MIRROR ACE｜12子大戰世一吳安儀 呂爵安出茅招 教主絕殺結局反轉

實力懸殊特設「倍數」補底

為咗拉近大家同「世一」的實力差距，製作組特設「讓賽倍數」，只要成員打入波就可以將分數乘番自己專屬的倍數。被安儀睇高一線的「桌球天王」Tiger、Stanley、Jer同Edan只得1倍，AK、Lokman、Ian同Alton有2倍，Frankie有3倍，而「初哥」Anson Lo同Jeremy就高達最高的5倍！吳安儀畀着數大表哥Stanley 1倍，原來二人關係匪淺：「我聽日都要去你度做GYM架！」引得全場大笑。

地拖棍亂局教主表情包上身

講明係綜藝節目，當然唔少得秘密武器！MIRROR手握「移動白波」、「迷你波」、「特殊障礙」、「地拖棍」及「老鼠屎隊友」等多個離譜錦囊。一開波鏡仔已經唔客氣出動「地拖棍」，逼安儀用地拖棍代Cue，結果成功搞到世一失手打入白波跌分，之後Tiger亦順利打入一球！不過安儀始終係世一，當MIRROR再出「迷你波」錦囊將白波換細後，安儀依然百發百中不斷入波。見到世一發威，鏡仔即刻笠水變身「打氣團」，教主Anson Lo更睇到嘩嘩聲，表情包盡出超級搶鏡！節目中教主仲同Jeremy被鎖埋一齊打波，兩人默契十足，場面相當惹笑。

Edan化身「老鼠屎」出茅招

去到比賽中段，MIRROR決定使出終極殺手鐧——「老鼠屎隊友」錦囊！製作組強制將隊中的「老鼠屎」Edan同安儀鎖埋一齊。向來轉數快的Edan為咗贏真係無所不用其極，竟然瘋狂出茅招，趁安儀瞄準set位準備出Cue時，喺旁邊狂搖對方！結果世一都頂唔順呢招「物理干擾」，當場被搖到撻Cue，得逞的Edan即刻露出招牌得戚笑容，真係少啲定力都搞佢唔掂！

Anson Lo絕殺一Q反敗為勝！

比賽去到尾聲進入「生死局」，當時安儀以26分大幅拋離MIRROR的11分。面對枱面最後一個7分黑波，鏡仔決定孤注一擲，派出擁有5倍得分倍數的Anson Lo出戰！只要教主順利打入呢個7分波，乘番5倍就可以一次過擸走35分，直接反敗為勝！全場屏息以待，結果教主頂住巨大壓力，完美一Q入洞！最終MIRROR以46分絕殺安儀的26分，憑住超強（同超茅）的策略成功擊敗世一，上演一場超熱血又爆笑的反擊戰！

網民熱議十二子出茅招勝之不武

賽事細節曝光後隨即在社交平台引發兩極化迴響，大量觀眾將焦點放在眾人誇張比賽手法上。有支持者留言表示「Edan做老鼠屎真係好入戲笑到肚痛」，認為綜藝節目本來就應該充滿娛樂性。同時亦有不少網民對賽制表達強烈不滿，直斥「十二個男人恰一個女仔仲要出陰招真係勝之不武」。