林敏驄金像獎後台挑機周潤發 嘲笑對方似「KFC爺爺」 竟遭發哥7字神級反擊
林敏驄後台撞正發哥 嘲笑白西裝似KFC爺爺
事緣林敏驄喺金像獎後台拎住部手機拍片，期間就撞正以一身全白雙排扣西裝、配上一頭標誌性銀髮型爆登場嘅發哥。發哥呢個look本身已經被網民瘋傳，話佢同KFC肯德基上校撞樣，只係爭一桶家鄉雞。林敏驄見到發哥，當然唔會放過呢個抽水機會，喺鏡頭前大膽以「肯德基爺爺」介紹發哥，完全貫徹佢玩得又搗蛋嘅作風，真係膽生毛！
70歲周潤發神級反擊 狠批林敏驄肥過林雪
面對林敏驄嘅挑機，發哥不但冇嬲，仲即刻發揮佢嘅影帝級幽默感，望一望著住全身黑衫嘅阿驄，語重心長咁講：「你減吓肥啦！」林敏驄即刻笑住反駁：「減你個頭咩！」點知發哥加多一腳，繼續狙擊佢嘅身形：「你拍得住林雪啦！你真係。」更抵死嘅係，發哥仲學埋林敏驄嘅招牌口音講笑：「哩（你）真係，哩（你）屎（死）得呀，我話你廳（聽）呀，真係。」兩人你一言我一語，火花四濺，令現場氣氛即時推至高潮！
發哥展現賭神風範 華麗轉身型爆全場
雖然被發哥狠批身形，但林敏驄明顯對呢位前輩非常敬重，忍唔住大讚：「嘩，你咁高嘅，你咁有型嘅。」之後阿驄請發哥對鏡頭講兩句，發哥亦非常大方配合，仲繼續扮阿驄嘅口音話：「林猛衡（林敏驄）好靚仔呀，真係。」講完之後，發哥一個華麗轉身，展現出經典「賭神」式嘅瀟灑背影飄然離去，留低一個型到裂開嘅畫面，盡顯巨星風範。
網民熱議發哥撞樣 激讚影帝玩得又有型
呢段爆笑互動影片曝光後，即刻引起網民瘋傳同熱烈討論。唔少網民都大讚70歲嘅發哥狀態極佳，仲話佢個「KFC上校」look型到無得頂，「70歲都咁型得唔得架」、「我睇個時就係覺得發哥係爭桶家鄉雞」。同時，亦有網民為林敏驄護航，認為佢雖然口衰衰，但對住前輩識得分寸：「林敏驄再亂說話，都會尊重前輩的，只是有時候需要效果而已。」睇嚟兩位巨星嘅互動，成功為大家帶嚟唔少歡樂。
林敏驄離婚後與前妻的關係是？
林敏驄與前妻2人婚姻只是維持到2008年便宣佈離婚，林敏驄更曾經公開表示…詳情請看
林敏驄的小朋友對於父母離婚有什麼行動？
在父母離異後，跟隨母親陳伶俐生活的他，曾經主動鼓勵母親主動去…詳情請看
