立體相機工作坊 「相簿」極像真!!! 文青必整 |屯門好去處|
立體相機工作坊 文青必整
今次嘅「相機」一共有3種顏色，Mandy就選擇咗復古風嘅啡色。
由於立體相機製作工序複雜，所以上堂前導師會預先製作定部分素材，以機身為例，因為每一個步驟都絕對唔可以出錯，所以導師會預先準備好，減低工作坊難度。所以學員要製作嘅部分主要係鏡頭、閃光燈、機頂按扭同埋相簿。
選擇喜愛紙款
每次工作坊，第一個遇到嘅難題都係選紙，因為實在太多選擇，花多眼亂。
揀完紙，裁好尺寸就可以裝飾機身。
製作鏡頭
有某d步驟需要用到膠水，記得要好好控制膠水份量，如果太多膠水會就出晒界，咁就唔靚㗎喇。
黐鏡頭上機身時，記得就啱位，黐喺中間先靚㗎！重點係：個鏡頭仲可以轉㗎！
製作機頂按鈕
嚟到最難嘅部分，就係按鈕喇！機頂嘅按鈕其實係一個個圓柱體，要將紙剪成「太陽」狀，再將佢屈成「汽水蓋」狀，黐返喺紙上固定好，就完成一個圓柱體喇。
呢個過程真係好花眼力，要好有耐性先可以完成。
嚟到呢個步驟，成部相機就幾乎完成喇。
製作相簿
最後，只要將一開始揀好嘅紙，簡單剪貼成機身背後嘅相簿，咁就大功告成喇。
完成
成個製作過程大約4個鐘，雖然都將花時間，又考眼力，不過整完之後真係好有成功感！如果你鐘意影相，又或者你送禮物嘅對象鍾意影相嘅話，呢個工作坊就啱晒喇！
