玫瑰戰爭｜網民二創「關子盈潮文」 陳自瑤連環不幸遭遇惹各行各業職場共鳴!
TVB重頭劇《玫瑰戰爭》首播即引爆網絡熱話，陳自瑤飾演嘅關子盈喺第一集留下一封字字血淚嘅遺書，控訴被身邊最親密戰友無情出賣。這段長達1分鐘嘅絕望獨白不僅令楊茜堯痛徹心扉，更意外觸動無數打工仔同網民神經，衍生而出嘅網絡二創「關子盈潮文」代表不同階層訴心聲。
玫瑰戰爭目錄
《玫瑰戰爭》首集關子盈絕望遺書訴說連環不幸
喺《玫瑰戰爭》第一集劇情入面，陳自瑤飾演嘅關子盈寫下一封遺書，用1分鐘讀白回顧自己喺娛樂圈連環不幸人生，憤恨盤點被好姊妹出賣背叛經歷，令到楊茜堯飾演嘅好友夏無雙睇完之後產生錐心之痛。這段講述女主角被精心設局陷害嘅對白極具感染力，原文寫道：
「曾經有段時期，我以為自己係全世界最幸運嘅人。出道唔夠3年就做到女主角，第一部電影就攞獎做影后。但好短嘅時間內，不幸嘅事就接二連三咁發生。我成為咗全世界最不幸嘅人。俾人雪藏、冇得做女一、好心冇好報、俾人出賣，仲俾傳媒話我係搶人老公嘅壞女人！最不幸係俾一個二個熟悉嘅面孔背叛、出賣、欺騙，落迷幻水，迫我去應酬VIP……而我，做咗一件最墮落、最唔可以饒恕嘅事。呢啲發生喺我身上嘅不幸，全部都唔係意外，係俾人精心設計同安排！一個殘酷嘅現實，能夠喺背後捅你一刀嘅人，往往就係你身邊、係你最無防備嘅人。」
觀眾狂推關子盈潮文爆發各行各業二創熱潮：人人都是關子盈
劇集播出後關子盈讀白得到部份觀眾共鳴，發起一場名為「關子盈潮文」二創作行動，代入不同職業同身份，將劇中對白改編成不同崗位「全世界最不幸嘅人」，惹笑得嚟又帶點悲傷：
職場OL關子盈：嗰班人仲夾埋設局灌醉我
有打工仔將這種被同儕篤背脊、高層施壓與跨部門卸責嘅職場文化，融入辦公室OL版本潮文之中：「曾經有段時期，我以為自己係全公司最幸運嘅人。入職唔夠3年就跳級升做部門主管，帶第一個大 Project 就攞到年度最佳員工。但好短嘅時間內，黑鍋就接二連三咁飛埋嚟，我成為咗全公司最淒慘嘅替死鬼。俾高層投閒置散、大客俾人搶走晒、幫人執屎反而俾人屈，仲俾全公司唱我係靠潛規則上位、專搶人功勞嘅心機女！最心寒係俾一個二個唔同部門、平時稱兄道弟嘅面孔背叛、出賣、欺騙，HR 扣起我條 team 啲升職名額，Finance 特登卡住我啲批款，Marketing 嗰班人仲夾埋設局灌醉我，逼我簽嗰份違規嘅陰陽合同……而我，為咗保住份工，做咗一件最墮落、最違背良心嘅事⋯⋯呢啲發生喺我身上嘅『失誤』，全部都唔係意外，係幾個部門聯手精心設計同安排嘅大龍鳳！一個殘酷嘅職場現實，能夠喺背後捅你一刀嘅人，往往就係坐喺你隔籬位、你最無防備嘅人。」
笑中有淚嘅可憐家嫂版本，將婆媳糾紛與家族矛盾推向高潮：「曾經有段時期，我以為自己係全世界最幸運嘅女人。嫁入嚟唔夠3年就生咗個仔，以為終於可以安安穩穩做個少奶奶。但好短嘅時間內，委屈嘅事就接二連三咁發生，我成為咗全世界最可憐嘅新抱。俾奶奶日日針對、屋企冇得話事、好心冇好報、俾姑仔出賣，仲俾班三姑六婆指住鼻哥鬧我係謀住副身家嘅壞女人！最不幸係俾一個二個平時笑騎騎嘅親戚背叛、單打、夾計抹黑，屈我偷嘢，逼我大時大節做阿四服侍成村人……而我，為咗頭家，居然做咗一件最懦弱、最對唔住自己嘅事⋯⋯呢啲發生喺我身上嘅糟質，全部都唔係意外，係奶奶聯同外家親戚精心設計同安排嘅大龍鳳！一個殘酷嘅現實，能夠喺背後狂篤你脊骨、捅你一刀嘅人，往往就係你身邊、你當正係一家人而最無防備嘅人！」
