美食新聞報道｜大廚莫燦霖帶波波食好西！土瓜灣隱世小店焗魚腸媲美名人飯堂？

莫燦霖激讚燒煎大白鱔 「平凡中顯不平凡」

節目中，首先上桌的燒煎大白鱔已叫人食指大動，莫燦霖師傅笑言遠處已聞到香味，他專業分析道：「呢味菜師傅只係輕輕掃薄粉就咁煎，應該乜都無做。反而喺味道拿捏師傅做到好準確，所以話做菜唔使下下都要做到與別不同，平凡中顯不平凡，先係最高境界。」波波試食後亦讚不絕口，大讚外皮焦香，同時完美鎖住豐富肉汁。一旁的老闆娘吳太更自信滿滿地誇口，表示這道菜是獨家出品：「事前有好多功夫，除骨、除刺要好多時間，係我哋呢度先有，第二度都無。」可見其製作過程絕不簡單，充滿匠人精神。

炸菜蒸牛肉勾起童年回憶 波波連扒兩碗飯

另一道炸菜蒸牛肉更令莫師傅勾起童年回憶，他興奮表示：「啲牛肉靚過我哋細個食嗰啲，呢啲係手切。蒸完之後個汁仲可以撈飯，係我哋細路仔時食嘅家庭小菜。」簡單的菜式卻充滿人情味，令同場的波波忍不住即時點了兩碗白飯，用濃郁的餸汁撈飯，場面搞笑又貼地。最後老闆娘推介的雞蛋砵仔焗魚腸更是手工菜的極致，魚腸需汆水兩小時去腥，工夫繁複。莫師傅坦言此等水準的焗魚腸，自己只在某間名人飯堂吃過，大讚小店出品足以媲美，絕對是隱藏在舊區的驚喜美食。