貓奴必去！日本首間 豹貓森林Café 英氣登場
豹貓森林Café 隱身雜貨店
受各地貓奴潮聖的豹貓森林Café（KURASHIKIヒョウ猫の森）就係置身於岡山縣倉敷美觀地區內的雜貨店「倉敷の猫屋敷」之內，雜貨店門前大量的貓咪雜貨已經會吸引到貓奴們的注意，再加上門口大大個招牌指示，貓奴們經過都好難會錯過間Café！
Café 以門票制入場，貓奴們買咗飛喺入面就可以由朝玩貓玩到晚，唔駛怕一般日本Café所設的逗留時間限制。
嚟到門口買飛即可入場！大人/¥600（約港幣＄43），小童/¥300（約港幣＄21）（圖片來源：岡山の地域情報サイト「Tikiナビ」 @Tikinavi）
以森林為主題的Café佈置可以話非常認真！全個環境都以綠葉包圍住，枱枱凳凳亦以木頭打造，亦提供到位置畀豹貓們喺度爬嚟爬去，成件事好wild！
豹貓超萌現身
話明品種係豹貓，品種最簡單的講法就係「豹品種 X 貓品種」，咪以為兩個品種撈埋嘅豹貓就難以近人呀，佢哋經過培訓後已經變得非常溫純！而佢哋亦有「孟加拉貓」的別稱，生性佻皮活潑，一身豹紋加一對綠寶石貓眼，仲大賣萌樣，已經足以令人目不轉睛，唔少去咗朝聖的貓奴們都畀佢哋氹得如痴如醉！而Café足足有10隻豹貓坐陣，貓奴們有獨佔玩豹貓的機會～
佢哋未算太高鬥，都好畀面同客人們玩㗎！
かわいい笑 京都のヒョウ猫の森 大野くんパイセンときてます^ ^ #猫#cat#ヒョウ猫の森 #ベンガルキャット か#kyoto#新京極
小畑 勇里鳳（@yuriho7123）張貼的影片 於 張貼
#ヒョウ猫の森 #抱っこダメは逆に萌ぇ#みんな顔デレデレ#鼻血拭いてください#隣の子アレルギーかわいそう takeshima（@ktakeshima）張貼的影片 於 張貼
與豹貓玩前要注意！
睇完之後係咪好想親手抱抱佢哋呢？但原來 Café 有明文規定，除非豹貓大人主動行埋嚟你度痴住你，如果唔係客人們係嚴禁抱起貓主人！而如果客人犯規而導致受傷，Café係絕對唔會負責，所以各位貓奴要忍忍手喇！
另外，客人們亦唔好大聲喧嘩同追逐嬉戲，雖然見到貓主人好興奮，但大家都要切記要遵守唔好影響他人呀！
而同完豹貓大人高興完，相信各位貓奴都會懷住依依不捨的心情離開啦～放心！呢度有齊豹貓紀念品專區，貓奴們臨走前可以買返幾份紀念品以解日後相思之愁～
KURASHIKIヒョウ猫の森
地址：倉敷市中央1-1-3 倉敷の猫屋敷2階（顯示地圖）
開放時間：9:30am－5:30pm
電話：086-423-0552