作為物業管理員都有難處，網民代入保安員為業界訴辛酸： 「曾經有段時期，我以為自己係全行最幸運嘅人。入職唔夠三個月就守到大堂冷氣位，第一年做就攞到屋苑優秀模範保安。但好短嘅時間內，不幸嘅事就接二連三咁發生。我成為咗全個屋苑最不幸嘅保安。俾公司燉冬菇、冇得再守大堂要巡車場、好心幫手㩒𨋢冇好報、俾同事出賣，仲俾業主立案法團喺WhatsApp群組屈我係偷食外賣兼收受利益嘅極惡保安！最不幸係每日俾一個二個熟悉嘅面孔背叛同欺騙，啲租客亂掉垃圾屈落我度，外傭放狗隨地屙屎又賴我冇看實，連外賣員衝閘撞爛度門走咗都係我食死貓，逼我俾主管瘋狂照肺寫悔過書仲扣晒啲勤工獎……而我，喺無盡嘅壓力同委屈之下，做咗一件最墮落、最唔可以饒恕嘅事⋯⋯能夠喺背後捅你一刀、篤你背脊嘅人，往往就係你身邊、每日行過笑笑口同你講『早晨』而你最無防備嘅街坊同經理」
「關子盈潮文」中學篇：我以為自己係全校最幸運嘅人
中學生版本：「曾經有段時期，我以為自己係全校最幸運嘅人。升上初中唔夠3個月就做到班長，第一次考試就全科滿分攞第一。但好短嘅時間內，不幸嘅事就接二連三咁發生。我成為咗全級最不幸嘅中學生。俾人杯葛、冇得再做班長、好心冇好報、俾人出賣，仲俾全班同學話我係靠出貓上位嘅壞學生！最不幸係俾一個二個熟悉嘅面孔背叛、出賣、欺騙，特登踩污糟我個新書包，逼我借啲功課俾佢哋抄完仲要向訓導屈返我轉頭，連平時最信任嘅老師都暗算我記我缺點，甚至連平時掃地個校工都行過嚟奚落我抵死……而我，喺堆積如山嘅功課同委屈之下，做咗一件最墮落、最唔可以饒恕嘅事⋯⋯呢啲發生喺我身上嘅不幸，全部都唔係意外，係俾人精心設計同安排！一個殘酷嘅現實，能夠喺背後捅你一刀嘅人，往往就係你身邊、一齊食小息而你最無防備嘅人。」
「曾經有段時期，我以為自己係全行最幸運嘅人。入行唔夠三年就揸到過海流水線王，第一年就攞埋傑出金牌車長。但好短嘅時間內，不幸嘅事就接二連三咁發生。我成為咗全條公路最不幸嘅司機。俾公司停更照肺、調去揸荒山野嶺線、好心等埋個阿婆上車點知反而俾人投訴，仲俾網民拍片擺上網話我係態度惡劣嘅公路炸彈！最不幸係每日俾一班最熟悉嘅馬路極品輪流加害：DC9無啦啦喺我前面急煞篤死火、單車L踩出快線逼我踩停架車，仲有啲西客特登喺車廂跌倒屈我賠湯藥費……而我，喺百口莫辯之下，做咗一件最墮落、最唔可以饒恕嘅事⋯⋯呢啲發生喺我身上嘅不幸，全部都唔係意外，係班道路使用者精心設計同夾擊！點解發生咁多事，站長你都唔幫我出聲？你有冇當過我係手足？一個殘酷嘅現實，能夠喺背後捅你一刀、篤你背脊嘅人，往往就係你身邊、一齊喺茶水間食飯吹水而你最無防備嘅行家。」
《玫瑰戰爭》楊茜堯再演復仇女王！ 由姚金鈴到余滿月 盤點7大經典角色
玫瑰戰爭｜原著小說《維多利亞的派對》結局懶人包 角色人設更殘忍！
玫瑰戰爭｜劇中復仇名錶大有來頭！國際頂級品牌特別贊助 單一畫面藏逾150萬珠寶
將來還有什麼演唱會值得留意？
有不少歌手宣布舉辦演唱會，小編為你整合了香港演唱會2025一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
