【18區掃食】拉2尺粉紅水母芝士漢堡! 大窩口 5大飽肚小店
撰文、攝影:Undercover 餓底覓食
抵食川菜 食過返尋味
喜歡食辣的，一定要試下呢間川菜，價錢十分相宜，而且分量又好足，最緊要係夠辣又好食！
上例同下例係指食胸定係髀，當然要試下髀啦！雞好夠滑，個汁好惹味！食得辣嘅可以挑戰再辣啲，因為對於唔太食得辣嘅小編，小辣都好容易接受！
老闆極力推介嘅肥腸，個個食完都會返轉頭！肥腸炸到脆一脆，好香口！記住要趁熱食呀！凍咗就有啲硬，較難咬啦！
麻辣牛展就食得多，牛脷就真係未食過！牛脷煮到好腍，加埋個麻辣汁，真係好正啊！嚟多個白飯呀，唔該！
食得太多肉，就會想食啲蔬菜類清新下！四季豆炒得好入味，辣辣地，一個餸已可隊成碗飯！
川菜中my favorite就係土豆絲啦！可以揀熗炒或者酸辣，當然要試酸辣啦！酸味偏重，可能係叫咗小辣關係，再辣級會更惹味！
除咗有汽水啤酒，呢度仲有自家煲嘅五花茶，都幾解辣，要試下！
紅四川
地址: 荃灣荃富街23號富麗花園商場地下55號舖 (顯示地圖)
營業時間: 星期一至日 11am-11pm
電話: 2612 9977
拉絲力驚人 粉紅水母芝士漢堡
一開舖已經有好多熟客仔排隊等食！全部食物都係老闆即叫即整，人多時候真係要慢慢等。不過要食好嘢，等下又有咩所謂呢！
未食之前真係覺得好似吹波膠！其實係紅菜頭芝士！見到舖頭貼咗好多相都話芝士可以拉到幾十cm高，食之前等我哋又嚟試下先！
唔講咁多睇片最實際！
如果唔想食粉紅色漢堡咁驚嚇，可以試下呢款，話明係田園，除咗好多蝦粒之外，入面重有番茄，生菜，菠蘿，洋蔥，超足料！而蝦堡個黑松露芝士醬，多到滿溢，好滿足呀！
熱辣辣嘅玉子燒，未食已聞到好香黑松露味，切開仲有好多魚子！
自家製XO醬好夠辣，配魷魚好惹味，可惜個汁有少少稀，再濃啲就更加正！
魚蛋好滑又夠彈牙，加埋老闆特製沙爹汁，辣辣地好惹味！而且like同share佢Fb page，請你食添呀！
日日口味唔同，今日係五花茶，食咗熱氣嘢，飲返支下火就最正！
鮑記大食部
地址: 荃灣徳士古道富麗花園商場B地下38A舖(顯示地圖)
營業時間: 星期一至六 2pm-12nn，星期日 11am-8pm
電話: 9813 8463
街坊食堂 上海麵+煎雲吞
如果唔想食burger，行過條街就可以食碗麵！店小小但都好旺場，不停都有荃灣街坊嚟幫襯！
上海麵底可揀加豬扒、雞翼和雲吞，仲可揀落雪菜或榨菜，成個麵就更加香！我就推介大家揀牛腩，炆到好腍，入口即溶，超好食！
雲吞好大隻又飽滿，充滿韮菜和豬肉，再煎到脆一脆，讚！
可能整好一段時間，上枱時已經凍凍地，肉身有啲乾，放入麵食會較好！
上海津味小食店
地址: 荃灣徳士古道富麗花園商場地下 (顯示地圖)
營業時間: 星期一至日 7am-10pm
電話:從缺
宵夜必去 $14厚切油甘魚手卷
放工夜媽媽想食下夜宵，呢間居酒屋就啱晒，開到凌晨一兩點，夜收工都有日本嘢食。
本身魚生飯底就已經有店主自家製玉子、蟹柳、漬物和蟹子。魚生就另外加錢，大部分刺身都係$8至$18蚊，最貴都係$38蚊的加拿大海膽！刺身好新鮮，即場切，只係飯底太黏呢個係敗筆！但呢個價錢食到新鮮魚生飯，真係抵到爛！
油甘魚超厚切，大滿足！記住一上就即食，紫菜唔脆就唔好啦！
推介！咬落去每一啖都係啖啖南瓜肉！而且又唔會炸得好油，真係好好食！
即叫即燒，調味太重手，好鹹！
夏天熱辣辣的時候飲真係好清新，又唔會太甜，消暑解渴！
平時飲益力多都會覺得太甜，但加了檸檬，兩樣野又幾夾喎，酸酸地中和返益力多個甜，值得一試！
日鮮地踎居酒屋
地址: 荃灣荃富街富麗花園商場地下65號舖 (顯示地圖)
營業時間: 星期日至三 12:30pm-1am
電話: 9103 2691
朱古力火鍋只賣$90 晏晝去仲有8折
食飽飯嘅指定動作，就係四圍搵下有咩甜品好食！行多幾步就見到有間環境靚靚嘅甜品舖！原來星期一至日12nn至6pm呢段時間重做緊優惠，所有甜品都有8折！
唔駛去高級餐廳就有嘅朱古力火鍋！一個已經足兩人分享，有兩球雪糕，、香蕉、士多啤梨、奇異果和棉花糖。
一上枱就知道係呃like之作，多士方磚砌到好靚，頂頂重有一球雪糕同雪糕筒！
榴槤季又到啦！喜歡食榴槤的朋友，又可以四出尋槤！班戟切開好香榴櫣味，重要超多果肉！如果雪糕有得揀榴槤味就更加好。
推介！原來蛋布甸下重有一個驚喜布甸！店主將入面嘅椰青水整成啫喱，可以連埋椰子肉一齊食！
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
