經典重溫!10首最好聽的卡通片主題曲!

我們永遠的叮噹-林保全先生在上星期逝世,一班聽住佢把聲大的「大雄」都非常傷心,在Facebook一遍愁雲慘霧。不過~ 譚玉瑛姐姐都話啦,「只要記得我,咪得囉!」
以下的卡通片主題曲你又記唔記得呢?不如一齊重溫一下!

1. 《宇宙大帝》

主唱:張國榮
可能你也已經忘記了宇宙大帝的故事內容,但其主題曲就應該好深刻吧!由張國榮主唱的主題曲太經典了!當時那有很多個版本惡搞這首歌,例如:

  • 神奇大帝穿左個窿,娶左三位妾侍。有個靚、有個痘皮、有個斷氣就黎死。
  • 神奇大帝死係太空,三位忠心妾侍:有個放屁,有個豆皮,有個老豆就黎死。

你的版本是哪一個?

 

2. 《忍者小精靈》

主唱:小太陽合唱團

有無覺得忍者小精靈同叮噹畫風好相似?忍者小精靈也是一位叫藤子不二雄的著作啊!不過唔係叮噹的漫畫家藤子F不二雄所畫,是藤子不二雄A的作品。但最重點是雖然它是80後的經典卡通片,但90後都一定會聽過這句「又越過高山 又越過谷」,因為身邊都總會有人不時唱下呢兩句歌詞啊。

 

3. 《足球小將》

主唱:張衛健

足球小將是80年代的卡通片,雖然已逾三十年,但當中的經典必殺射球術語到現在還是會不時出現,如「衝力射球」、「倒掛金勾」等。及後,張偉健主演的《功夫足球》亦用此主題曲作為其劇集的片頭曲。

4.《IQ博士》

主唱:梅艷芳

完全唔覺得係梅姐唱!因為唱腔實在太跳脫了!想不到梅姐除了平時中性的唱腔,小朋友唱腔都控制得手到拿來。這個80年代在大台播放的卡通片,我夠膽肯定!連00後的小朋友都識唱!

5.《叮噹》

主唱:環星兒童合唱團

不用再說了,叮噹主題曲當然是經典中的經典!(當然林保全先生扮演叮噹的聲音也是整套卡通的精髓!)叮噹主題曲其實有好幾首,由第一首「圓圈加一點」到廖碧兒的「多拉A夢」共有4個版本,但是最令人深刻的一定是以下這一個版本嚕。

(陳慧琳版本都唔夠合唱團版本經典啦!同唔同意先?)

延伸閱讀:《穿梭機》之後《icu》之前,經典兒童節目你識幾多

下頁續

6.《四驅小子》

主唱:吳婉芳

當《四驅小子》播出之後,四驅車熱潮風靡一時,每一個男生(甚至女生)都會嚷著父母要架玩具四驅車,啲車仲要貴到阿媽都唔認得。你架四驅車仲健在嗎?

7. 《櫻桃小丸子》

主唱:歐倩怡

到現在還懂得背晒全首的朋友請舉手。相信櫻桃小丸子真的對90後影響很深,因為你會發現自己身邊都總會有一個小丸子的同學在左近,例如非常自戀的花輪同學、經常唔出聲成日陰陰咀笑的野口同學⋯⋯還有想小丸子一樣成日胡思亂想的自己。

 

8. 《咕嚕咕嚕魔法陣》

主唱:滕麗明

「變化難去估 豹變成老虎 你會問何故」睇到字有無聲先?其實老實講套卡通片的內容我都已經唔太記得,只係記得有個好煩膠成日唔著衫的結他他老伯。但首歌我到而家仲識唱。Btw,有無人答到我點解以前啲卡通片唱好聽過而家咁多?

9.《美少女戰士》

主唱:周慧敏、王馨平、湯寶如
是少女們最愛的美少女戰士啊!當時周慧敏、王馨平和湯寶如出了MV後簡直是小女生們的偶像。她們就像是美少女戰士的真人版(她們也真的Crossplay 過美少女戰士)。其實《美少女戰士》的主題曲也有好幾首,不過最後還是忍痛選了這首出來~

 

10. 《寵物小精靈》

主唱:陳浩民

其實呢首歌真係聽到人好熱血,唔知點解。想當年我都跪求咗我媽子好耐叫佢買本精靈圖鑑俾我,買完之後就拎住本精靈圖鑑精讀,勤力過考試呀!不過我真係唔明點解小智班人可以咁蠢,次次都認唔到火箭兵團⋯⋯ 武藏小次郎都仲話有得喬裝,咁喵喵怪呢!!!點解會唔認得!

 

其實經典的卡通片主題曲又怎會只得10首?仲有我最喜歡的忍者亂太郎呢!不過有廣東話版的主題曲係零舍有味道嘅,你們心目中的最經典卡通片主題曲又有哪些?一起開心Share 吧!

 

延伸閱讀:2014回顧 新假期YouTube 10大排行榜/美少女戰士Pop [email protected] Chan

最新吃喝玩樂資訊