《 Prison Break 》第五季開拍! 靚仔男角Miller強勢回歸

《 Prison Break 》第五季預計明年開播！翻煲頭四季止癮！

第五季落實開拍，預計明年播放，相信聽到呢個消息嘅Fans們，腦海中一定浮現好多回憶出來。對於某啲人來說，《Prison Break》某程度上係打開佢哋美劇之門嘅神劇！唔知大家仲記唔記得第一次睇到Michael身上面紋身嘅震撼、第二季接二連三死亡嘅角色、第三季編劇罷 工潮期間嘅焦慮，同埋第四季令人傷心嘅結局？如果記憶好模糊嘅話，快啲翻煲一至四季，為第五季播出前止住癮先！

Prison Break Season 5 Trailer

睇完Trailer之後，大家係咪睇到O哂嘴呢？你哋無眼花啊，編劇話之前Michael嘅死只係假死，喺嚟緊新一季，男主角兩兄弟將會重聚！雖然假死呢個理由唔係好夠說服力，但作為Fans邊會理得咁多啊？見到靚仔男主角強勢回歸，乜都夠哂啦！

而根據早前官方放出嚟嘅劇照，除咗男主角兩兄弟同Sara之外，其他主要劇組成員Robert Knepper、Rockmond Dunbar 同Amaury Nolasco 都好有機會再次參與Prison Break嘅製作，保留原汁原味！

到底Season5會有啲咩新嘅劇情？呢方面嘅資料真係少之有少，不過製作公司Fox前排就透露咗一句說話，內容大概就係講，當有線索顯示Michael重有機會在生，Lincoln同Sara就夾埋一齊進行Prison Break史上最大型嘅逃亡！

同場加映：男主角Miller暴肥之謎

當Prison Break第四季完咗之後，飾演男主角Michael Scofield嘅靚仔演員-Wentworth Miller，就被網民發現佢越來越肥，劇中Fit到漏嘅身材變咗一團肉，食開花生嘅網民就不停惡搞啲圖片嚟恥笑佢。

而有一日Miller見到呢張圖片，終於都忍唔住回應…

Miller轉載「The LAD Bible」肥瘦比較嘅惡搞相，向網民盡訴心中情。佢話自己於2010年就開始過半退休生活，最主要係因為自己有自殺傾向，而呢個話題已經公開討論過。

2010年係佢嘅人生最低潮，佢不斷尋找可以令到佢分心、安慰，紓緩嘅事物。而最後佢選擇了食物，而呢個就係佢暴肥嘅原因。佢仲話，其實可以選擇藥物、酒精、性愛，但食嘢係佢最期待嘅事，每個星期最開心嘅時候就係享受自己最鍾意嘅食物同埋新一集《Top CHEF》。

真係唔講唔知Miller戲裡戲外都承受住命運嘅煎熬，每個演員嘅背後都有一段辛酸嘅事。不過就如大家喺Trailer睇到嘅一樣，Miller而家嘅身形已經回復返當年嘅水準！雖然唔知佢好返未，但作為Fans，唯一可以做嘅就係再次奉上幾個通頂嘅夜晚去追劇以表支持！