迪士尼
迪士尼

土豪金米奇、泰山玩雜技!! 國產迪士尼 4大嘔泡位 |上海直擊|

旅遊

廣告

等了又等的上海 迪士尼 終於會在6月16日正式開幕,為了避免偉大的13億強國人逼爆新樂園,迪士尼更於早兩星期前開始「壓力測試」,讓樂園員工家屬及VIP率先試玩。以為玩完後會一致讚好?可惜網民齊齊鬧爆,狠批「國產味濃令夢幻感粉碎」!不過做人還是均真啲好,齋睇網上一面倒又誇大的「討伐式」報道未免太片面,《新假期》就為你請來已經率先入場的香港樂園迷——「Tho’s Dreams」版主Thomas爆料,用香港人角度考察樂園內的好玩設施!究竟值唔值得為全新國產迪士尼而勇闖強國?真係要睇過先知吧!

撰文:阿妹、Alex | 攝影:Tho’s Dreams、AFP、Getty images、網上圖片

關於上海迪士尼你要知道的是…

講真,香港都有迪士尼,為何要返強國同大媽逼仲要忍受畀人瘋狂插隊的冤屈氣?睇睇數據先!上海迪士尼佔地約390公頃,面積比香港的大超過3倍;開幕第一期已有6大園區登場,包括夢幻世界、探險島、奇想花園、米奇大街、明日世界及上海獨有的海盜主題「寶藏灣」,而為了「融入國情」,超過80%的設施都經過全新設計,其他全球各地的五個迪士尼樂園都搵唔到!最巴閉的是上海迪士尼會有全球最大的迪士尼城堡、第一間以Toy Story為主題的酒店及最長的花車巡遊路線,更有如「創極速光輪」、「小飛俠天空奇遇」、Marvel英雄當主角的「漫威英雄總部」等首次登場的全新遊戲設施,比起全球最細的香港迪士尼,上海國產樂園似乎大獲全勝喎!

3大必玩Check point!

必玩1:創極速光輪@ 明日世界

電影《創戰紀》的科幻電光世界都令唔少影迷印象難忘,今次首次以電影創作主題過山車,玩家試玩片段更在臉書瘋傳!首輪玩家Thomas表示:「過山車的椅背採用傾斜設計,巧妙為玩家營造俯身飛車坐姿,加上沿途藍白相間的鐳射打燈,有穿梭電光之間感覺,視覺效果冇得頂!」雖然係首席必玩推介,但由於採用Single Rider的設計,比一般過山車更易「攝位」補上,所以不建議用Fast Pass去玩,只要早上入場即刻輪候,玩到嘅機會就大大提高!

車軌貫穿電子世界
一開始便以最快速度衝到室外,全部人依嘩鬼叫,然後返回室內黑暗空間,沿途藍色激光與3D影像相間,歷時2分鐘車程,驚喜位一浪接一浪。

必玩2:魔盜王尋寶之旅@寶藏灣

《加勒比海盜》係迪士尼樂園經典遊樂設施, 玩家登上一艘可坐20人的船隻, 便正式出發尋寶。沿途遍滿機關,水槍噴水、鬼船長Davy Jones失驚無神出現, 好刺激!船隻駛到屏幕前方,7幕動畫包括海底世界睇美人魚、鬼盜船墳墓、突擊鬼船長巢穴等等,動畫影像高質都是賣點,對比園區其他射水划艇玩意,這個「寶藏之戰」無疑是最揼本,難怪最多人玩!

搭船做海盜
玩家坐在海盜船上,跟隨主角Jack Sparrow偷走鬼船長的珍貴寶藏,「沿途的道具如骷髏骨、寶箱都非常精美,上海版仲用鐳射大屏幕,投射動畫好逼真,玩時彷彿被人拉落水底一樣!

必玩3:「添布頓版」迷宮愛麗絲

上海園區的愛麗絲是採用Tim Burton執導的電影版本風格,為經典園區注入新氣息!「迷宮唔算特別有趣,不過勝在影相位夠多,最多人停留在『紅皇后花園』,同紅皇后影相打卡。」完場還可以於茶會戴瘋帽子影相呃like!此外,迪士尼搵錢無微不至,為了宣傳這個獨家設計園區,添布頓監製的續集《愛麗絲境中奇遇記》5月尾提前在大陸上映,實行搵錢搵到盡!

必到影相位

為討好中國民眾,園方在奇想花園設「十二朋友園」區,將迪士尼的角色化身成十二生肖,「12個角色多以配角為主,例如肖猴代表便由《阿拉丁》的阿布擔任,及肖豬代表則起用《反斗奇兵》的火腿,就連肖鼠代表都棄用米奇,改用《五星級大鼠》的小米,好抵讚!」

國產味粉碎夢幻感

樂園開幕前夕,上海「消委會」公布民調,發現原來最恨入場的,竟然係41至50歲的中年老人,而且「收入愈低愈想去」!唔怪得中國製的迪士尼,由建築、娛樂表演、花車巡遊都滲透濃濃的國產味道,連外籍演員表演都要硬背普通話台詞,正如官方所講「原汁原味迪士尼,別具一格中國風」所言非虛!至於迪士尼樂園的命脈——夢幻感盪然無存,也許讓人美夢破滅才是上海園區的一大特色?

1. 國情城堡騷全線角色「金身替代你」!

城堡前的歌舞匯演一向都是重頭節目,滿城盡帶……唔係,《金色童話盛典》的所有出場角色如白雪公主、米奇米妮、茉莉公主等通通換上土豪金裝,最後謝幕部分,好似米奇咁出色嘅男人,都幾乎淹沒在金海中,陰功!

