金像獎2026｜林敏驄被轟「不文5宗罪」 台上示範粗俗手勢 Amy Lo急救場 網民兩極反應

林敏驄台上失控誤認電視台

在頒獎前的閒談環節，林敏驄先是為自己的「導彈級洲際巡迴演唱會」宣傳，更笑指要Amy Lo當他「分身」。當Amy Lo問到若能重選分身會否考慮古天樂或「小鬼」時，林敏驄竟爆出驚人語錄，直呼「不如做姜濤？哎呀唔得喎！呢度TVB嚟！」由於本屆金像獎是由ViuTV直播，林敏驄「錯亂」的言論令全場觀眾瞬間嘩然，身旁的Amy Lo顯然嚇得不輕，面色一沉隨即幫口糾正「唔係呀！」

示範粗俗手勢「對付姜濤」

林敏驄更裝作一臉驚訝追問「唔係TVB嚟㗎咩？」隨後更變本加厲，開玩笑指姜濤已取代金廣誠成為「ViuTV總經理」，令現場氣氛陷入尷尬與愕然。Amy Lo多次嘗試圓場並引導回頒獎主題，但林敏驄依然不願收聲，更宣稱對付姜濤非常簡單，即場向Amy示範並教導一招手勢，直言「呢招叫猴子偷桃！」Amy Lo見狀嚇得馬上縮手，隨即帶入提名片段，避免話題繼續失控。

林敏驄早有前科紅地氈已搞錯

其實早在頒獎禮開始前的紅地氈環節，林敏驄與Amy Lo同樣一起接受ViuTV主持的訪問，林敏驄當時已經指著直播鏡頭以為是TVB，幸得主持陳安立（Brian）即時糾正為ViuTV。這次台上的「失控」表現，令不少網民質疑他是否真的搞錯，還是刻意製造話題。有網民指出「Viu已經播左5屆」，認為林敏驄不可能真的不知道是哪個電視台負責直播。

「唔食都含住」調戲女嘉賓

《第44屆香港電影金像獎》在香港文化中心舉行，紅地氈一向被視為星光雲集的重頭戲，今年卻因為林敏驄一句「唔食都含住」成功搶走所有焦點。當晚多位電影人輪流踏上紅地氈接受訪問，《觸電》拍檔林敏驄與盧慧敏（Amy Lo）一同現身，原本被視為輕鬆寒暄的直播環節，卻瞬間變成無厘頭綜藝騷現場，連在場觀眾同網民都話睇到「O嘴」，討論度即時爆燈。

對Angelina一句「你邊位」立即打破禮貌模式

負責紅地氈訪問的新人主持趙君瑜（Angelina）見到林敏驄即刻送上恭維，大讚對方「好靚仔」，希望借住禮貌寒暄拉近距離，但林敏驄反應卻一如以往直線又直接。佢不但無按公式回一句「你都好靚」，反而望住對方問：「你邊位呀？」這一句突如其來的發問，令鏡頭前後都一時靜咗半拍，再伴隨主持尷尬笑聲，同場演員就笑到收唔到聲，直播畫面瞬間充滿種微妙的「唔識笑定唔識唔笑」氣氛。在直播鏡頭之下，Angelina即場畢恭畢敬回應「我係Angelina」，乖巧自我介紹，嘗試穩住場面，既要保持專業，又要配合前輩的幽默節奏。林敏驄再望一望鏡頭，又再補幾句笑話，令整段訪問傾向娛樂效果多過正式訪談，網民事後重溫片段，都覺得這種有點失禮又有點好笑的互動，係最典型的「阿驄式」無厘頭，同時有人批評太直接，有人就話佢只係口快心直，睇慣佢電影就知呢個風格早有前科。

香腸從小食變成矚目焦點

訪問期間現場工作人員遞上小食，林敏驄一見到手上的香腸，立即將它變成搞笑道具，隨手舉起香腸對住鏡頭，再轉向身旁的盧慧敏，擺出「餵食」姿勢令畫面充滿喜感。盧慧敏當場露出有啲驚訝又要保持禮貌的表情，介乎想笑又唔好意思笑之間，這一幕亦被直播鏡頭完整捕捉，成為當晚紅地氈最令人大叫「好尷尬呀」的瞬間之一，不少網民之後重播截圖，更直言這一條香腸成為全場最搶戲的配角。

網民反應兩極化激烈討論

事件在網上引起激烈討論，網民反應呈現兩極化。批評聲音佔大多數，有網民直言「林敏聰呢個人真係令人10分討厭」、「悶到跌渣都算，仲整個全晚主持界災難級尷尬場面」、「幾十歲人，仲兩扮幽默，風趣，不如算把啦」。亦有網民認為他的行為不合時宜，「呢個年代仲on9當有趣，仲要佔人便宜真係核突報警」、「將不知所謂發揮得淋漓盡致」。不過也有少數網民為他辯護，認為「佢醒過在場所有人N倍啦，點會講錯野」、「擺明串tvb」。