電車婚禮
電車婚禮

$800日本搞 電車婚禮 !!! 「兵庫縣站長」就係我老公

日本

廣告

各位兄台,搵唔到餐餐陪你捱麥記嘅女友唔緊要!最緊要搵到800蚊 婚禮 都收貨嘅未來老婆。日本北条鐵路搞咗個 電車婚禮 活動,歡迎準新人租車搞婚禮,最平套餐800蚊有找,平時出街食豪啲都差唔多價錢,辦婚禮絕對唔係夢。呢個活動上年12月底開始進行,但就唔係太多新人知。只要搵啱季節嚟,路旁就會長滿櫻花或紅葉,影輯靚相就值回票價。

 

有趣 電車婚禮 .站長就係我老公

驟眼睇,呢個婚禮幾有feel㗎。新郎打扮成站長,每個來賓都要出示電車帖,人齊就開始儀式。姊妹們或者細細個都會幻想婚禮喺邊搞,大多數唔係教堂沙灘,就係花園。不如特別啲,嚟個懷舊式田園電車婚禮,保證一生難忘。不過,如果想成個婚禮睇落高貴啲,或者可以買啲靚啲嘅裝飾,譬如放啲花喺車廂,甚或將教堂嘅佈置遷移至電車內,感覺就會好浪漫。或者一切從簡都未嘗唔係好事,最重要喺呢個旅程唔單止係婚禮,仲可以順道Honey Moon,一舉兩得,慳返唔少㗎。

3色電車任你揀 婚禮最平$790

呢到有3種顏色電車俾新人揀,包括紅色、紫色、綠色,每隔車坐到55至57人,連埋企位一共容納到116至120人,請幾圍親友嚟觀禮都得呀!雖然每隔車可載人數量唔同,但價錢都係一樣,視乎新人想唔想兜風。如果選擇唔行車,每輛車一個鐘11,000円(約港幣$790),行車就一小時22,000円(約港幣$1,575),單程或回來任你揀,但當然要「老黎」就揀單程嘅愛情號,如果來回的話…你明啦!行車路線由「北条町駅」到「粟生駅」,共8個車站。

沿途風景花草為主,一路行車一路舉行婚禮,感覺就好似坐上南瓜車,走入仙境。其實平平哋都可以有個浪漫婚禮。就算想加鐘,不論行咩路線,每小時只需加2,000円(約港幣$143),忍唔住都要講句:「好經濟實惠。」相比起喺香港搞電車派對,每小時最平都要$1,550,仲指定最少2小時,即係一程都過三千蚊,不如飛一趟日本搞婚禮連蜜月旅行仲抵呢。

報名之前不如睇下片,評估自己接唔接受到另類婚禮啦。諗深一層,如果舉行婚禮考慮價錢先,旅行結婚就一啲都唔容易。兩個人嘅事就話平,如果俾埋親友機票住宿錢,都係再計過條數好啲⋯⋯再儲下錢吧。

兵庫縣北条鐵路

地址:日本兵庫縣加西市北条町(顯示地圖
備註:有關租車事宜,詳情見官方網站