試食法國曲奇總有河國榮 @Dining娜

(Presented by A La Bakery)

講起曲奇餅會諗起咩？諗起啲濃濃嘅牛油香？近期就梗係諗起河國榮啦，佢突然同曲奇餅扣上密不可分嘅關係……今次河國榮到A La Bakery試食法國曲奇餅，等我Dining娜同大家介紹番，河國榮究竟讚定彈啦！

有請河國榮試食點評

Dining娜第一次見河國榮，佢的確好鬼風趣，而言談間發現佢對曲奇餅幾有認識，睇嚟Dining娜都未必夠佢咁識飲識食！今次河國榮試食嘅係3款手造曲奇，分別係黃金曲奇、朱古力杏仁曲奇同開心果曲奇！Dining娜就覺得一塊出色嘅曲奇要夠鬆化，咀嚼嘅時候有咬口，賣相要好睇，如果味道有驚喜就更好，所以今次一於由呢幾方面請河國榮點評！

點評手造黃金曲奇：原味牛油香濃郁，咬落鬆化，面層嘅黃金糖令曲奇變得閃令令，加分！

鬆化指數：◆◆◆◆◆

咀嚼指數：◆◆◆◆◇

賣相指數：◆◆◆◆◆

驚喜指數：◆◆◆◇◇

點評手造朱古力杏仁曲奇：朱古力味夠重但唔會太甜，同時亦保留到牛油香！

鬆化指數：◆◆◆◆◇

咀嚼指數：◆◆◆◆◇

賣相指數：◆◆◆◆◆

驚喜指數：◆◆◆◇◇

點評手造開心果曲奇：幾有新意！開心果與曲奇味道混為一體，如可加多1粒開心果更好！

鬆化指數：◆◆◆◆◇

咀嚼指數：◆◆◆◆◇

賣相指數：◆◆◆◆◇

驚喜指數：◆◆◆◆◆

好食因為100%法國味道

主廚話A La Bakery嘅曲奇餅係100%用法國材料造，加入咗Perrier法國有氣礦泉水，全人手製造，採用無基因改造原料（GMO free），無用雞蛋，更無加防腐劑，令曲奇餅更天然更好食！今時今日要食好嘢，使乜大排長龍呀！

點只得曲奇咁簡單

咪以為A La Bakery只有曲奇餅食呀，其實仲有唔同款式嘅法式麵包、牛角包、蝴蝶酥同Macarons，全部原材料都由法國運到香港，正宗「來路嘢」呀！好似河國榮咁，係外國同香港融合而成嘅高質代表～

做一陣法國人！

走法國風情嘅A La Bakery，店外睇已經充滿法式風情，而舖頭主色係深藍色，行入去就見到一幅以巴黎地圖為藍本嘅彩繪牆，麵包櫃上仲放咗好多彩色動物手工藝擺設，其實係老闆蔡和平先生有一次到緬甸旅遊時，見到一班小朋友喺手工藝店好俾心機繪製，非常欣賞，覺得小朋友創作好值得支持，於是全部買晒，放喺店入面做裝飾，令成間店舖更有格調。客人可以揀心水嘅嘢食後，再點1杯咖啡，坐喺店入面慢慢品嘗，非常之咁休閒～蔡和平先生話打算稍後將彩色動物義賣，所得善款全數撥捐作慈善用途，想買番隻做下善事就密切留意A La Bakery Facebook專頁喇！

後記: 原來早喺試食之前，河國榮自己已試過A La Bakery嘅麵包，睇嚟唔只曲奇餅，麵包都好吸引～

中環店

地址：中環干諾道中68號華懋廣場第二期地舖

電話：(852) 2121 1118

營業時間：

星期一至五：7:30am – 7:30pm
星期六：8am – 6pm
星期日及公眾假期休息

尖沙咀店

地址：尖沙咀彌敦道100號The ONE地下GA05號舖

電話：(852) 2779 9977

營業時間：星期一至日：9:30am – 10:00pm