湯底我們選了澳門豬骨窩底，入面好足料有頗多豬骨，不過打邊爐要加湯時只會幫你加水，而不是清湯，所以湯底會越煲越淡。整體來說，肉類質素全部都好一般：雞肉不夠嫩滑；手打牛肉丸簡直有苦苦地的腥味；美國肥牛質素較參差，油脂分佈要睇彩數，有些正常有些又呈黑色；唯獨是菜類同生牛肉最吸引，前者新鮮爽口，後者嫩滑軟腍。

海蝦手指咁長 鯪魚多碎骨

生海蝦望落雖然大大件，有成隻手指咁長，但食時不太新鮮，有隻肉質非常霉；鯪魚球要自己整，好多碎骨。比較特別的有炸魚皮，除了油膉味較重之外，淥一淥再食其實都算ok。其他海鮮仲有鮮大魚頭、鮮鯇魚腩、鯇魚片，選擇比較少。

彈牙魚皮餃 騎呢鮮蝦雲吞

魚皮餃外皮煙韌，中間餡料足。其中一份鮮蝦雲吞，來到的時候造型似足燒賣，食落中間竟然是雞肉，不過雖然騎呢，但又唔算好伏。

總結：酒樓火鍋任飲任食$138不用加一雖然係幾平，而且選擇都幾多，飲品、醬料選擇都夠。但重點食物的質素真係不值$138的身價，可一不可再，試完不會再想食第二次。環境幾舒服，冷氣充足、有電視睇，不過衛生情況一般般。服務方面侍應態度都一般般，尤其在我地向他們詢問「鮮蝦雲吞」的時候，回覆態度不是太好。

分數：5.5/10

長發海鮮酒家

地址：九龍新蒲崗寧遠街3-23號越秀廣場4樓(顯示地圖)
電話：2329 6228
$138任食火鍋時段：星期一至四(假日除外) 6pm-8:30pm入座
用餐時間：2.5小時