2. 人猿泰山玩雜耍

每個園區都設娛樂表演,想見泰山可去「探險島」欣賞《人猿泰山:叢林的呼喚》,重現於叢林長大的泰山,其人性被呼喚的啟蒙故事。只可惜泰山一去到上海,隨即變了雜技員,玩雜技時間多過講故事,生活艱難啊!

3. 中式現代建築

中式建築隨處可見,古色古香的傳統建築尚好,唯獨園區布置未夠精細,Thomas表示:「園區面積係大,但行行吓會見到一大片草地, 裝飾擺設乜都冇, 大而無當之餘,仲有種由天堂跌入現實的感覺!」為夢幻國度留白,難怪粉絲會失望嘅!

4.花車巡遊 驚見木蘭

焦點節目花車巡遊,測試期間的規模雖然比香港細,不過今次新加入花木蘭馬車,造型精美,亦是全場最靚花車,唯獨試業期間,木蘭不時缺席,好飄忽!「花車巡遊無論音樂、舞步、現場氣氛都偏向平淡,欠缺parade應有的歡樂感覺,都係香港正啲!」Thomas說。

尋夢喪買平過香港

「夢幻感啊!我要夢幻感啊!」如果閣下與記者心聲雷同,咁不妨去Disney Store尋夢,雖然內地網民一致認為店舖定價太高,可是Thomas透露對比香港迪士尼,上海紀念品定價大約平近2成,加上精品款式豐富得多,加勒比海盜、創極速光輪等精品選擇多不勝數,其他如Duffy、幸運兔Oswald、小鹿斑比等卡通亦少有地設精品出售,忠粉如他一樣荷包大出血!不過, 他提醒大家購買產品前, 要睇清楚產品狀況,因為現場有小量產品出現甩線、走樣問題,中國製…你懂的!
米奇造型

Duffy精品豐富

少有如幸運兔Oswald的Tee、totebag都式式俱備。

娘味濃系列
粉紅色米妮小背囊 ¥349

紫色花花化妝箱 ¥324

姐認識你米奇老鼠嗎?

不論美國、東京抑或香港迪士尼樂園,就算你手持single rider或fastpass,來到Character Greetings環節,你都只能夠排隊等餐懵!東京迪士尼就最誇張,要用成個鐘頭先可以親近米奇影張相,是永不過時的大明星!只可惜,來到上海,一眾主角人氣即時插水,Thomas表示,唔少卡通人物更要主動兜客打招呼,場口冷清,在人潮多的時段,他亦只是等了15分鐘便能成功集郵,大明星都可以變庶民,Well,It’s Magic!

米奇米妮唔同咗樣!?
有眼厲網民睇相時發現,上海迪士尼的兩位主角竟然走咗樣!新設計的米奇米妮膚色較深,妝容消失變了「素顏」版,甚至連輪廓上都有些少出入!

極速崩壞逐件數

#1未開業已被破壞!
上海迪士尼在試營運的第一個星期,樂園設施已慘遭破壞,大媽抱野蠻小孩隨地小便、遍地垃圾、甚至在橙柱上畫上到此一遊,誇張程度令強國網民都話睇唔過眼,直斥「太丟架了」!

#2崩壞餐點超貴價格!??
樂園中的美食引來劣評如潮,尤其是價格太貴,二人套餐竟要¥250,不過其實全迪士尼餐點價格相若, 又未真係貴到太離譜,但係崩壞實物跟餐牌宣傳相比較就絕對貨不對辦,你叫我如何影相呃Like?

#3多人到影唔到相!??

#4入場要遵守獨家規則!?
上海獨家規則包括列明遊客入場時不要做破壞性的行為及排隊時要避免插隊推撞!咦?睇落似乎有啲針對性喎,難怪強國人鬧爆,香港人同外國人就齊齊拍手叫好啦!

Attention!勇闖樂園實用Q&A

睇咗咁耐,如果你仍然心郁郁想喺6月16日開幕後去國產迪士尼玩返轉,除了要有勇氣,出發前亦要好好準備!

Q1如何可以盡玩所有設施?
因為園區與園區之間的距離甚遠,所以建議玩晒一個園區先再繼續行程,而且記得善用Fast Pass同Single Rider的服務,例如在明日世界時可先登記「巴斯光年星際營救」的Fast Pass,之後再去排Single Rider Line玩創極速光輪,之後回去玩巴斯光年,類似這樣的安排就可以用最少時間玩最多設施!
Q2可以買黃牛飛嗎?
千祈唔好!因為除了買飛時要登記身份證,由朋友買飛(1個人最多買5張)都要一齊同行才可入場!而且上海迪士尼更有全新規定,入樂園時要影相作實,可見打擊黃牛飛的決心非常大,所以寧願早點訂飛,都唔好挑戰黃牛啦!

Q3窮L好想去,如何買平飛?
又想先睹為快,又想買平飛?唔係冇可能!近日旅遊網站kkday就提供購票優惠,由即日至7月31到網站購買門票即可減10蚊美金,輸入Discount Code”TTESP”再有95折,一日券由原價¥499($587)減至¥428($508);兩日券由¥950($1128)減至¥864($1,026),出發時間由6月16日至9月30日,小朋友、老人家都一樣有折,慳埋又可以買紀念品,好嘢!
網址:www.kkday.com/zh-tw/product/7076
上海迪士尼樂園

地址:上海市浦東新區川沙新鎮(顯示地圖
電話:+86-21-3158 0000
營業時間:2016年6月16日開幕,營業時間未定
交通:乘上海軌道11號線到迪士尼站
入場費:成人:¥370/HK$440( 平日)、¥499/HK$587(高峰日);小童:¥280/HK$332(平日)、¥375/HK$445(高峰日)