高雄 大魯閣草衙道 購物中心開幕! 新景點食買玩指南

大魯閣草衙道 高雄最新景點

相信大家睇完段片之後，已經比佢洗左腦…甚至可能有人已經一路唱住ready steady go!!ready steady go!!!一路訂去高雄嘅機票。睇完條咁洗腦嘅片，希望大家個腦都重可以運作，因為以下落嚟將會同大家慢慢介紹呢個購物中心到底有幾犀利！

購物篇：韓牌時裝、運動大牌！買到你手軟

Shopping 方面，「大魯閣草衙道」1樓主要為戶外運動品牌，包括NIKE、New Balance、PUMA等，其中Adidas、UNDER ARMOUR、SKECHERS更加係高雄最大嘅旗艦店添！

除了傳統運動品牌，韓國Fast Fashion brand，H:CONNECT都係呢個購物中心到開旗艦店！旗艦店除咗佔地面積特大，新出嘅貨品重會同韓國果邊零時差，完全同步推出！而且重會引入H:Cafe販售韓系甜品，將Shopping同暴食結合，邊買邊食，爽！

玩樂篇：迷你版F1賽車＋保齡球場＋機動遊戲任你玩

從日本獨家引進嘅國際主題樂園「鈴鹿賽道樂園」，大人細路都啱玩，入面嘅玩樂設施多到玩成日都玩唔完，就等我係到同大家介紹有邊幾個係必玩嘅！

1. 迷你版F1賽車道－迷你鈴鹿賽道

由日本鈴鹿賽道獨家授權的鈴鹿賽道，係F1賽車的賽道。雖然就無咩可能將成個F1賽道搬去樂園入面，但商場方面就整咗個10:1縮小版嘅「迷你鈴鹿賽道」，車道全長600米，遊客可以開著高卡車，喺8字形嘅跑道上面比賽，唔多唔少都可以感受下F1賽車嘅刺激程度！

樂園方面上傳咗一段360度嘅環景影片，等大家可以盡覽呢條迷你F1賽道，其實淨係聽聲都知有幾爽啦！

2. 滾吧－保齡球館

呢個保齡球館淨係睇個樣，都覺得佢充滿科技感，館內使用咗全台獨家引入嘅「MyBallSystem」量度手指及磅數器材、USBC PBA專業賽事指定球道等多項國際級設備，高科技到好似去咗2046年碌齡咁呀！

3. 機動遊戲

唔識碌齡？又唔識玩高卡車？唔緊要，因為樂園入面重有好多刺激嘅機動遊戲！

1.摩天輪 Circuit Wheel

2.自由落體 Drop Zone （跳樓機）

3.旋轉木馬 The Carousel

美食篇：美食雲集，LEGO都食得！

話明係主題樂園，又點會淨係得咁多嘢啊？入面嘅餐廳又係多到數唔哂，包括日本人氣涮涮鍋「しゃぶ葉（SYABU YO）」、韓國地道嫩豆腐煲「豆腐村」、經典風味咖喱「印度皇宮」，真係乜式嘅美食都有，甚至過份到有埋LEGO式添啊！

原本只係喺台灣北部有據點嘅「BRICK Works」，亦都進駐咗入呢個購物中心，成間舖都被LEGO包圍，就連食物入面都見到LEGO人仔嘅身影，可以邊玩邊食，但記得到時唔好食錯隔離果舊膠啊！

期間限定，迪士尼「TSUM TSUM玩轉派對」！

之前錯過咗台北、台中、台車三場嘅「TSUM TSUM」Fans唔駛失望，因為迪士尼「TSUM TSUM玩轉派對」搬到去「大魯閣草衙道」1樓嘅「異想空間」入面繼續展出，展期由5月9號去到6月20號，有與趣嘅Fans記得記得要快啲去啦！事關呢個「異想空間」係會不定期舉辦活動，過左6月20號之後就連米奇老鼠條尾都見唔到啊！

大魯閣草衙道 TAROKO PARK
地址：前鎮區中山四路100號（中山四路/中安路口，捷運草衙站 2號出口旁）（顯示地圖）
營業時間：週一至週四：11:00-22:00；週五：11:00-22:30；週六：10:30-22:30；週日：10:30-22:00；特殊營業時間除外
電話：+886-800-786-999
官方Facebook：https://www.facebook.com/taroko.park.kh/
鈴鹿賽道樂園 Suzuka Circuit Park
地址：前鎮區中山四路100號（中山四路/中安路口，捷運草衙站 2號出口旁）（顯示地圖）

營業時間：週日至週四：10:00-22:00 ；週五週六及例假日前一天：10:00-22:30
電話：+886-7-796-7766
官方Facebook：https://www.facebook.com/SuzukaCircuitPark/